ਵੈਟਰਨਰੀ ਯੂਨੀਵਰਸਿਟੀ ਅਤੇ ਪਿਓਰ ਹੈਲਥ ਕੰਪਨੀ ਨੇ ਪਾਲਤੂ ਕੁੱਤਿਆਂ ਦੀ ਖ਼ੁਰਾਕ ਬਣਾਉਣ ਸੰਬੰਧੀ ਹੱਥ ਮਿਲਾਇਆ
ਲੁਧਿਆਣਾ, 18 ਅਗਸਤ (ਜਸਵਿੰਦਰ ਸਿੰਘ)-ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਪਸ਼ੂ ਵਿਗਿਆਨ ਯੂਨੀਵਰਸਿਟੀ ਅਤੇ ਪਿਊਰ ਹੈਲਥ ਫੂਡ ਅਤੇ ਨਿਊਟ੍ਰੀਸ਼ਨ, ਕਠੂਆ, ਜੰਮੂ ਅਤੇ ਕਸ਼ਮੀਰ ਨੇ ਕੁੱਤਿਆਂ ਦੀ ਖ਼ੁਰਾਕ ਦੀ ਫਾਰਮੂਲੇਸ਼ਨ ਅਤੇ ਗੁਣਵੱਤਾ ਮੁਲਾਂਕਣ ਲਈ ਤਕਨੀਕੀ ਸਲਾਹ-ਮਸ਼ਵਰੇ ਵਾਸਤੇ ਇਕ ਸਮਝੌਤੇ ਪੱਤਰ ’ਤੇ ਦਸਤਖ਼ਤ ਕੀਤੇ ਹਨ। ਡਾ.
ਲੁਧਿਆਣਾ, 18 ਅਗਸਤ (ਜਸਵਿੰਦਰ ਸਿੰਘ)-ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਪਸ਼ੂ ਵਿਗਿਆਨ ਯੂਨੀਵਰਸਿਟੀ ਅਤੇ ਪਿਊਰ ਹੈਲਥ ਫੂਡ ਅਤੇ ਨਿਊਟ੍ਰੀਸ਼ਨ, ਕਠੂਆ, ਜੰਮੂ ਅਤੇ ਕਸ਼ਮੀਰ ਨੇ ਕੁੱਤਿਆਂ ਦੀ ਖ਼ੁਰਾਕ ਦੀ ਫਾਰਮੂਲੇਸ਼ਨ ਅਤੇ ਗੁਣਵੱਤਾ ਮੁਲਾਂਕਣ ਲਈ ਤਕਨੀਕੀ ਸਲਾਹ-ਮਸ਼ਵਰੇ ਵਾਸਤੇ ਇਕ ਸਮਝੌਤੇ ਪੱਤਰ ’ਤੇ ਦਸਤਖ਼ਤ ਕੀਤੇ ਹਨ। ਡਾ. ਜਤਿੰਦਰ ਪਾਲ ਸਿੰਘ ਗਿੱਲ, ਵਾਈਸ-ਚਾਂਸਲਰ ਨੇ ਇਸ ਸਹਿਯੋਗ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਇਹ ਸਮਝੌਤਾ ਯੂਨੀਵਰਸਿਟੀ-ਉਦਯੋਗ ਭਾਈਵਾਲੀ ਨੂੰ ਮਜ਼ਬੂਤ ਕਰਨ ਅਤੇ ਵਧ ਰਹੇ ਪਾਲਤੂ ਜਾਨਵਰਾਂ ਦੀ ਖ਼ੁਰਾਕ ਦੇ ਖੇਤਰ ਵੱਲ ਇਕ ਮਹੱਤਵਪੂਰਨ ਕਦਮ ਹੈ। ਅਜਿਹੇ ਸਹਿਯੋਗ ਜਾਨਵਰਾਂ ਦੀ ਖ਼ੁਰਾਕ ਵਿਚ ਨਵੀਨਤਾ, ਗੁਣਵੱਤਾ ਭਰੋਸਾ ਅਤੇ ਤਕਨਾਲੋਜੀ ਟਰਾਂਸਫ਼ਰ ਨੂੰ ਉਤਸ਼ਾਹਿਤ ਕਰਨਗੇ। ਡਾ. ਸਵਰਨ ਸਿੰਘ ਰੰਧਾਵਾ, ਨਿਰਦੇਸ਼ਕ ਖੋਜ ਨੇ ਯੂਨੀਵਰਸਿਟੀ ਵਲੋਂ ਸਮਝੌਤੇ ’ਤੇ ਹਸਤਾਖ਼ਰ ਕੀਤੇ, ਜਦਕਿ ਪਿਊਰ ਹੈਲਥ ਫੂਡ ਅਤੇ ਨਿਊਟ੍ਰੀਸ਼ਨ ਦੀ ਨੁਮਾਇੰਦਗੀ ਕੰਪਨੀ ਦੇ ਸੀ.