ਤਰਨਤਾਰਨ

ਮੀਂਹ ਕਾਰਨ ਖੁੱਲ੍ਹੇ ਅਸਮਾਨ ਹੇਠ ਪਏ ਅਨਾਜ ਨੂੰ ਨੁਕਸਾਨ ਦਾ ਖਤਰਾ, ਸਰਕਾਰ ਦੀਆਂ ਤਿਆਰੀਆਂ 'ਤੇ ਸਵਾਲ <br/>

ਪੱਟੀ ਦੀਆਂ ਵੱਖ-ਵੱਖ ਦਾਣਾ ਮੰਡੀਆਂ ਵਿਚ ਕਣਕ ਦੀ ਲਿਫਟਿੰਗ ਨਾ ਹੋਣ ਕਾਰਨ ਬੋਰੀਆਂ ਦੇ ਲੱਗੇ ਅੰਬਾਰ | ਤਸਵੀਰਾਂ:ਖਹਿਰਾ <br/> ਜਾਣਕਾਰੀ ਦਿੰਦੇ ਹੋਏ ਕਿਸਾਨ ਸੰਘਰਸ਼ ਕਮੇਟੀ ਦੇ ਪੰਜਾਬ ਪ੍ਰਧਾਨ ਇੰਦਰਜੀਤ ਸਿੰਘ ਕੋਟਬੁੱਢਾ <br/> 06-05-2026

