ਭਿੱਖੀਵਿੰਡ, 18 ਅਪ੍ਰੈਲ (ਬੌਬੀ)- ਆਈ.ਟੀ. ਕਾਲਜ ਭਗਵਾਨਪੁਰਾ ਵਿਖੇ ਨਵੇਂ ਵਿਦਿਅਕ ਵਰ੍ਹੇ 2026-27 ਦੀ ਸ਼ੁਰੂਆਤ ਮੌਕੇ ਗੁਰੂ ਸਾਹਿਬ ਦੇ ਚਰਨਾਂ ਵਿਚ ਨਤਮਸਤਕ ਹੋ ਕੇ ਸ਼ੁਕਰਾਨਾ ਕੀਤਾ ਗਿਆ | ਇਸ ਪਵਿੱਤਰ ਮੌਕੇ 'ਤੇ ਕਾਲਜ ਦੀਆਂ ਧੀਆਂ, ਸਮੁੱਚਾ ਸਟਾਫ਼, ਡਰਾਈਵਰ ਵੀਰ, ਸੇਵਾਦਾਰ ਅਤੇ ਬਾਗ਼ ਵਾਲਾ ਪਰਿਵਾਰ ਇਕੱਤਰ ਹੋਇਆ | ਪਿ੍ੰਸੀਪਲ ਸਵਰਨ ਸਿੰਘ ਚੂਸਲੇਵੜ ਦੀ ਯਾਦ ਵਿੱਚ ਇਕ ਵਿਸ਼ੇਸ਼ ਸੈਮੀਨਾਰ ਅਤੇ ਖ਼ਾਲਸਾ ਪ੍ਰਗਟ ਦਿਹਾੜੇ ਨੂੰ ਸਮਰਪਿਤ ਕਰਦਿਆਂ ਮਨਾਇਆ ਗਿਆ | ਸਮਾਗਮ ਦੌਰਾਨ ਬੱਚਿਆਂ ਵਲੋਂ ਬਹੁਤ ਹੀ ਸੁੰਦਰ ਕੀਰਤਨ, ਕਵੀਸ਼ਰੀ ਅਤੇ ਢਾਡੀ ਕਲਾ ਦਾ ਪ੍ਰਦਰਸ਼ਨ ਕੀਤਾ ਗਿਆ ਅਤੇ ਇਕ ਵਿਦਿਆਰਥਣ ਨੇ ਗੁਰੂ ਸਾਹਿਬ ਦੇ ਸਨਮੁੱਖ ਹੋ ਕੇ ਸਾਰਿਆਂ ਦੀ ਚੜ੍ਹਦੀ ਕਲਾ ਲਈ ਅਰਦਾਸ ਕੀਤੀ | ਇਸ ਵਿਸ਼ੇਸ਼ ਮੌਕੇ ੇ ਸਿੱਖ ਕੌਮ ਦੀਆਂ ਮਹਾਨ ਸ਼ਖ਼ਸੀਅਤਾਂ ਜਿਨ੍ਹਾਂ ਵਿਚ ਸ਼੍ਰੋਮਣੀ ਕਵੀਸ਼ਰ ਸਰਦਾਰ ਅਮਰਜੀਤ ਸਿੰਘ ਸਭਰਾ, ਵਿਦਵਾਨ ਸਰਦਾਰ ਪਰਮਪਾਲ ਸਿੰਘ ਸਭਰਾ, ਸਰਦਾਰ ਦਿਲਬਾਗ ਸਿੰਘ ਬਲੇਰ, ਸਰਦਾਰ ਅਮਰਜੀਤ ਸਿੰਘ ਸੁਰਸਿੰਘ ਅਤੇ ਢਾਡੀ ਮਨਬੀਰ ਸਿੰਘ ਪਹੂਵਿੰਡ ਸ਼ਾਮਿਲ ਸਨ ਨੇ ਹਾਜ਼ਰੀ ਭਰੀ | ਇਨ੍ਹਾਂ ਪਤਵੰਤੇ ਸੱਜਣਾਂ ਨੇ ਵਿਦਿਆਰਥੀਆਂ ਦੇ ਰੂਬਰੂ ਹੋ ਕੇ ਵਡਮੁੱਲੀਆਂ ਗੱਲਾਂ ਦੀ ਸਾਂਝ ਪਾਈ | ਸਮਾਗਮ ਦੀ ਸਮਾਪਤੀ 'ਤੇ ਗੁਰੂ ਕੇ ਲੰਗਰ ਅਤੁੱਟ ਵਰਤਾਏ ਗਏ ਅਤੇ ਇਲਾਕੇ ਦੀਆਂ ਧੀਆਂ ਨੂੰ ਚੜ੍ਹਦੀ ਕਲਾ, ਵਿੱਦਿਆ ਦੀ ਦਾਤ ਅਤੇ ਸਤਿਕਾਰ ਬਖ਼ਸ਼ਣ ਦੀ ਅਰਦਾਸ ਕੀਤੀ ਗਈ |