ਈ.ਓ. ਸੁਮਿਤ ਕੇਡੀਆ ਨੇ ਕੀਤੀ। ਸਮਝੌਤਾ ਹਸਤਾਖ਼ਰ ਸਮਾਰੋਹ ਵਿਚ ਡਾ. ਓਪਿੰਦਰ ਸਿੰਘ, ਡਾ. ਰਵਿੰਦਰ ਸਿੰਘ ਗਰੇਵਾਲ, ਡਾ. ਸਰਵਪ੍ਰੀਤ ਸਿੰਘ ਘੁੰਮਣ, ਡਾ. ਨਿਰਭੈਅ ਕੁਮਾਰ ਅਤੇ ਯੂਨੀਵਰਸਿਟੀ ਦੇ ਹੋਰ ਅਧਿਕਾਰੀਆਂ ਨੇ ਗਵਾਹੀ ਦਿੱਤੀ। ਪੰਜ-ਸਾਲਾ ਸਲਾਹ-ਮਸ਼ਵਰਾ ਸਹਿਯੋਗ ਦੀ ਵਿੱਤੀ ਕੀਮਤ ਲਗਭਗ 18.3 ਲੱਖ ਹੈ। ਡਾ. ਜਸਪਾਲ ਸਿੰਘ ਹੁੰਦਲ, ਮੁਖੀ ਪਸ਼ੂ ਆਹਾਰ ਵਿਭਾਗ ਨੇ ਕਿਹਾ ਕਿ ਇਸ ਸਮਝੌਤੇ ਅਧੀਨ ਵੈਟਰਨਰੀ ਯੂਨੀਵਰਸਿਟੀ ਵੱਖ-ਵੱਖ ਸ਼੍ਰੇਣੀਆਂ ਦੇ ਕੁੱਤਿਆਂ ਲਈ ਸੰਤੁਲਿਤ ਅਤੇ ਕਿਫ਼ਾਇਤੀ ਖ਼ੁਰਾਕ ਫ਼ਾਰਮੂਲੇ ਉਪਲਬਧ ਕਰਵਾਏਗੀ, ਖ਼ੁਰਾਕ ਤੱਤਾਂ ਅਤੇ ਤਿਆਰ ਉਤਪਾਦਾਂ ਦਾ ਮੁਲਾਂਕਣ ਕਰੇਗੀ ਅਤੇ ਆਪਣੀਆਂ ਲੈਬਾਰਟਰੀ ਸਹੂਲਤਾਂ ਰਾਹੀਂ ਖੁਰਾਕੀ ਗੁਣਵੱਤਾ ਦਾ ਮੁਲਾਂਕਣ ਕਰੇਗੀ। ਯੂਨੀਵਰਸਿਟੀ ਦੇ ਮਾਹਿਰ ਗੁਣਵੱਤਾ ਮੁਲਾਂਕਣ ਅਤੇ ਤਕਨੀਕੀ ਮਾਰਗ ਦਰਸ਼ਨ ਲਈ ਕੰਪਨੀ ਦੇ ਫੀਡ ਉਤਪਾਦਨ ਪਲਾਂਟ ਦਾ ਦੌਰਾ ਵੀ ਕਰਨਗੇ। ਇਹ ਸਹਿਯੋਗ ਖੋਜ ਅਤੇ ਪਾਲਤੂ ਜਾਨਵਰਾਂ ਦੀ ਖ਼ੁਰਾਕ ਉਦਯੋਗ ਵਿਚਕਾਰ ਇੰਟਰਫੇਸ ਨੂੰ ਵੀ ਮਜ਼ਬੂਤ ਕਰੇਗਾ। ਇਸ ਸਮਝੌਤੇ ਰਾਹੀਂ ਵੈਟਰਨਰੀ ਯੂਨੀਵਰਸਿਟੀ, ਲੁਧਿਆਣਾ ਨੇ ਇਕ ਵਾਰ ਲੋਕ ਹਿਤਾਂ ਲਈ ਖੋਜ ਅਤੇ ਮਿਆਰੀ ਸੇਵਾਵਾਂ ਉਪਲਬਧ ਕਰਵਾਉਣ ਸੰਬੰਧੀ ਵਚਨਬੱਧਤਾ ਦਾ ਸਬੂਤ ਦਿੱਤਾ ਹੈ।
