ਅਬੋਹਰ, 2 ਜੂਨ (ਤੇਜਿੰਦਰ ਸਿੰਘ ਖ਼ਾਲਸਾ)-ਸਥਾਨਕ ਸੀਤੋ ਰੋਡ ਸਥਿਤ ਆਧਾਰਸ਼ਿਲਾ ਸਕੂਲ ਦੇ ਡਾਇਰੈਕਟਰ ਰਾਜੀਵ ਗੁਪਤਾ ਅਤੇ ਅਨਾਮਿਕਾ ਗੁਪਤਾ ਦੇ ਹੋਣਹਾਰ ਸਪੁੱਤਰ ਆਕਾਸ਼ ਗੁਪਤਾ ਨੇ ਇਤਿਹਾਸ ਰਚਦੇ ਹੋਏ ਕੈਟ ਇਮਤਿਹਾਨ ਵਿਚ 99.7 ਫ਼ੀਸਦੀ ਅੰਕ ਹਾਸਲ ਕਰਕੇ ਆਪਣੇ ਮਾਤਾ-ਪਿਤਾ ਅਤੇ ਇਲਾਕੇ ਦਾ ਨਾਮ ਰੌਸ਼ਨ ਕੀਤਾ ਹੈ | ਇਸ ਉਪਲਬਧੀ ਬਾਅਦ ਉਨ੍ਹਾਂ ਦੀ ਆਈ.ਆਈ.ਐਮ ਰਾਂਚੀ ਵਿਚ ਫਲੈਗਸ਼ਿਪ ਐਮ.ਬੀ.ਏ ਪ੍ਰੋਗਰਾਮ ਵਿਚ ਵੀ ਆਪਣੀ ਜਗ੍ਹਾ ਪੱਕੀ ਕਰ ਲਈ ਹੈ | ਜਿਸ ਕਾਰਨ ਗੁਪਤਾ ਪਰਿਵਾਰ ਨੂੰ ਅਬੋਹਰ ਸ਼ਹਿਰ ਦੀਆਂ ਸਮੂਹ ਵਿੱਦਿਅਕ ਸ਼ਖ਼ਸੀਅਤਾਂ ਤੋਂ ਇਲਾਵਾ ਸ਼ਹਿਰ ਵਾਸੀਆਂ ਵਲੋਂ ਲਗਾਤਾਰ ਵਧਾਈ ਮਿਲ ਰਹੀ ਹੈ | ਇਸ ਸੰਬੰਧੀ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦੇ ਹੋਏ ਆਕਾਸ਼ ਗੁਪਤਾ ਦੇ ਪਿਤਾ ਰਾਜੀਵ ਗੁਪਤਾ ਨੇ ਦੱਸਿਆ ਕਿ ਆਕਾਸ਼ ਨੇ ਕੈਟ ਵਿਚ 99.7 ਫ਼ੀਸਦੀ, ਐਕਸ.ਏ.ਟੀ ਵਿਚ 99.71 ਫ਼ੀਸਦੀ ਅਤੇ ਐੱਸ.ਐਨ.ਏ.ਪੀ ਵਿਚ 99.96 ਫ਼ੀਸਦੀ ਹਾਸਲ ਕੀਤੇ ਹਨ | ਆਕਾਸ਼ ਗੁਪਤਾ ਦੀ ਚੋਣ ਇੰਡੀਅਨ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਰਾਚੀ ਦੇ ਐਮ.ਬੀ.ਏ ਪ੍ਰੋਗਰਾਮ ਵਿਚ ਹੋਈ ਹੈ | ਇਸ ਤੋਂ ਇਲਾਵਾ ਉਸ ਨੂੰ ਇੰਡੀਅਨ ਇੰਸਟੀਚਿਊਟ ਮੈਨੇਜਮੈਂਟ ਨਾਗਪੁਰ, ਇੰਡੀਅਨ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਤਾਮਿਲਨਾਡੂ, ਇੰਡੀਅਨ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਕਾਂਸ਼ੀਪੁੁਰ, ਸਿੰਬੋਸ ਇੰਟਰਨੈਸ਼ਨਲ ਯੂਨੀਵਰਸਿਟੀ ਪੁੂਣਾ ਅਤੇ ਹੋਰ ਪ੍ਰਮੁੱਖ ਵਿੱਦਿਅਕ ਖੇਤਰਾਂ ਤੋਂ ਵੀ ਸੱਦਾ ਮਿਲਿਆ ਪਰ ਆਕਾਸ਼ ਨੇ ਆਪਣੇ ਸੁਪਨੇ, ਟੀਚੇ ਅਤੇ ਭਵਿੱਖ ਦੀ ਦਿਸ਼ਾ ਨੂੰ ਧਿਆਨ ਵਿਚ ਰੱਖਦੇ ਹੋਏ ਆਈ.ਆਈ.ਐਮ ਰਾਂਚੀ ਦੇ ਕੋਰ ਐਮ.ਬੀ.ਏ.ਪ੍ਰੋਗਰਾਮ ਨੂੰ ਚੁਣਿਆ | ਇਸ ਸੰਬੰਧੀ ਗੱਲਬਾਤ ਕਰਦੇ ਹੋਏ ਆਕਾਸ਼ ਗੁਪਤਾ ਨੇ ਦੱਸਿਆ ਕਿ ਉਸ ਦੀ ਇਸ ਉਪਲਬਧੀ ਵਿਚ ਉਸ ਦੇ ਮਾਤਾ-ਪਿਤਾ ਅਤੇ ਆਧਾਰਸ਼ਿਲਾ ਪਰਿਵਾਰ ਦੀ ਵੱਡੀ ਮਿਹਨਤ ਹੈ | ਆਕਾਸ਼ ਨੇ ਮੁੱਢਲੀ ਸਿੱਖਿਆ ਅਬੋਹਰ ਦੇ ਆਧਾਰਸ਼ਿਲਾ ਤੋਂ ਹੀ ਪ੍ਰਾਪਤ ਕਰਕੇ ਉਕਤ ਉਪਲਬਧੀ ਹਾਸਲ ਕੀਤੀ | ਆਕਾਸ਼ ਨੇ ਦੱਸਿਆ ਕਿ ਉਸ ਦਾ ਮਕਸਦ ਵੱਡੇ ਪੈਕੇਜ ਜਾਂ ਕਾਰਪੋਰੇਟ ਘਰਾਣੇ ਵਿਚ ਜਾਣਾ ਨਹੀਂ ਬਲਕਿ ਇਲਾਕੇ ਦੇ ਬੱਚਿਆਂ ਦੇ ਵੀ ਸੁਪਨੇ ਪੂਰੇ ਕਰਨ ਵਿਚ ਉਹ ਹਮੇਸ਼ਾ ਉਪਲਬਧ ਰਹਿਣਗੇ | ਉਨ੍ਹਾਂ ਦੱਸਿਆ ਕਿ ਉਹ ਐਮ.ਬੀ.ਏ ਪੂਰੀ ਕਰਨ ਉਪਰੰਤ ਇਲਾਕੇ ਦੇ ਬੱਚਿਆਂ ਨੂੰ ਵੱਡੇ ਸ਼ਹਿਰਾਂ ਦੇ ਬਰਾਬਰ ਕੈਰੀਅਰ ਗਾਈਡੈਂਸ ਅਤੇ ਕੌਂਸਲਿੰਗ ਦੇਣ ਦੇ ਲਈ ਕੋਸ਼ਿਸ਼ ਕਰਨਗੇ |