ਪੱਟੀ, 5 ਮਈ (ਅਵਤਾਰ ਸਿੰਘ ਖਹਿਰਾ, ਕੁਲਵਿੰਦਰਪਾਲ ਸਿੰਘ ਕਾਲੇਕੇ)-ਪੰਜਾਬ ਦੀਆਂ ਅਨਾਜ ਮੰਡੀਆਂ ਵਿਚ 13 ਅਪ੍ਰੈਲ ਤੋਂ ਬਾਅਦ ਬਣੇ ਹਾਲਾਤ ਸਰਕਾਰ ਦੀ ਕਾਰਗੁਜ਼ਾਰੀ 'ਤੇ ਵੱਡੇ ਸਵਾਲ ਖੜੇ ਕਰ ਰਹੇ ਹਨ | ਕਿਸਾਨ ਆਪਣੀ ਕਣਕ ਮੰਡੀ ਵਿਚ ਲਿਆ ਕੇ ਤੋਲ ਕਰਵਾ ਕੇ ਘਰ ਵਾਪਸ ਚਲੇ ਗਏ ਹਨ, ਪਰ ਮੰਡੀਆਂ ਦਾ ਅਸਲ ਆਸਰਾ ਮਜ਼ਦੂਰ ਅਤੇ ਪੱਲੇਦਾਰ ਅਜੇ ਵੀ ਉੱਥੇ ਹੀ ਫਸੇ ਹੋਏ ਹਨ ਅਤੇ ਦਿਹਾੜੀਆਂ ਲਈ ਸੰਘਰਸ਼ ਕਰ ਰਹੇ ਹਨ | ਉਪਰੋਕਤ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਕਿਸਾਨ ਸੰਘਰਸ਼ ਕਮੇਟੀ ਦੇ ਪੰਜਾਬ ਪ੍ਰਧਾਨ ਇੰਦਰਜੀਤ ਸਿੰਘ ਕੋਟਬੁੱਢਾ ਨੇ ਕਿਹਾ ਕਿ ਟਰਾਂਸਪੋਰਟੇਸ਼ਨ ਪ੍ਰਬੰਧ ਬਿਲਕੁਲ ਠੱਪ ਹੋਣ ਕਾਰਨ ਲਿਫਟਿੰਗ ਨਾਮਾਤਰ ਹੀ ਹੋ ਰਹੀ ਹੈ | ਮਾਰਕੀਟ ਕਮੇਟੀ ਪੱਟੀ ਅਧੀਨ ਆਉਂਦੀਆਂ ਮੰਡੀਆਂ ਵਿਚ ਅਨਾਜ ਦੇ ਢੇਰ ਲੱਗੇ ਹੋਏ ਹਨ ਪਰ ਉਨ੍ਹਾਂ ਨੂੰ ਚੁੱਕਣ ਲਈ ਨਾ ਹੀ ਪ੍ਰਾਪਤ ਗੱਡੀਆਂ ਹਨ ਤੇ ਨਾ ਹੀ ਢੰਗ ਦਾ ਪ੍ਰਬੰਧ | ਘਰਿਆਲਾ ਮੰਡੀ ਵਿਚ ਲਗਪਗ 3 ਲੱਖ ਬੋਰੀਆਂ ਦੀ ਖਰੀਦ ਹੋਣ ਦੇ ਬਾਵਜੂਦ ਕੇਵਲ 70 ਹਜ਼ਾਰ ਬੋਰੀਆਂ ਦੀ ਲਿਫਟਿੰਗ ਹੋਈ ਹੈ | ਪੱਟੀ ਮੰਡੀ ਵਿਚ ਕਰੀਬ 65 ਫ਼ੀਸਦੀ ਲਿਫਟਿੰਗ ਹੋਈ ਜਦਕਿ 35 ਫੀਸਦੀ ਕਣਕ ਅਜੇ ਵੀ ਖੁੱਲ੍ਹੇ ਅਸਮਾਨ ਵਿਚ ਕਣਕ ਦੀਆਂ ਬੋਰੀਆਂ ਪਈਆਂ ਹਨ | ਇਸੇ ਤਰ੍ਹਾਂ ਤੂਤ ਮੰਡੀ ਵਿਚ ਲਗਪਗ 1 ਲੱਖ 20 ਹਜ਼ਾਰ ਕੁਇੰਟਲ ਕਣਕ ਵਿਚੋਂ ਸਿਰਫ਼ 20 ਹਜ਼ਾਰ ਕੁਇੰਟਲ ਦੀ ਹੀ ਲਿਫਟਿੰਗ ਹੋਈ ਹੈ, ਜਦਕਿ ਭੰਗਾਲਾ ਮੰਡੀ ਵਿਚ 1.42 ਲੱਖ ਕੁਇੰਟਲ ਵਿਚੋਂ ਕੇਵਲ 30 ਹਜ਼ਾਰ ਕੁਇੰਟਲ ਹੀ ਚੁੱਕਿਆ ਗਿਆ ਹੈ | ਹੋਰ ਮੰਡੀਆਂ ਵਿਚ ਵੀ ਇਹੀ ਹਾਲਾਤ ਹਨ, ਜਿੱਥੇ ਕਣਕ ਦੀਆਂ ਬੋਰੀਆਂ ਖੁੱਲ੍ਹੇ ਅਸਮਾਨ ਹੇਠ ਪਈਆਂ ਹਨ ਅਤੇ ਪਿਛਲੇ ਦੋ ਦਿਨਾਂ ਤੋਂ ਪੈ ਰਹੇ ਮੀਂਹ ਨਾਲ ਭਿੱਜ ਰਹੀਆਂ ਹਨ | ਕੋਟਬੁੱਢਾ ਨੇ ਕਿਹਾ ਕਿ ਸਰਕਾਰ ਤੇ ਟੈਂਡਰ ਦੇ ਠੇਕੇਦਾਰਾਂ ਦੀ ਢਿੱਲੀ ਕਾਰਗੁਜਾਰੀ ਚਲਦਿਆਂ ਮਜ਼ਦੂਰਾਂ ਦਾ 20 ਦਿਨਾਂ ਦਾ ਕੰਮ ਡੇਢ ਮਹੀਨੇ ਤੱਕ ਲੰਬਾ ਖਿੱਚਿਆ ਗਿਆ ਹੈ | ਪੱਲੇਦਾਰ ਦਿਨ-ਰਾਤ ਮੰਡੀਆਂ ਵਿਚ ਰਹਿ ਕੇ ਅਨਾਜ ਦੀ ਰਾਖੀ ਕਰ ਰਹੇ ਹਨ ਕਿਉਂਕਿ ਰਾਤ ਸਮੇਂ ਚੋਰੀਆਂ ਦਾ ਵੀ ਖ਼ਤਰਾ ਬਣਿਆ ਰਹਿੰਦਾ ਹੈ | ਮਜ਼ਦੂਰਾਂ ਦੀ ਆਰਥਿਕ ਹਾਲਤ ਵੀ ਗੰਭੀਰ ਹੋ ਚੁੱਕੀ ਹੈ, ਉਹ ਪਹਿਲਾਂ ਹੀ ਆੜ੍ਹਤੀਆਂ ਤੋਂ ਲਏ ਪੈਸੇ ਖ਼ਤਮ ਕਰ ਚੁੱਕੇ ਹਨ ਅਤੇ ਹੁਣ ਨਵੇਂ ਕੰਮ ਦੀ ਕੋਈ ਉਮੀਦ ਨਹੀਂ | ਮਜ਼ਬੂਰੀ ਵਜੋਂ ਉਹ ਕਿਸਾਨਾਂ ਕੋਲੋਂ ਅਗਾਊਾ ਰਕਮ ਲੈ ਕੇ ਘਰ ਦਾ ਗੁਜ਼ਾਰਾ ਕਰ ਰਹੇ ਹਨ, ਜੋ ਕਿ ਇਕ ਵੱਡਾ ਸਮਾਜਿਕ ਸੰਕਟ ਬਣਦਾ ਜਾ ਰਿਹਾ ਹੈ | ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਹਰ ਸਾਲ ਇੱਕੋ ਜਿਹੇ ਹਾਲਾਤ ਬਣਨ ਦੇ ਬਾਵਜੂਦ ਸਰਕਾਰ ਵੱਲੋਂ ਪਹਿਲਾਂ ਤੋਂ ਯੋਜਨਾ ਕਿਉਂ ਨਹੀਂ ਬਣਾਈ ਜਾਂਦੀ | ਮੰਡੀਆਂ ਵਿਚ ਲਾਪਰਵਾਹੀ ਕਾਰਨ ਸਭ ਤੋਂ ਵੱਧ ਨੁਕਸਾਨ ਮਜ਼ਦੂਰ ਵਰਗ ਨੂੰ ਝੱਲਣਾ ਪੈਂਦਾ ਹੈ | ਕੋਟਬੁੱਢਾ ਨੇ ਕਿਹਾ ਕਿ ਸਰਕਾਰ ਤੁਰੰਤ ਟਰਾਂਸਪੋਰਟੇਸ਼ਨ ਦਾ ਮਜ਼ਬੂਤ ਪ੍ਰਬੰਧ ਕਰੇ, ਲਿਫਟਿੰਗ ਤੇਜ਼ ਕਰੇ ਅਤੇ ਮਜ਼ਦੂਰਾਂ ਨੂੰ ਉਨ੍ਹਾਂ ਦਾ ਬਣਦਾ ਹੱਕ ਦੇਵੇ | ਨਹੀਂ ਤਾਂ ਘੱਟੋ-ਘੱਟ ਮਜ਼ਦੂਰਾਂ ਨੂੰ ਮਨਰੇਗਾ ਹੇਠ ਦਿਹਾੜੀਆਂ ਦੇ ਕੇ ਰੋਜ਼ੀ-ਰੋਟੀ ਦਾ ਪ੍ਰਬੰਧ ਕੀਤਾ ਜਾਵੇ, ਤਾਂ ਜੋ ਉਨ੍ਹਾਂ ਦੇ ਪਰਿਵਾਰ ਭੁੱਖੇ ਨਾ ਰਹਿਣ | ਜਦ ਇਸ ਸਬੰਧੀ ਮਾਰਕੀਟ ਕਮੇਟੀ ਪੱਟੀ ਦੇ ਅਧਿਕਾਰੀ ਸੁਖਦੀਪ ਸਿੰਘ ਨਾਲ ਫੋਨ 'ਤੇ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਏਜੰਸੀਆਂ ਕੋਲ ਕਣਕ ਸਟੋਰ ਕਰਨ ਲਈ ਜਗ੍ਹਾ ਦੀ ਘਾਟ ਕਾਰਨ ਲਿਫਟਿੰਗ ਵਿਚ ਦੇਰੀ ਹੋ ਰਹੀ ਹੈ ਤੇ ਜਲਦ ਹੀ ਮੰਡੀਆਂ ਵਿਚੋਂ ਲਿਫਟਿੰਗ ਕਰਵਾ ਲਈ ਜਾਵੇਗੀ |

