ਮਾਨਸਾ, 24 ਸਤੰਬਰ (ਸ.ਰਿ.)- ਦੇਸ਼ਵਾਸੀ ਵਿਦਿਆਰਥੀ ਲੋਕ ਭਲਾਈ ਸੰਗਠਨ ਵਲੋਂ ‘ਸਿੱਧਾ ਕਰਜ਼ਾ’ ਸਕੀਮ ਤਹਿਤ ਸਥਾਨਕ ਜ਼ਿਲ੍ਹਾ ਭਲਾਈ ਦਫ਼ਤਰ ਵਿਖੇ ਜਾਗਰੂਕਤਾ ਕੈਂਪ ਲਗਾਇਆ ਗਿਆ। ਕੈਂਪ ਦੀ ਅਗਵਾਈ ਕਰਦਿਆਂ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਇੰਜ. ਰਾਜਿੰਦਰ ਸਿੰਘ ਮੌੜ ਨੇ ਅਨੁਸੂਚਿਤ ਜਾਤੀਆਂ, ਪਛੜੀਆਂ ਸ਼੍ਰੇਣੀਆਂ ਦੀਆਂ ਸਕੀਮਾਂ ਸੰਬੰਧੀ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਅਨੁਸੂਚਿਤ ਜਾਤੀਆਂ ਤੇ ਪਛੜੀਆਂ ਸ਼੍ਰੇਣੀਆਂ ਦੇ ਪੜ੍ਹੇ-ਲਿਖੇ ਵਿਦਿਆਰਥੀ ਪਿੰਡਾਂ ਦੇ ਗ਼ਰੀਬ ਸਮਾਜ ਦੀਆਂ ਸਕੀਮਾਂ, ਮੁਸ਼ਕਿਲਾਂ ਤੇ ਹੋਰ ਲੋੜਾਂ ਲਈ ਅੱਗੇ ਨਹੀਂ ਆਉਂਦੇ ਉਦੋਂ ਤੱਕ ਸਮਾਜ ਦੀ ਉੱਨਤੀ ਅਤੇ ਤਰੱਕੀ ਸਿਰਫ਼ ਕਾਗ਼ਜ਼ ਤੱਕ ਹੀ ਸੀਮਿਤ ਰਹੇਗੀ, ਜਿਸ ਲਈ ਨੌਜਵਾਨਾਂ ਨੂੰ ਆਉਣ ਵਾਲੀਆਂ ਪੀੜ੍ਹੀਆਂ ਦੀ ਉੱਨਤੀ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਜ਼ਿਲ੍ਹਾ ਭਲਾਈ ਦਫ਼ਤਰ ਦੇ ਮੁਲਾਜ਼ਮਾਂ ਵਲੋਂ ਸਿੱਧਾ ਕਰਜ਼ਾ ਸਕੀਮ, ਬਿਨਾਂ ਗਰੰਟੀ ਸਬਸਿਡੀ ਲੋਨ, ਐਨ.ਐਸ.ਕੇ.ਐਫ. ਸਮੇਤ ਹੋਰ ਸਬਸਿਡੀ ਕਰਜ਼ਿਆਂ ਬਾਰੇ ਜਾਣਕਾਰੀ ਦਿੱਤੀ ਗਈ। ਇਸ ਮੌਕੇ ਅਮਨਦੀਪ ਕੌਰ, ਨਵਦੀਪ ਕੌਰ, ਰਮਨਦੀਪ ਕੌਰ, ਸਮਨਦੀਪ ਕੌਰ, ਸੁਖਪ੍ਰੀਤ ਕੌਰ ਕੱਲ੍ਹੋ, ਰਾਜਵਿੰਦਰ ਕੌਰ, ਰਣਵੀਰ ਕੌਰ ਧਿੰਗੜ, ਬੇਅੰਤ ਕੌਰ ਜੱਸੀ, ਸਿੰਦੂ ਸਿੰਘ ਉੱਡਤ ਆਦਿ ਹਾਜ਼ਰ ਸਨ।
