ਦਿਨ ਤੇ ਰਾਤ ਦੇ ਤਾਪਮਾਨ 'ਚ ਹਾਲੇ ਜ਼ਿਆਦਾ ਅੰਤਰ ਨਹੀਂ-ਡਾ. ਹਰਪ੍ਰੀਤ
ਅਜੀਤ ਡੈਸਕ
26-02-2026
ਮੰਡੀ ਲਾਧੂਕਾ, 25 ਫਰਵਰੀ (ਰਾਕੇਸ਼ ਛਾਬੜਾ)-ਫਰਵਰੀ ਮਹੀਨੇ 'ਚ ਇਕਦਮ ਵੱਧ ਰਿਹਾ ਤਾਪਮਾਨ ਕਣਕ ਦੀ ਫ਼ਸਲ ਲਈ ਨੁਕਸਾਨਦੇਹ ਸਾਬਤ ਹੋ ਸਕਦਾ ਹੈ | ਵਧੇ ਹੋਏ ਤਾਪਮਾਨ ਨੇ ਕਿਸਾਨਾਂ ਦੀ ਚਿੰਤਾ ਵਧਾ ਦਿੱਤੀ ਹੈ, ਵਧੇ ਹੋਏ ਤਾਪਮਾਨ ਦੇ ਚੱਲਦੇ ਕਿਸਾਨਾਂ ਨੂੰ ਇੰਤਜ਼ਾਰ ਹੈ ਇਕ ਮੀਂਹ ਦਾ ਤਾਂ ਜੋ ਮਾਰਚ ਦੇ ਪਹਿਲੇ ਹਫ਼ਤੇ ਕਣਕ ਦਾ ਦਾਣਾ ਪੈਣ ਸਮੇਂ ਮੌਸਮ ਦਾ ਤਾਪਮਾਨ ਕੁੱਝ ਘੱਟ ਰਹਿ ਸਕੇ | ਜ਼ਿਲ੍ਹਾ ਫ਼ਾਜ਼ਿਲਕਾ 'ਚ ਤਕਰੀਬਨ 1 ਲੱਖ 94 ਹਜ਼ਾਰ ਹੈਕਟੇਅਰ ਵਿਚ ਕਣਕ ਦੀ ਬਿਜਾਈ ਕੀਤੀ ਜਾਂਦੀ ਹੈ | ਇਸ ਸੰਬੰਧ 'ਚ ਜ਼ਿਲ੍ਹਾ ਫ਼ਾਜ਼ਿਲਕਾ ਦੀ ਮੁੱਖ ਖੇਤੀਬਾੜੀ ਅਫ਼ਸਰ ਡਾ. ਹਰਪੀ੍ਰਤ ਪਾਲ ਕੌਰ ਨੇ ਕਿਹਾ ਹੈ, ਵਧੇਰੇ ਗਰਮ ਤਾਪਮਾਨ ਦੇ ਕਾਰਨ ਕਣਕ ਦਾ ਦਾਣਾ ਸੁੰਗੜ ਜਾਂਦਾ ਹੈ, ਹਾਲੇ ਤੱਕ ਦਿਨ ਤੇ ਰਾਤ ਦੇ ਤਾਪਮਾਨ ਵਿਚ ਜ਼ਿਆਦਾ ਅੰਤਰ ਨਹੀਂ ਹੈ, ਜੇਕਰ ਰਾਤ ਤੇ ਦਿਨ ਦੇ ਤਾਪਮਾਨ ਵਿਚ ਵਧੇਰੇ ਅੰਤਰ ਆਇਆ ਤਾਂ ਮਹਿਕਮੇ ਵਲੋਂ ਐਡਵਾਇਜਰੀ ਜਾਰੀ ਕੀਤੀ ਜਾਵੇਗੀ, ਉਨ੍ਹਾਂ ਨੇ ਕਿਸਾਨਾਂ ਨੂੰ ਸਲਾਹ ਦਿੱਤੀ ਹੈ ਹੋਰ ਤਾਪਮਾਨ ਵਧਣ ਤੇ ਕਿਸਾਨ ਕਣਕ ਨੂੰ ਹਲਕਾ ਪਾਣੀ ਲਗਾਉਣ ਅਤੇ 13-0-45 ਦੀ ਸਪਰੇਅ ਕਰਨ |