ਅੰਮਿ੍ਤਸਰ, 2 ਮਾਰਚ (ਹਰਮਿੰਦਰ ਸਿੰਘ)-ਦੇਸ਼ ਭਰ 'ਚ ਚਾਈਨਾ ਨੂੰ ਪਿੱਛੇ ਕਰਨ ਲਈ ਭਾਰਤੀ ਮੰਡੀ 'ਚ ਸਵਦੇਸ਼ੀ ਵਸਤੂਆਂ ਨੂੰ ਉਭਾਰਿਆ ਜਾ ਰਿਹਾ ਹੈ | ਪਰ ਇਸ ਦੇ ਬਾਵਜੂਦ ਚਾਈਨਾ ਦੀ ਬਣੀਆਂ ਵਸਤੂਆਂ ਦੀ ਵਿਕਰੀ ਵੱਡੇ ਪੱਧਰ 'ਤੇ ਭਾਰਤੀ ਬਾਜ਼ਾਰਾਂ 'ਚ ਹੋ ਰਹੀ ਹੈ | ਇੱਥੋਂ ਤੱਕ ਭਾਰਤੀ ਤਿਉਹਾਰਾਂ ਦੌਰਾਨ ਵੀ ਵੱਡੇ ਪੱਧਰ 'ਤੇ ਚਾਈਨਾਂ ਦੀਆਂ ਬਣੀਆਂ ਵਸਤੂਆ ਬਾਜ਼ਾਰਾਂ ਦਾ ਸ਼ਿੰਗਾਰ ਬਣ ਰਹੀਆਂ ਹਨ | ਭਾਰਤ ਵਿਚ ਹੋਲੀ ਦਾ ਤਿਉਹਾਰ ਬੜੇ ਵੱਡੇ ਪੱਧਰ 'ਤੇ ਮਨਾਇਆ ਜਾਂਦਾ ਹੈ | ਦੀਵਾਲੀ ਤੋਂ ਬਾਅਦ ਹੋਲੀ ਅਜਿਹਾ ਤਿਉਹਾਰ ਹੈ ਜੋ ਵੱਡੇ ਪੱਧਰ 'ਤੇ ਮਨਾਇਆ ਜਾਂਦਾ ਹੈ | ਇਸ ਦਿਨ ਆਪਸੀ ਗਿਲੇ ਸ਼ਿਕਵੇ ਖ਼ਤਮ ਕਰਨ ਅਤੇ ਸਾਂਝ ਨੂੰ ਮਜ਼ਬੂਤ ਕਰਨ ਲਈ ਇਕ ਦੂਸਰੇ 'ਤੇ ਰੰਗ ਸੁੱਟ ਕੇ ਪਿਆਰ ਦਾ ਸਨੇਹਾ ਦਿੱਤਾ ਜਾਂਦਾ ਹੈ | ਇਹ ਰੰਗ ਸੁੱਟਣ ਲਈ ਵੰਨ ਸੁਵੰਨੀਆਂ ਪਿਚਕਾਰੀਆਂ ਬਾਜ਼ਾਰ 'ਚ ਆ ਗਈਆਂ ਹਨ ਜਿਨ੍ਹਾਂ ਦੀ ਕੀਮਤ 10 ਰੁਪਏ ਤੋਂ ਸ਼ੁਰੂ ਹੋ ਕੇ 10 ਹਜ਼ਾਰ ਰੁਪਏ ਤੱਕ ਹੈ | ਇਨ੍ਹਾਂ 'ਚੋਂ ਸੈੱਲਾਂ ਨਾਲ ਚੱਲਣ ਵਾਲੀ ਬਿਜਲਈ ਪਿਚਕਾਰੀ ਅਤੇ ਹਵਾ 'ਚ ਦੂਰ ਤੱਕ ਰੰਗ ਸੁੱਟਣ ਵਾਲਾ ਸਿਲੰਡਰ ਲੋਕਾਂ ਨੂੰ ਵਿਸ਼ੇਸ਼ ਤੌਰ 'ਤੇ ਆਕਰਸ਼ਿਤ ਕਰਦਾ ਹੈ | ਇਸ ਸਾਲ ਛੋਟੇ ਬੱਚਿਆਂ ਲਈ ਚਾਈਨਾ ਦੀ ਬਣੀ ਬਿਜਲਈ ਪਿਚਕਾਰੀ ਅਤੇ ਵੱਡਿਆਂ ਲਈ ਹਵਾ 'ਚ ਰੰਗ ਸੁੱਟਣ ਵਾਲਾ ਸਿਲੰਡਰ ਬਹੁਤ ਪਸੰਦ ਕੀਤਾ ਜਾ ਰਿਹਾ ਹੈ | ਇਸ ਤੋਂ ਇਲਾਵਾ ਚਾਈਨਾ ਦੀਆਂ ਬਣੀਆਂ ਪਲਾਸਟਿਕ ਦੀਆਂ ਪਿਚਕਾਰੀਆਂ, ਪਾਣੀ ਭਰਨ ਵਾਲੇ ਗ਼ੁਬਾਰੇ ਵੀ ਬਾਜ਼ਾਰ 'ਚ ਬਹੁਤ ਵਿਕ ਰਹੇ ਹਨ | ਝੱਗ ਵਾਲੇ ਰੰਗ ਵਾਲੀਆਂ ਸਪਰੇਅ ਦੀ ਵੀ ਬਾਜ਼ਾਰ ਵਿਚ ਬਹੁਤ ਮੰਗ ਹੈ | ਇਸ ਸਬੰਧ ਵਿਚ ਦੁਕਾਨਦਾਰ ਰਾਜੂ ਨਾਲ ਗੱਲਬਾਤ ਕੀਤੀ ਤਾਂ ਉਸ ਨੇ ਦੱਸਿਆ ਕਿ ਵਧੇਰੇ ਕਰਕੇ ਮਾਲ ਚਾਈਨਾ ਤੋਂ ਆਉਂਦਾ ਹੈ ਅਤੇ ਇਸ ਦੀ ਪੈਕਿੰਗ ਇੱਥੇ ਹੁੰਦੀ ਹੈ | ਇਸ ਦੌਰਾਨ ਦੁਕਾਨਦਾਰ ਹਰਮਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਵੇਲੇ ਹਵਾ 'ਚ ਰੰਗ ਬਖੇਰਣ ਵਾਲੇ ਛੋਟੇ ਅਤੇ ਵੱਡੇ ਪਟਾਕੇ ਵੀ ਬਾਜ਼ਾਰ ਵਿਚ ਬਹੁਤ ਵਿਕ ਰਹੇ ਹਨ | ਜਿਨ੍ਹਾਂ ਨੂੰ ੂ ਅੱਗ ਲਗਾਉਣ 'ਤੇ ਹਵਾ ਵਿਚ ਰੰਗ ਉਡਾਉਂਦੇ ਹਨ | ਇਸ ਤੋਂ ਇਲਾਵਾ 1 ਲੀਟਰ ਤੋਂ ਲੈ ਕੇ 10 ਲੀਟਰ ਰੰਗ ਵਾਲੇ ਸਿਲੰਡਰਾਂ ਦੀ ਵੀ ਬਹੁਤ ਮੰਗ ਹੈ | ਪਾਣੀ ਭਰਨ ਵਾਲੇ ਗ਼ੁਬਾਰੇ ਜੋ ਚਾਈਨਾ ਤੋਂ ਆਉਂਦੇ ਹਨ ਉਨ੍ਹਾਂ ਦੀ ਵੀ ਬਹੁਤ ਮੰਗ ਹੈ | ਆਪਣੇ ਦੇਸ਼ ਵਿਚ ਬਣੇ ਵੱਖ ਵੱਖ ਕੰਪਨੀਆਂ ਦੇ ਪੈਕਿੰਗ ਵਾਲੇ ਰੰਗ ਲੋਕਾਂ ਵਲੋਂ ਪਸੰਦ ਕੀਤੇ ਜਾ ਰਹੇ ਹਨ | ਜੋ ਮਨੁੱਖੀ ਚਮੜੀ ਲਈ ਵੀ ਸੁਰੱਖਿਅਤ ਹਨ |
