ਲੁਧਿਆਣਾ, 16 ਜੁਲਾਈ (ਡਾ. ਤਰਲੋਚਨ ਸਿੰਘ)-ਇਕਾਈ ਹਸਪਤਾਲ ਨੇ ਅੰਗਦਾਨ ਅਤੇ ਕਿਡਨੀ ਟਰਾਂਸਪਲਾਂਟ ਦੇ ਖੇਤਰ ਵਿਚ ਇਕ ਹੋਰ ਮਹੱਤਵਪੂਰਨ ਉਪਲਬਧੀ ਹਾਸਲ ਕਰਦਿਆਂ ਪੰਜਾਬ ਦੇ ਸਭ ਤੋਂ ਵੱਧ ਉਮਰ ਦੇ 80 ਸਾਲਾ ਬ੍ਰੇਨ-ਡੈੱਡ ਅੰਗਦਾਤਾ ਦੀ ਕਿਡਨੀ ਨੇ ਐਂਡ-ਸਟੇਜ ਕਿਡਨੀ ਫੇਲੀਅਰ ਨਾਲ ਪੀੜਤ 63 ਸਾਲਾਂ ਮਰੀਜ਼ ਨੂੰ ਨਵੀਂ ਜ਼ਿੰਦਗੀ ਦਿੱਤੀ। ਅੰਗਦਾਤਾ ਦੇ ਪਰਿਵਾਰ ਨੇ ਬ੍ਰੇਨ-ਡੈੱਡ ਹੋਣ ਤੋਂ ਬਾਅਦ ਅੰਗਦਾਨ ਕਰਨ ਦਾ ਫ਼ੈਸਲਾ ਲਿਆ। ਸਟੇਟ ਆਰਗਨ ਐਂਡ ਟਿਸ਼ੂ ਟਰਾਂਸਪਲਾਂਟ ਆਰਗੇਨਾਈਜ਼ੇਸ਼ਨ (ਸੋਟੋ), ਪੰਜਾਬ ਦੇ ਨੋਡਲ ਅਫ਼ਸਰ ਡਾ. ਗਗਨੀਨ ਦੀ ਦੇਖ-ਰੇਖ ਹੇਠ ਪਾਰਦਰਸ਼ੀ ਪ੍ਰਕਿਰਿਆ ਰਾਹੀਂ ਇਹ ਕਿਡਨੀ ਇਕਾਈ ਹਸਪਤਾਲ ਨੂੰ ਅਲਾਟ ਕੀਤੀ ਗਈ। ਮਰੀਜ਼ ਕਈ ਸਾਲਾਂ ਤੋਂ ਡਾਇਲੈਸਿਸ ’ਤੇ ਸੀ ਅਤੇ ਉਚਿੱਤ ਕਿਡਨੀ ਦੀ ਉਡੀਕ ਕਰ ਰਿਹਾ ਸੀ। ਇਹ ਜਟਿਲ ਟਰਾਂਸਪਲਾਂਟ ਸਰਜਰੀ ਇਕਾਈ ਹਸਪਤਾਲ ਦੇ ਚੇਅਰਮੈਨ ਅਤੇ ਡਾਇਰੈਕਟਰ, ਯੂਰੋਲੋਜੀ, ਯੂਰੋ-ਓਨਕੋਲੋਜੀ ਅਤੇ ਕਿਡਨੀ ਟਰਾਂਸਪਲਾਂਟ ਵਿਭਾਗ ਦੇ ਮੁਖੀ ਡਾ. ਬਲਦੇਵ ਸਿੰਘ ਔਲਖ ਦੀ ਅਗਵਾਈ ਹੇਠ ਸਫਲਤਾਪੂਰਵਕ ਸਮਾਪਤ ਕੀਤੀ ਗਈ। ਦਾਨ ਕੀਤੀ ਗਈ ਕਿਡਨੀ ਵਿਚ ਕਈ ਧਮਨੀਆਂ ਸਨ ਅਤੇ ਮਰੀਜ਼ ਦੀਆਂ ਖ਼ੂਨ ਦੀਆਂ ਨਸਾਂ ਵਿਚ ਗੰਭੀਰ ਕੈਲਸ਼ੀਅਮ ਜਮਾਂ ਹੋਣ ਕਾਰਨ ਕਿਡਨੀ ਵਿਚ ਖ਼ੂਨ ਦੀ ਸਪਲਾਈ ਮੁੜ ਚਾਲੂ ਕਰਨਾ ਬਹੁਤ ਚੁਣੌਤੀਪੂਰਨ ਸੀ। ਮਾਹਿਰ ਟੀਮ ਨੇ ਇਸ ਜਟਿਲਤਾ ਨੂੰ ਸੰਭਾਲਦੇ ਹੋਏ ਟਰਾਂਸਪਲਾਂਟ ਪੂਰਾ ਕੀਤਾ। ਆਪ੍ਰੇਸ਼ਨ ਤੋਂ ਤੁਰੰਤ ਬਾਅਦ ਕਿਡਨੀ ਨੇ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਅਤੇ ਮਰੀਜ਼ ਦੀ ਸਿਹਤ ਵਿਚ ਸੰਤੋਸ਼ਜਨਕ ਸੁਧਾਰ ਹੋ ਰਿਹਾ ਹੈ। ਇਸ ਮੌਕੇ ਡਾ. ਔਲਖ ਨੇ ਕਿਹਾ ਕਿ ਇਹ ਪੰਜਾਬ ਲਈ ਇਕ ਇਤਿਹਾਸਕ ਪਲ ਹੈ। 