ਚੰਡੀਗੜ੍ਹ, 2 ਜਨਵਰੀ (ਕਪਿਲ ਵਧਵਾ)-ਡਿਸਟਿ੍ਕਟ ਕ੍ਰਾਇਮ ਸੈੱਲ (ਡੀ. ਸੀ. ਸੀ.) ਨੇ ਨਵੇਂ ਸਾਲ ਦੇ ਪਹਿਲੇ ਦਿਨ ਤੋਂ ਹੀ ਨਸ਼ਿਆਂ 'ਤੇ ਨਕੇਲ ਕੱਸਣੀ ਸ਼ੁਰੂ ਕਰ ਦਿੱਤੀ ਹੈ | ਪਹਿਲੀ ਕਾਰਵਾਈ ਵਜੋਂ ਸੈਕਟਰ-43 ਦੇ ਬੱਸ ਸਟੈਂਡ ਨਜ਼ਦੀਕ ਤੋਂ ਖੂਫੀਆ ਜਾਣਕਾਰੀ 'ਤੇ ਪੁਲਿਸ ਅਧਿਕਾਰੀਆਂ ਨੇ ਇਕ ਨਾਈਜੀਰੀਅਨ ਨਾਗਰਿਕ ਨੂੰ 9.32 ਗ੍ਰਾਮ ਵਜ਼ਨ ਦੀਆਂ ਕਰੈਕ ਗੇਂਦਾਂ ਸਮੇਤ ਗਿ੍ਫ਼ਤਾਰ ਕੀਤਾ ਹੈ | ਜਾਣਕਾਰੀ ਅਨੁਸਾਰ ਡੀ. ਸੀ. ਸੀ. ਦੇ ਐੱਸ. ਐੱਚ. ਓ. ਜਸਪਾਲ ਸਿੰਘ ਭੁੱਲਰ ਦੀ ਅਗਵਾਈ ਵਿਚ ਪੁਲਿਸ ਦੀਆਂ ਵੱਖ-ਵੱਖ ਟੀਮਾਂ 31 ਦਸੰਬਰ ਦੀ ਰਾਤ ਤੋਂ ਹੀ ਚੰਡੀਗੜ੍ਹ ਵਿਖੇ ਗਸ਼ਤ 'ਤੇ ਸਨ, ਪੁਲਿਸ ਨੂੰ ਗੁਪਤ ਸ੍ਰੋਤਾਂ ਰਾਹੀ 1 ਜਨਵਰੀ ਦੀ ਸਵੇਰ ਨੂੰ ਇਕ ਨਾਈਜੀਰੀਅਨ ਵਿਅਕਤੀ ਦੇ ਨਸ਼ਾ ਸਪਲਾਈ ਕਰਨ ਲਈ ਆਉਣ ਬਾਰੇ ਸੂਚਨਾ ਮਿਲੀ | ਜਿਸ ਤੋਂ ਬਾਅਦ ਪੁਲਿਸ ਨੇ ਸ਼ੱਕ ਦੇ ਆਧਾਰ ਤੇ ਵੀਰਵਾਰ ਦੁਪਹਿਰ ਨੂੰ ਅਲਾਚੀ ਕੇਲੇਚੁਕਵੁ ਵਾਸੀ ਦਿੱਲੀ ਨੂੰ ਰੋਕਿਆ | ਉਸ ਦੀ ਸਹਿਮਤੀ 'ਤੇ ਉਸ ਦੀ ਤਲਾਸ਼ੀ ਦੌਰਾਨ ਪੁਲਿਸ ਨੂੰ ਲਿਫਾਫੇ ਵਿਚ ਵਜ਼ਨੀ ਚੀਜ਼ ਬਰਾਮਦ ਹੋਈ ਜਿਸ ਦੀ ਪਛਾਣ ਕਰੈਕ ਗੇਂਦਾ ਵਜੋਂ ਹੋਈ | ਜਿਸ ਤੋਂ ਉਸ ਵਿਰੁੱਧ ਥਾਣਾ ਸੈਕਟਰ-36 ਵਿਖੇ ਐੱਨ. ਡੀ. ਪੀ. ਐੱਸ. ਦੀ ਧਾਰਾ 22 ਤਹਿਤ ਮਾਮਲਾ ਦਰਜ ਕਰਕੇ ਗਿ੍ਫ਼ਤਾਰ ਕਰ ਲਿਆ ਗਿਆ | ਸ਼ੁੱਕਰਵਾਰ ਨੂੰ ਅਦਾਲਤ ਵਿਖੇ ਪੇਸ਼ ਕੀਤੇ ਜਾਣ 'ਤੇ ਅਕਾਚੀ ਨੂੰ ਦੋ ਦਿਨਾਂ ਦੇ ਪੁਲਿਸ ਰਿਮਾਂਡ 'ਤੇ ਭੇਜ ਦਿੱਤਾ | ਫਿਲਹਾਲ ਪੁਲਿਸ ਅਧਿਕਾਰੀ ਉਕਤ ਮੁਲਜ਼ਮ ਤੋਂ ਨਸ਼ੇ ਦੇ ਸ੍ਰੋਤ ਅਤੇ ਸਪਲਾਈ ਵਾਲੀ ਥਾਂ ਬਾਰੇ ਪੁੱਛਗਿੱਛ ਕਰ ਰਹੇ ਹਨ |
