ਅੰਮਿ੍ਤਸਰ, 5 ਮਾਰਚ (ਸੁਰਿੰਦਰ ਕੋਛੜ)-ਪੰਜਾਬ ਪ੍ਰਦੇਸ਼ ਵਪਾਰ ਮੰਡਲ ਦੇ ਸੂਬਾਈ ਪ੍ਰਧਾਨ ਪਿਆਰੇ ਲਾਲ ਸੇਠ ਅਤੇ ਅੰਮਿ੍ਤਸਰ ਇਕਾਈ ਦੇ ਪ੍ਰਧਾਨ ਸੁਰਿੰਦਰ ਦੁੱਗਲ ਦੀ ਅਗਵਾਈ ਹੇਠ ਵਪਾਰੀਆਂ ਦੀ ਹੋਈ ਬੈਠਕ 'ਚ ਅੰਮਿ੍ਤਸਰ ਵਿਖੇ 50 ਕਰੋੜ ਰੁਪਇਆਂ ਦੀ ਲਾਗਤ ਨਾਲ ਯੂਨਿਟੀ ਮਾਲ ਬਣਾਏ ਜਾਣ ਬਾਰੇ ਪੰਜਾਬ ਸਰਕਾਰ ਵਲੋਂ ਕੀਤੇ ਐਲਾਨ ਦਾ ਸਵਾਗਤ ਕੀਤਾ ਗਿਆ | ਦੱਸਿਆ ਜਾ ਰਿਹਾ ਹੈ ਕਿ ਯੂਨਿਟੀ ਮਾਲ ਅੰਮਿ੍ਤਸਰ 'ਚ 4 ਏਕੜ ਰਕਬੇ 'ਚ ਬਣਾਇਆ ਜਾਵੇਗਾ ਅਤੇ ਇਸ ਪ੍ਰਾਜੈਕਟ 'ਚ ਕੇਂਦਰ ਸਰਕਾਰ ਤੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਕੇਂਦਰ ਅਤੇ ਰਾਜ ਸਰਕਾਰ 75-25 ਦੇ ਅਨੁਪਾਤ 'ਚ ਨਿਵੇਸ਼ ਕਰਨਗੀਆਂ | ਵਪਾਰੀ ਆਗੂਆਂ ਨੇ ਕਿਹਾ ਕਿ ਯੂਨਿਟੀ ਮਾਲ 'ਚ ਵਪਾਰ ਅਤੇ ਉਦਯੋਗ, ਪ੍ਰਦਰਸ਼ਨੀ ਕੇਂਦਰ, ਕਨਵੈੱਨਸ਼ਨ ਹਾਲ ਆਦਿ ਸਹੂਲਤਾਂ ਨਾਲ ਅੰਮਿ੍ਤਸਰ ਦੇ ਵਪਾਰ ਨੂੰ ਵਧਣ ਦਾ ਮੌਕਾ ਮਿਲੇਗਾ | ਇਸ ਮੌਕੇ 'ਤੇ ਹਾਜ਼ਰ ਵਪਾਰੀ ਆਗੂਆਂ ਐੱਸ. ਕੇ. ਵਧਵਾ, ਰੰਜਨ ਅਗਰਵਾਲ, ਰਾਕੇਸ਼ ਠੁਕਰਾਲ, ਸਮੀਰ ਜੈਨ ਅਤੇ ਬਲਬੀਰ ਭਸੀਨ ਨੇ ਪੰਜਾਬ ਸਰਕਾਰ ਨੂੰ ਲਾਇਸੈਂਸ ਫ਼ੀਸ ਅਤੇ ਪ੍ਰਾਪਰਟੀ ਟੈਕਸ 'ਚ ਵਾਧਾ ਨਾ ਕਰਨ ਦੀ ਅਪੀਲ ਕਰਦਿਆਂ ਰੀਗੋ ਪੁਲ ਦੀ ਮੁੜ ਉਸਾਰੀ 'ਚ ਤੇਜ਼ੀ ਲਿਆਉਣ ਅਤੇ ਸ਼ਹਿਰ 'ਚ ਕਾਨੂੰਨ ਵਿਵਸਥਾ 'ਚ ਸੁਧਾਰ ਕਰਨ ਦੀ ਵੀ ਅਪੀਲ ਕੀਤੀ |
