ਅੰਮਿ੍ਤਸਰ, 26 ਮਈ (ਰਾਜੇਸ਼ ਕੁਮਾਰ ਸ਼ਰਮਾ)-ਸਾਬਕਾ ਸੰਸਦ ਮੈਂਬਰ ਅਤੇ ਸਾਬਕਾ ਮੇਅਰ ਇੰਜ. ਸ਼ਵੇਤ ਮਲਿਕ ਨੇ ਕਿਹਾ ਕਿ ਕੇਂਦਰ ਦੀ ਮੋਦੀ ਸਰਕਾਰ ਅੰਮਿ੍ਤਸਰ ਰੇਲਵੇ ਸਟੇਸ਼ਨ ਨੂੰ ਵਿਸ਼ਵ ਪੱਧਰੀ ਬਣਾਉਣ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ | ਮਲਿਕ ਨੇ ਦੱਸਿਆ ਕਿ 2017 'ਚ ਉਨ੍ਹਾਂ ਨੇ ਗੁਰੂ ਨਗਰੀ ਅੰਮਿ੍ਤਸਰ ਰੇਲਵੇ ਸਟੇਸ਼ਨ ਨੂੰ ਵਿਸ਼ਵ ਪੱਧਰੀ ਬਣਾਉਣ ਲਈ ਸੰਸਦ 'ਚ ਆਪਣੀ ਆਵਾਜ਼ ਬੁਲੰਦ ਕੀਤੀ | ਮੋਦੀ ਸਰਕਾਰ ਨੇ 1,000 ਕਰੋੜ ਰੁਪਏ ਦਾ ਪ੍ਰੋਜੈਕਟ ਪਾਸ ਕੀਤਾ ਅਤੇ ਪਹਿਲੇ ਪੜਾਅ 'ਚ 500 ਕਰੋੜ ਰੁਪਏ ਦੀ ਲਾਗਤ ਨਾਲ ਅੰਮਿ੍ਤਸਰ ਅਤੇ ਛੇਹਰਟਾ 'ਚ ਕਈ ਰੇਲਵੇ ਪ੍ਰੋਜੈਕਟ ਪੂਰੇ ਕੀਤੇ | ਉਨ੍ਹਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਅਤੇ ਰੇਲ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਦਾ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਹੁਣ ਵਿਸ਼ਵ ਪੱਧਰੀ ਅੰਮਿ੍ਤਸਰ ਰੇਲਵੇ ਸਟੇਸ਼ਨ ਪ੍ਰੋਜੈਕਟ ਦੇ ਦੂਜੇ ਪੜਾਅ ਲਈ 402 ਕਰੋੜ ਰੁਪਏ ਜਾਰੀ ਕੀਤੇ ਹਨ | ਮਲਿਕ ਨੇ ਦੱਸਿਆ ਕਿ ਆਜ਼ਾਦੀ ਤੋਂ ਬਾਅਦ ਕਾਂਗਰਸ ਦੇ 70 ਸਾਲਾਂ ਦੇ ਰਾਜ ਦੌਰਾਨ ਸਟੇਸ਼ਨ 'ਤੇ ਸਿਰਫ਼ ਪੰਜ ਪਲੇਟਫਾਰਮ ਸਨ, ਜਿਸ ਕਾਰਨ ਨਵੀਆਂ ਰੇਲਗੱਡੀਆਂ ਨਹੀਂ ਆ ਸਕੀਆਂ | ਉਨਾਂ ਦੱਸਿਆ ਕਿ ਫੇਜ਼ 1 'ਚ ਦੋ ਨਵੇਂ ਪਲੇਟਫਾਰਮ, 6 ਅਤੇ 7, ਬਣਾਏ ਗਏ ਸਨ ਅਤੇ ਦਿੱਲੀ-ਅੰਮਿ੍ਤਸਰ ਵੰਦੇ ਭਾਰਤ ਰੇਲਗੱਡੀ ਚੱਲਣੀ ਸ਼ੁਰੂ ਹੋ ਗਈ ਸੀ | ਹੁਣ ਫੇਜ਼ 2 'ਚ ਪੰਜ ਨਵੇਂ ਪਲੇਟਫਾਰਮ ਬਣਾਏ ਜਾ ਰਹੇ ਹਨ, ਜਿਸ ਨਾਲ ਕੁੱਲ ਗਿਣਤੀ 12 ਹੋ ਜਾਵੇਗੀ | ਸਿਵਲ ਲਾਈਨਜ਼ ਵੱਲ ਪਾਰਕਿੰਗ 390 ਕਾਰਾਂ, 415 ਸਕੂਟਰਾਂ ਅਤੇ 85 ਆਟੋ ਲਈ ਬਣਾਈ ਜਾਵੇਗੀ | ਗੋਲ ਬਾਗ ਵਿਖੇ ਜਨਤਕ ਸਹੂਲਤ ਲਈ 210 ਕਾਰਾਂ, 200 ਸਕੂਟਰਾਂ ਅਤੇ 25 ਆਟੋ ਲਈ ਪਾਰਕਿੰਗ ਬਣਾਈ ਜਾਵੇਗੀ | ਉਨ੍ਹਾਂ ਦੱਸਿਆ ਕਿ ਸਿਵਲ ਲਾਈਨਜ਼ 'ਚ ਇਕ ਸੱਤ ਮੰਜ਼ਿਲਾ ਇਮਾਰਤ ਬਣਾਈ ਜਾਵੇਗੀ, ਜਿਸ 'ਚ ਦੋ ਮੰਜ਼ਿਲਾਂ ਰੇਲਵੇ ਦਫਤਰਾਂ ਲਈ ਸਮਰਪਿਤ ਹਨ ਅਤੇ ਪੰਜ ਮੰਜ਼ਿਲਾਂ ਵਪਾਰਕ ਦੁਕਾਨਾਂ ਅਤੇ ਇਕ ਫੂਡ ਕੋਰਟ ਲਈ ਸਮਰਪਿਤ ਹਨ | ਗੋਲ ਬਾਗ 'ਚ ਇਕ ਤਿੰਨ ਮੰਜ਼ਿਲਾ ਇਮਾਰਤ ਬਣਾਈ ਜਾਵੇਗੀ, ਜਿਸ 'ਚ ਇਕ ਟੈਲੀਫੋਨ ਐਕਸਚੇਂਜ, ਪਾਰਸਲ ਬੁਕਿੰਗ, ਇਕ ਡਾਕਘਰ, ਰਿਟਾਇਰਿੰਗ ਰੂਮ, ਰੇਲਵੇ ਅਧਿਕਾਰੀਆਂ ਦੇ ਦਫਤਰ, ਇਕ ਰੇਲ ਡਰਾਈਵਰਾਂ ਦਾ ਰੈਸਟਰੂਮ, ਇਕ ਪੁਲਿਸ ਸਟੇਸ਼ਨ ਅਤੇ ਇਕ ਸਿਹਤ ਕਲੱਬ ਹੋਵੇਗਾ | ਇਸ ਤੋਂ ਇਲਾਵਾ ਰੇਲਵੇ ਪਟੜੀਆਂ ਦੇ ਹੇਠਾਂ ਬੇਸਮੈਂਟ 'ਚ ਦੋ ਪੈਦਲ ਚੱਲਣ ਵਾਲੇ ਅੰਡਰਪਾਸ ਬਣਾਏ ਜਾਣਗੇ, ਜੋ ਪਲੇਟਫਾਰਮ ਨੰਬਰ 1 ਸਿਵਲ ਲਾਈਨਜ਼ ਨੂੰ ਪਲੇਟਫਾਰਮ ਨੰਬਰ 12 ਗੋਲਬਾਗ ਨਾਲ ਜੋੜਦੇ ਹਨ | ਗੋਲ ਬਾਗ਼ 'ਚ ਰੇਲਵੇ ਕਰਮਚਾਰੀਆਂ ਦੇ ਰਹਿਣ ਲਈ 48 ਰਿਹਾਇਸ਼ੀ ਫਲੈਟ ਬਣਾਏ ਜਾਣਗੇ ਅਤੇ ਵੰਦੇ ਭਾਰਤ ਰੇਲਗੱਡੀ ਦੇ ਰੱਖ-ਰਖਾਅ ਲਈ ਇਕ ਸ਼ੈੱਡ ਬਣਾਇਆ ਜਾਵੇਗਾ, ਜਿਸ ਨਾਲ ਮੋਦੀ ਸਰਕਾਰ ਭਵਿੱਖ 'ਚ ਅੰਮਿ੍ਤਸਰ ਨਿਵਾਸੀਆਂ ਨੂੰ ਹੋਰ ਵੰਦੇ ਭਾਰਤ ਅਤੇ ਹਾਈ-ਸਪੀਡ ਗੱਡੀਆਂ ਦਾ ਤੋਹਫ਼ਾ ਦੇ ਸਕੇਗੀ | ਮਲਿਕ ਨੇ ਕਿਹਾ ਕਿ ਸਿਵਲ ਲਾਈਨਜ਼ ਨੂੰ ਅੰਦਰੂਨੀ ਸ਼ਹਿਰ ਨਾਲ ਜੋੜਨ ਵਾਲੇ ਰਿਗੋ ਬਿ੍ਜ ਨੂੰ ਚੌੜਾ ਕਰਕੇ ਚਾਰ ਮਾਰਗੀ ਬਣਾਇਆ ਜਾਵੇਗਾ, ਜਿਸ ਦੇ ਥੰਮ ਲਗਾਏ ਗਏ ਹਨ ਅਤੇ ਦਸੰਬਰ ਤੱਕ ਨਵਾਂ ਬਣਿਆ ਰਿਗੋ ਬਿ੍ਜ ਅੰਮਿ੍ਤਸਰ ਨਿਵਾਸੀਆਂ ਦੀ ਸਹੂਲਤ ਲਈ ਉਪਲਬੱਧ ਹੋਵੇਗਾ, ਜਿਸ ਨਾਲ ਆਵਾਜਾਈ ਦੀਆਂ ਸਮੱਸਿਆਵਾਂ ਤੋਂ ਰਾਹਤ ਮਿਲੇਗੀ | ਉਨ੍ਹਾਂ ਕਿਹਾ ਕਿ ਪਹਿਲਾਂ ਨਵੇਂ ਭੰਡਾਰੀ ਬਿ੍ਜ, ਵੇਰਕਾ ਰੇਲਵੇ ਓਵਰਬਿ੍ਜ, ਛੇਹਰਟਾ ਰੇਲਵੇ ਸਟੇਸ਼ਨ ਦਾ ਨਿਰਮਾਣ 60 ਕਰੋੜ ਰੁਪਏ ਦੇ ਨਿਵੇਸ਼ ਨਾਲ ਕੀਤਾ ਜਾ ਚੁੱਕਾ ਹੈ ਅਤੇ ਹੁਣ ਮਾਨਾਂਵਾਲਾ ਸਟੇਸ਼ਨ 'ਤੇ ਵਿਕਾਸ ਕਾਰਜ ਚੱਲ ਰਹੇ ਹਨ |
