ਚੰਡੀਗੜ੍ਹ, 21 ਜੁਲਾਈ (ਅ. ਬ.)- ਆਰੀਅਨਜ਼ ਕੈਂਪਸ ਵਿਚ ਐਸ.ਪੀ.ਈ.ਆਰ. ਦੀਆਂ ਨਵ-ਚੁਣੀਆਂ ਰਾਜ ਟੀਮਾਂ ਦਾ ਸਨਮਾਨ ਸੋਸਾਇਟੀ ਆਫ਼ ਫਾਰਮਾਸਿਊਟਿਕਲ ਐਜੂਕੇਸ਼ਨ ਐਂਡ ਰਿਸਰਚ ਵਲੋਂ ਪੰਜਾਬ ਦੇ ਰਾਜਪੁਰਾ ਵਿਖੇ ਸਥਿਤ ਆਰੀਅਨਜ਼ ਗਰੁੱਪ ਆਫ਼ ਕਾਲਜਿਜ਼ ਵਿਚ ਪੰਜਾਬ, ਹਰਿਆਣਾ ਤੇ ਹਿਮਾਚਲ ਪ੍ਰਦੇਸ਼ ਦੀਆਂ ਨਵ-ਚੁਣੀਆਂ ਰਾਜ ਕਾਰਜਕਾਰੀ ਟੀਮਾਂ ਅਤੇ ਰਾਜ ਮਹਿਲਾ ਮੰਚ ਦੀਆਂ ਟੀਮਾਂ ਦੇ ਸਨਮਾਨ ਲਈ ਇਕ ਸਫਲ ਮੀਟ ਐਂਡ ਗ੍ਰੀਟ ਪ੍ਰੋਗਰਾਮ ਕਰਵਾਇਆ ਗਿਆ। ਇਸ ਮੌਕੇ ਐਸ.ਪੀ.ਈ.ਆਰ. ਦੇ ਰਾਸ਼ਟਰੀ ਸਕੱਤਰ ਡਾ. ਉਪੇਂਦਰ ਨਾਗਾਇਚ, ਐਸਪੀਈਆਰ (ਕੇਂਦਰੀ) ਦੇ ਉਪ ਪ੍ਰਧਾਨ ਡਾ. ਇੰਦਰਬੀਰ ਸਿੰਘ, ਐਸਪੀਈਆਰ ਪੰਜਾਬ ਦੇ ਪ੍ਰਧਾਨ ਡਾ. ਜੇ. ਐੱਸ. ਦੁਆ, ਐਸ.ਪੀ.ਈ.ਆਰ. ਪੰਜਾਬ ਦੇ ਸਕੱਤਰ ਡਾ. ਸੰਦੀਪ ਕੁਮਾਰ, ਐਸ.ਪੀ.ਈ.ਆਰ. ਮਹਿਲਾ ਮੰਚ ਹਰਿਆਣਾ ਦੀ ਪ੍ਰਧਾਨ ਡਾ. ਅੰਜਲੀ ਸ਼ਰਮਾ, ਐਸਪੀਈਆਰ ਮਹਿਲਾ ਮੰਚ ਪੰਜਾਬ ਦੀ ਪ੍ਰਧਾਨ ਡਾ. ਰੂਪਿੰਦਰ ਕੌਰ ਸੋਢੀ, ਐਸਪੀਈਆਰ ਮਹਿਲਾ ਮੰਚ ਪੰਜਾਬ ਦੀ ਸਕੱਤਰ ਡਾ. ਮੰਜੂ ਨਾਗਪਾਲ, ਸਾਂਝੀ ਸਕੱਤਰ ਡਾ. ਪ੍ਰੀਤ ਕੌਰ ਖੈਰਾ ਅਤੇ ਡਾ. ਅੰਜਨਾ ਬਾਲੀ ਸਮੇਤ ਕਈ ਪ੍ਰਸਿੱਧ ਫਾਰਮਾ ਮਾਹਿਰ ਹਾਜ਼ਰ ਸਨ। ਆਰਯਨਜ਼ ਗਰੁੱਪ ਦੇ ਚੇਅਰਮੈਨ ਡਾ. ਅੰਸ਼ੂ ਕਟਾਰੀਆ ਨੇ ਸਮਾਗਮ ਦੀ ਪ੍ਰਧਾਨਗੀ ਕੀਤੀ। ਪ੍ਰੋਗਰਾਮ ਦੀ ਸ਼ੁਰੂਆਤ ਐਸ.ਪੀ.ਈ.