ਅਬੋਹਰ, 28 ਅਪ੍ਰੈਲ (ਵਿਵੇਕ ਹੂੜੀਆ)-ਪਿੰਡ ਕੁਲਾਰ ਵਿਚ ਇਕ ਵਿਸ਼ਵਾਸਘਾਤ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਕ ਨਿੱਜੀ ਬਾਗ਼ ਦੇ ਮੁਨੀਮ ਨੇ ਹੀ ਆਪਣੇ ਮਾਲਕ ਦੇ ਕਿੰਨੂ ਚੋਰੀ ਕਰਕੇ ਵੇਚ ਦਿੱਤੇ | ਪੁਲਿਸ ਨੇ ਸ਼ਿਕਾਇਤ ਦੇ ਆਧਾਰ 'ਤੇ ਮੁਲਜ਼ਮ ਵਿਰੁੱਧ ਬਣਦੀਆਂ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਹੈ | ਸ਼ਿਕਾਇਤਕਰਤਾ ਨੀਲਮ ਪਤਨੀ ਵਿਮਨ ਨਿਉਲ਼ ਵਾਸੀ ਪਿੰਡ ਕੁਲਾਰ ਨੇ ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਦੱਸਿਆ ਕਿ ਉਸ ਨੇ ਆਪਣੇ ਖੇਤਾਂ ਵਿਚ ਕਿੰਨੂਆਂ ਦਾ ਬਾਗ਼ ਲਗਾਇਆ ਹੋਇਆ ਹੈ | ਬਾਗ਼ ਦੀ ਦੇਖਭਾਲ ਅਤੇ ਕੰਮ-ਕਾਜ ਸਾਂਭਣ ਲਈ ਪਿਛਲੇ ਕਰੀਬ ਦੋ ਸਾਲਾਂ ਤੋਂ ਕੁਲਦੀਪ ਕੁਮਾਰ ਉਰਫ਼ ਗੌਰਵ ਪੁੱਤਰ ਸਾਹਿਬ ਰਾਮ ਨੂੰ ਬਤੌਰ ਮੁਨੀਮ ਰੱਖਿਆ ਹੋਇਆ ਸੀ | ਨੀਲਮ ਅਨੁਸਾਰ ਕਰੀਬ ਇਕ ਮਹੀਨਾ ਪਹਿਲਾਂ ਕੋਈ ਨਾ-ਮਾਲੂਮ ਵਿਅਕਤੀ ਪਿਕਅਪ ਗੱਡੀ ਰਾਹੀਂ ਬਾਗ਼ ਵਿਚੋਂ ਕਰੀਬ 20 ਕੁਇੰਟਲ ਕਿੰਨੂ ਚੋਰੀ ਕਰਕੇ ਲੈ ਗਿਆ ਸੀ | ਪੀੜਤ ਅÏਰਤ ਆਪਣੇ ਪੱਧਰ 'ਤੇ ਇਸ ਚੋਰੀ ਦੀ ਭਾਲ ਕਰ ਰਹੀ ਸੀ | ਜਾਂਚ ਦੌਰਾਨ ਉਸ ਨੂੰ ਪਤਾ ਲੱਗਾ ਕਿ ਇਹ ਚੋਰੀ ਕਿਸੇ ਬਾਹਰਲੇ ਵਿਅਕਤੀ ਨੇ ਨਹੀਂ, ਸਗੋਂ ਉਸ ਦੇ ਆਪਣੇ ਮੁਨੀਮ ਕੁਲਦੀਪ ਕੁਮਾਰ ਨੇ ਹੀ ਅੰਜਾਮ ਦਿੱਤੀ ਸੀ | ਚੋਰੀ ਕੀਤੇ ਗਏ ਕਿੰਨੂਆਂ ਦੀ ਕੀਮਤ ਕਰੀਬ 40 ਹਜ਼ਾਰ ਰੁਪਏ ਦੱਸੀ ਜਾ ਰਹੀ ਹੈ | ਇਸ ਸ਼ਿਕਾਇਤ 'ਤੇ ਕਾਰਵਾਈ ਕਰਦਿਆਂ ਸਬ-ਇੰਸਪੈਕਟਰ ਸਰਵਣ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਵਿਰੁੱਧ ਮਾਮਲਾ ਦਰਜ ਕਰ ਲਿਆ ਗਿਆ ਹੈ |