80 ਸਾਲਾਂ ਬ੍ਰੇਨ-ਡੈੱਡ ਅੰਗਦਾਤਾ ਦੀ ਕਿਡਨੀ ਦਾ ਸਫਲ ਟਰਾਂਸਪਲਾਂਟ ਇਹ ਸਾਬਤ ਕਰਦਾ ਹੈ ਕਿ ਅੰਗਦਾਨ ਲਈ ਸਿਰਫ਼ ਉਮਰ ਨਹੀਂ, ਸਗੋਂ ਅੰਗਾਂ ਦੀ ਗੁਣਵੱਤਾ ਅਤੇ ਮੈਡੀਕਲ ਯੋਗਤਾ ਮਹੱਤਵਪੂਰਨ ਹੁੰਦੀ ਹੈ। ਇਕ ਪਰਿਵਾਰ ਦੇ ਨਿਸ਼ਕਾਮ ਅਤੇ ਬਹਾਦਰੀ ਭਰੇ ਫ਼ੈਸਲੇ ਨੇ ਦੂਜੇ ਪਰਿਵਾਰ ਦੀ ਜ਼ਿੰਦਗੀ ਵਿਚ ਮੁੜ ਉਮੀਦ ਅਤੇ ਖ਼ੁਸ਼ੀਆਂ ਭਰ ਦਿੱਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਆਧੁਨਿਕ ਟਰਾਂਸਪਲਾਂਟ ਤਕਨਾਲੋਜੀ ਦੀ ਬਦੌਲਤ ਵੱਡੀ ਉਮਰ ਦੇ ਦਾਤਾਵਾਂ ਦੇ ਅੰਗ ਵੀ ਸਹੀ ਚੋਣ ਤੋਂ ਬਾਅਦ ਸਫਲਤਾਪੂਰਵਕ ਵਰਤੇ ਜਾ ਸਕਦੇ ਹਨ, ਜਿਸ ਨਾਲ ਕਿਡਨੀ ਟਰਾਂਸਪਲਾਂਟ ਦੀ ਉਡੀਕ ਕਰ ਰਹੇ ਹਜ਼ਾਰਾਂ ਮਰੀਜ਼ਾਂ ਨੂੰ ਨਵੀਂ ਜ਼ਿੰਦਗੀ ਮਿਲ ਸਕਦੀ ਹੈ। ਇਸ ਮੌਕੇ ਮਰੀਜ਼ ਦੇ ਪਰਿਵਾਰ ਨੇ ਭਾਵੁਕ ਹੋ ਕੇ ਕਿਹਾ ਕਿ ਇਕਾਈ ਹਸਪਤਾਲ ਦੇ ਡਾਕਟਰਾਂ ਦੀ ਅਣਥੱਕ ਮਿਹਨਤ ਨੇ ਸਾਡੇ ਪਰਿਵਾਰ ਨੂੰ ਜ਼ਿੰਦਗੀ ਦਾ ਅਨਮੋਲ ਤੋਹਫ਼ਾ ਦਿੱਤਾ ਹੈ। ਡਾ. ਔਲਖ ਨੇ ਸੋਟੋ ਪੰਜਾਬ ਦੀ ਵੀ ਭਰਪੂਰ ਸ਼ਲਾਘਾ ਕੀਤੀ, ਜੋ ਬ੍ਰੇਨ-ਡੈੱਡ ਅੰਗਦਾਨ ਪ੍ਰੋਗਰਾਮ ਨੂੰ ਮਜ਼ਬੂਤ ਬਣਾਉਣ ਅਤੇ ਦਾਨ ਕੀਤੇ ਅੰਗਾਂ ਨੂੰ ਪੂਰੀ ਪਾਰਦਰਸ਼ਤਾ ਨਾਲ ਲੋੜਵੰਦ ਮਰੀਜ਼ਾਂ ਤੱਕ ਪਹੁੰਚਾਉਣ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾ ਰਿਹਾ ਹੈ। ਡਾ. ਔਲਖ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਬ੍ਰੇਨ-ਡੈੱਡ ਅੰਗਦਾਨ ਲਈ ਅੱਗੇ ਆਉਣ, ਕਿਉਂਕਿ ਇਕ ਅੰਗਦਾਤਾ ਕਈ ਲੋਕਾਂ ਨੂੰ ਨਵੀਂ ਜ਼ਿੰਦਗੀ ਦੇ ਸਕਦਾ ਹੈ।
