ਅਬੋਹਰ, 8 ਅਪ੍ਰੈਲ (ਵਿਵੇਕ ਹੂੜੀਆ)-ਬੀਤੇ ਦਿਨ ਅਤੇ ਦੇਰ ਰਾਤ ਹੋਈ ਭਾਰੀ ਬਾਰਸ਼ ਨੇ ਜਿੱਥੇ ਆਮ ਜਨਜੀਵਨ ਪ੍ਰਭਾਵਿਤ ਕੀਤਾ, ਉੱਥੇ ਹੀ ਸਥਾਨਕ ਸੰਤ ਨਗਰੀ ਵਿਚ ਇਕ ਗ਼ਰੀਬ ਪਰਿਵਾਰ 'ਤੇ ਕਹਿਰ ਬਣ ਕੇ ਟੁੱਟੀ | ਬਾਰਸ਼ ਕਾਰਨ ਦੋ ਕਮਰਿਆਂ ਦੀਆਂ ਛੱਤਾਂ ਅਚਾਨਕ ਡਿਗ ਗਈਆਂ | ਖ਼ੁਸ਼ਕਿਸਮਤੀ ਰਹੀ ਕਿ ਪਰਿਵਾਰ ਨੇ ਸਮੇਂ ਸਿਰ ਬਾਹਰ ਨਿਕਲ ਕੇ ਆਪਣੀ ਜਾਨ ਬਚਾ ਲਈ, ਪਰ ਘਰ ਵਿਚ ਰੱਖਿਆ ਲੱਖਾਂ ਰੁਪਏ ਦਾ ਸਾਮਾਨ ਮਲਬੇ ਹੇਠ ਦੱਬ ਕੇ ਤਬਾਹ ਹੋ ਗਿਆ | ਪੀੜਤਾ ਵੀਨਾ ਰਾਣੀ ਨੇ ਦੱਸਿਆ ਕਿ ਰਾਤ ਕਰੀਬ 12 ਵਜੇ ਉਹ, ਉਸ ਦੀ ਸੱਸ ਅਤੇ ਬੱਚੇ ਵੱਖ-ਵੱਖ ਕਮਰਿਆਂ ਵਿਚ ਸੁੱਤੇ ਹੋਏ ਸਨ | ਅਚਾਨਕ ਉਸ ਦੀ ਸੱਸ ਦੇ ਕਮਰੇ ਵਿਚ ਛੱਤ 'ਤੋਂ ਸੀਮਿੰਟ ਦਾ ਟੁਕੜਾ ਡਿੱਗਿਆ, ਜਿਸ ਦੀ ਆਵਾਜ਼ ਸੁਣ ਕੇ ਉਸ ਦੀ ਸੱਸ ਅਤੇ ਬੱਚੇ ਤੁਰੰਤ ਬਾਹਰ ਆ ਗਏ | ਜਿਵੇਂ ਹੀ ਉਹ ਸਾਰੇ ਬਾਹਰ ਨਿਕਲੇ, ਦੇਖਦੇ ਹੀ ਦੇਖਦੇ ਦੋਵਾਂ ਕਮਰਿਆਂ ਦੀਆਂ ਛੱਤਾਂ ਪੂਰੀ ਤਰ੍ਹਾਂ ਹੇਠਾਂ ਡਿਗ ਗਈਆਂ | ਜੇਕਰ ਬਾਹਰ ਨਿਕਲਣ ਵਿਚ ਮਿੰਟ ਦੀ ਵੀ ਦੇਰੀ ਹੋ ਜਾਂਦੀ ਤਾਂ ਵੱਡਾ ਜਾਨੀ ਨੁਕਸਾਨ ਹੋ ਸਕਦਾ ਸੀ | ਇਸ ਹਾਦਸੇ ਵਿਚ ਕਮਰਿਆਂ ਅੰਦਰ ਰੱਖੇ ਬੈੱਡ, ਮੰਜੇ, ਪੇਟੀਆਂ, ਸਿਲੰਡਰ, ਕੂਲਰ, ਟੀਵੀ ਅਤੇ ਬਿਸਤਰੇ ਆਦਿ ਸਭ ਕੁੱਝ ਮਲਬੇ ਹੇਠ ਦੱਬ ਕੇ ਬਰਬਾਦ ਹੋ ਗਿਆ | ਵੀਨਾ ਦੀ ਸੱਸ ਮਹਿੰਦਰ ਕੌਰ ਨੇ ਭਰੇ ਮਨ ਨਾਲ ਦੱਸਿਆ ਕਿ ਇਹ ਮਕਾਨ ਕਰੀਬ 25 ਸਾਲ ਪੁਰਾਣਾ ਸੀ | ਰਾਤ ਨੂੰ ਜਦੋਂ ਛੱਤ 'ਤੋਂ ਮਲਬਾ ਡਿੱਗਿਆ ਤਾਂ ਉਸ ਨੇ ਆਪਣੇ ਪੁੱਤਰ ਕਾਲੇ ਨੂੰ ਆਵਾਜ਼ ਮਾਰੀ ਅਤੇ ਸਾਰਾ ਪਰਿਵਾਰ ਸੁਰੱਖਿਅਤ ਬਾਹਰ ਆ ਗਿਆ | ਪੀੜਤ ਪਰਿਵਾਰ ਨੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਤੋਂ ਮੁਆਵਜ਼ੇ ਦੀ ਮੰਗ ਕੀਤੀ ਹੈ ਤਾਂ ਜੋ ਉਹ ਆਪਣੇ ਸਿਰ ਦੀ ਛੱਤ ਮੁੜ ਉਸਾਰ ਸਕਣ |