ਆਰ. ਸੈਂਟਰਲ ਦੇ ਉਪ ਪ੍ਰਧਾਨ ਡਾ. ਇੰਦਰਬੀਰ ਸਿੰਘ ਦੇ ਸਵਾਗਤੀ ਭਾਸ਼ਣ ਨਾਲ ਹੋਈ। ਉਨ੍ਹਾਂ ਨੇ ਫਾਰਮਾਸਿਊਟਿਕਲ ਸਿੱਖਿਆ, ਖੋਜ, ਨਵੀਨਤਾ, ਪੇਸ਼ੇਵਰ ਨੈੱਟਵਰਕਿੰਗ ਅਤੇ ਕਮਿਊਨਿਟੀ ਆਉਟਰੀਚ ਵਿੱਚ ਉਤਕ੍ਰਿਸ਼ਟਤਾ ਨੂੰ ਉਤਸ਼ਾਹਿਤ ਕਰਨ ਲਈ ਐਸਪੀਈਆਰ ਵਲੋਂ ਕੀਤੀਆਂ ਵੱਖ-ਵੱਖ ਪਹਿਲਾਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਫਾਰਮੇਸੀ ਪੇਸ਼ੇਵਰਾਂ ਨੂੰ ਸਸ਼ਕਤ ਬਣਾਉਣ ਅਤੇ ਦੇਸ਼ ਭਰ ਵਿਚ ਅਕਾਦਮਿਕ ਅਤੇ ਖੋਜ ਦੇ ਮਿਆਰ ਨੂੰ ਉੱਚਾ ਚੁੱਕਣ ਲਈ ਐਸ.ਪੀ.ਈ.ਆਰ. ਦੀ ਵਚਨਬੱਧਤਾ ‘ਤੇ ਜ਼ੋਰ ਦਿੱਤਾ। ਸਭਾ ਨੂੰ ਸੰਬੋਧਨ ਕਰਦਿਆਂ ਡਾ. ਅੰਸ਼ੂ ਕਟਾਰੀਆ ਨੇ ਸਿਹਤ ਸੇਵਾਵਾਂ ਨੂੰ ਬਿਹਤਰ ਬਣਾਉਣ ਵਿਚ ਫਾਰਮਾਸਿਸਟਾਂ ਦੀ ਅਹਿਮ ਭੂਮਿਕਾ ‘ਤੇ ਜ਼ੋਰ ਦਿੱਤਾ ਅਤੇ ਉਭਰਦੀਆਂ ਸਿਹਤ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦੇ ਯੋਗ ਉੱਚ ਪੱਧਰੀ ਫਾਰਮੇਸੀ ਪੇਸ਼ੇਵਰ ਤਿਆਰ ਕਰਨ ਦੀ ਲੋੜ ਉੱਤੇ ਰੌਸ਼ਨੀ ਪਾਈ। ਉਨ੍ਹਾਂ ਨੇ ਫਾਰਮਾਸਿਊਟਿਕਲ ਸਿੱਖਿਆ ਅਤੇ ਖੋਜ ਨੂੰ ਮਜ਼ਬੂਤ ਕਰਨ ਵਿੱਚ ਐਸਪੀਈਆਰ ਦੇ ਯੋਗਦਾਨ ਦੀ ਸ਼ਲਾਘਾ ਕਰਦਿਆਂ ਐਲਾਨ ਕੀਤਾ ਕਿ ਆਰਯਨਜ਼ ਗਰੁੱਪ ਆਫ਼ ਕਾਲਜਿਜ਼ ਵਲੋਂ ਐਸ.ਪੀ.ਈ.ਆਰ. ਨੂੰ ਸੈਮੀਨਾਰਾਂ, ਕਾਨਫਰੰਸਾਂ, ਵਰਕਸ਼ਾਪਾਂ, ਸੰਗੋਸ਼ਠੀਆਂ, ਫੈਕਲਟੀ ਡਿਵੈਲਪਮੈਂਟ ਪ੍ਰੋਗਰਾਮਾਂ, ਨਿਰੰਤਰ ਸਿੱਖਿਆ ਪ੍ਰੋਗਰਾਮਾਂ ਅਤੇ ਹੋਰ ਅਕਾਦਮਿਕ ਅਤੇ ਖੋਜ ਗਤੀਵਿਧੀਆਂ ਦੇ ਆਯੋਜਨ ਲਈ ਇੱਕ ਸਾਲ ਵਾਸਤੇ 12 ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ।
