ਮੰਡੀ ਲਾਧੂਕਾ, 26 ਅਪ੍ਰੈਲ (ਰਾਕੇਸ਼ ਛਾਬੜਾ)-ਇਸ ਸਰਹੱਦੀ ਖੇਤਰ ਵਿਚ ਕਣਕ ਦੀ ਵਾਢੀ ਦਾ ਕੰਮ ਅੰਤਿਮ ਦੌਰ ਵਿਚ ਹੈ | ਇਸ ਸਮੇਂ ਤੂੜੀ ਦਾ ਸੀਜ਼ਨ ਜੋਰਾਂ ਤੇ ਚੱਲ ਰਿਹਾ ਹੈ | ਬੇਮੌਸਮੀ ਮੀਂਹ ਨੇ ਕਣਕ ਦੇ ਝਾੜ ਦੇ ਨਾਲ ਨਾਲ ਤੂੜੀ ਦੇ ਉਤਪਾਦਨ 'ਤੇ ਵੀ ਬੁਰਾ ਅਸਰ ਪਾਇਆ ਹੈ | ਪਿਛਲੇ ਸਾਲ ਦੇ ਮੁਕਾਬਲੇ ਪ੍ਰਤੀ ਏਕੜ ਤੂੜੀ ਦਾ ਉਤਪਾਦਨ ਅੱਧਾ ਰਹਿ ਗਿਆ ਹੈ | ਜਿਸ ਕਾਰਨ ਤੂੜੀ ਦੀਆਂ ਕੀਮਤਾਂ ਵਿਚ ਤੇਜ਼ੀ ਦਾ ਰੁਝਾਨ ਦੇਖਣ ਨੂੰ ਮਿਲ ਰਿਹਾ ਹੈ | ਪਿੰਡ ਲਾਧੂਕਾ ਦੇ ਤੂੜੀ ਦੀ ਮਸ਼ੀਨ ਦੇ ਮਾਲਕ ਸੁਰਿੰਦਰ ਕੁਮਾਰ ਜੱਜ ਨੇ ਕਿਹਾ ਹੈ ਪਹਿਲਾਂ ਇਕ ਏਕੜ ਜ਼ਮੀਨ ਵਿਚੋਂ 2 ਤੋਂ ਢਾਈ ਟਰਾਲੀਆਂ ਤੂੜੀ ਬਣ ਜਾਂਦੀ ਸੀ ਪਰ ਇਸ ਵਾਰ ਬੇਮੌਸਮੀ ਮੀਂਹ ਦੇ ਕਾਰਨ ਕਣਕ ਦਾ ਨਾੜ ਕਮਜ਼ੋਰ ਹੋ ਗਿਆ ਹੈ, ਜਿਸ ਕਾਰਨ ਇਕ ਕਿਲ੍ਹੇ ਵਿਚੋਂ ਮੁਸ਼ਕਿਲ ਦੇ ਨਾਲ ਇਕ ਟਰਾਲੀ ਤੂੜੀ ਦੀ ਬਣ ਰਹੀ ਹੈ | ਇਸ ਵਾਰ ਹੋਏ ਬੇਮੌਸਮੇ ਮੀਂਹ ਦੇ ਕਾਰਨ ਤੂੜੀ ਦੇ ਉਤਪਾਦਨ ਦੇ ਨਾਲ ਨਾਲ ਤੂੜੀ ਗੁਣਵੱਤਾ ਵਿਚ ਨਿਘਾਰ ਦੇਖਣ ਨੂੰ ਮਿਲ ਰਿਹਾ ਹੈ | ਪਿੰਡ ਲਾਧੂਕਾ ਦੇ ਕਿਸਾਨ ਨੰਬਰਦਾਰ ਪਰਮਾ ਨੰਦ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕੁਦਰਤੀ ਆਫ਼ਤਾਂ ਦੇ ਕਾਰਨ ਫ਼ਸਲਾਂ ਦੇ ਹੁੰਦੇ ਨੁਕਸਾਨ ਦੀ ਭਰਪਾਈ ਲਈ ਫ਼ਸਲੀ ਬੀਮਾ ਯੋਜਨਾ ਤੁਰੰਤ ਲਾਗੂ ਕਰੇ |