ਪਿਛਲੀ ਖ਼ਬਰ ਕੇਰਲਾ ਜਿੱਤ ਦੀ ਖ਼ੁਸ਼ੀ 'ਚ ਸਾਬਕਾ ਮੰਤਰੀ ਧਰਮਸੋਤ ਦੀ ਅਗਵਾਈ 'ਚ ਲੱਡੂ ਵੰਡੇ ਅਗਲੀ ਖ਼ਬਰ ਭਾਜਪਾ ਆਗੂਆਂ ਸਿਤਾਰਾ ਸਿੰਘ ਡਲੀਰੀ ਦੀ ਅਗਵਾਈ ਵਿਚ ਭਾਜਪਾ ਦੀ ਸ਼ਾਨਦਾਰ ਜਿੱਤ 'ਤੇ ਲੱਡੂ ਵੰਡੇ <br/>

ਮੀਂਹ ਕਾਰਨ ਖੁੱਲ੍ਹੇ ਅਸਮਾਨ ਹੇਠ ਪਏ ਅਨਾਜ ਨੂੰ ਨੁਕਸਾਨ ਦਾ ਖਤਰਾ, ਸਰਕਾਰ ਦੀਆਂ ਤਿਆਰੀਆਂ 'ਤੇ ਸਵਾਲ <br/>

ਸੰਬੰਧਿਤ ਖ਼ਬਰਾਂ