ਚੰਡੀਗੜ੍ਹ, 1 ਫਰਵਰੀ (ਕਪਿਲ ਵਧਵਾ)-ਯੂ-ਟਿਊਬ 'ਤੇ ਦਿਖਾਏ ਗਏ ਇਕ ਇਸ਼ਤਿਹਾਰ ਦੇ ਝਾਂਸੇ ਵਿਚ ਆ ਕੇ ਫਰਜ਼ੀ ਆਨਲਾਈਨ ਟਰੇਡਿੰਗ ਐਪ ਡਾਊਨਲੋਡ ਕਰਨ ਤੇ ਇਕ ਵਿਅਕਤੀ ਨੂੰ 14.40 ਲੱਖ ਰੁਪਏ ਦੀ ਠੱਗੀ ਦਾ ਸ਼ਿਕਾਰ ਹੋਣਾ ਪਿਆ | ਪੀੜਤ ਵਲੋਂ ਦਰਜ ਕਰਵਾਈ ਗਈ ਸ਼ਿਕਾਇਤ ਅਨੁਸਾਰ, ਉਸ ਨੂੰ ਯੂ-ਟਿਊਬ 'ਤੇ ਆਨਲਾਈਨ ਟਰੇਡਿੰਗ ਰਾਹੀਂ ਵੱਡੇ ਮੁਨਾਫ਼ੇ ਦੇ ਦਾਅਵੇ ਵਾਲਾ ਇਕ ਇਸ਼ਤਿਹਾਰ ਨਜ਼ਰ ਆਇਆ | ਇਸ਼ਤਿਹਾਰ 'ਚ ਦਿੱਤੇ ਲਿੰਕ 'ਤੇ ਕਲਿੱਕ ਕਰਨ ਤੋਂ ਬਾਅਦ ਵਾਟਸਐਪ ਰਾਹੀਂ ਉਸ ਨਾਲ ਸੰਪਰਕ ਕੀਤਾ ਗਿਆ ਅਤੇ -ਏ.ਡੀ.ਵੀ.ਪੀ.ਐੱਮ.ਏ' ਨਾਂ ਦੀ ਇਕ ਫਰਜ਼ੀ ਟਰੇਡਿੰਗ ਐਪ ਡਾਊਨਲੋਡ ਕਰਵਾਈ ਗਈ | ਐਪ 'ਤੇ ਨਕਲੀ ਮੁਨਾਫ਼ਾ ਦਿਖਾ ਕੇ ਪੀੜਤ ਨੂੰ ਹੌਲੀ-ਹੌਲੀ ਵੱਡੀ ਰਕਮ ਨਿਵੇਸ਼ ਕਰਨ ਲਈ ਉਕਸਾਇਆ ਗਿਆ | ਪੀੜਤ ਨੇ 25 ਦਸੰਬਰ 2025 ਤੋਂ 5 ਜਨਵਰੀ 2026 ਦਰਮਿਆਨ ਆਪਣੇ ਵੱਖ-ਵੱਖ ਬੈਂਕ ਖਾਤਿਆਂ ਤੋਂ ਕੁੱਲ 14.40 ਲੱਖ ਰੁਪਏ ਟਰਾਂਸਫ਼ਰ ਕਰ ਦਿੱਤੇ | ਬਾਅਦ ਵਿਚ ਜਦੋਂ ਉਸ ਨੇ ਨਿਵੇਸ਼ ਕੀਤੀ ਰਕਮ ਵਾਪਸ ਕੱਢਣ ਦੀ ਕੋਸ਼ਿਸ਼ ਕੀਤੀ ਤਾਂ ਠੱਗਾਂ ਨੇ ਸੰਪਰਕ ਤੋੜ ਲਿਆ | ਮਾਮਲੇ ਦੀ ਜਾਂਚ ਦੌਰਾਨ ਪੁਲਿਸ ਵਲੋਂ ਬੈਂਕ ਖਾਤਿਆਂ ਅਤੇ ਕਾਲ ਡੀਟੇਲ ਰਿਕਾਰਡਜ਼ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਗਈ | ਜਾਂਚ ਦੇ ਆਧਾਰ 'ਤੇ ਸਾਈਬਰ ਕ੍ਰਾਈਮ ਥਾਣਾ, ਚੰਡੀਗੜ੍ਹ ਦੀ ਟੀਮ ਨੇ ਸੈਕਟਰ-56, ਚੰਡੀਗੜ੍ਹ ਅਤੇ ਪੰਜਾਬ ਦੇ ਢਕੌਲੀ (ਪੀਰ ਮੁੱਛੱਲਾ) ਖੇਤਰ ਵਿਚ ਇਕੱਠੇ ਛਾਪੇ ਮਾਰ ਕੇ ਵਿਵੇਕ (ਨਿਵਾਸੀ ਵਿਕਾਸ ਨਗਰ, ਮੁਹਾਲੀ) ਅਤੇ ਰਿਸ਼ਭ ਗਾਂਧੀ (ਨਿਵਾਸੀ ਢਕੋਲੀ) ਨੂੰ ਗਿ੍ਫ਼ਤਾਰ ਕਰ ਲਿਆ | ਪੁੱਛਗਿੱਛ ਦੌਰਾਨ ਦੋਵਾਂ ਮੁਲਜ਼ਮਾਂ ਨੇ ਠੱਗੀ ਵਿਚ ਆਪਣੀ ਸ਼ਮੂਲੀਅਤ ਕਬੂਲ ਕਰਦੇ ਹੋਏ ਦੱਸਿਆ ਕਿ ਉਹ ਕਮੀਸ਼ਨ ਦੇ ਬਦਲੇ ਆਪਣੇ ਬੈਂਕ ਖਾਤੇ ਹੋਰ ਸਾਈਬਰ ਠੱਗਾਂ ਨੂੰ ਉਪਲਬਧ ਕਰਵਾਉਂਦੇ ਸਨ |
