ਨੂਰਪੁਰ ਬੇਦੀ, 23 ਜਨਵਰੀ (ਹਰਦੀਪ ਸਿੰਘ ਢੀਂਡਸਾ)-ਜੈ ਬਾਬਾ ਬਰਫਾਨੀ ਕਲੱਬ ਅਤੇ ਸਮੂਹ ਪਿੰਡ ਤਖਤਗੜ੍ਹ ਵਲੋਂ ਹਰ ਸਾਲ ਦੀ ਤਰਾਂ ਇਸ ਸਾਲ ਵੀ 15 ਫਰਵਰੀ ਨੂੰ ਮਹਾ ਸ਼ਿਵਰਾਤਰੀ ਦੇ ਪਵਿੱਤਰ ਦਿਹਾੜੇ 'ਤੇ ਅਮਰਨਾਥ ਨੂੰ ਜਾਣ ਸਮੇਂ ਸ਼ਿਵ ਭਗਤਾਂ ਵਲੋਂ ਲਗਾਏ ਲੰਗਰਾਂ ਦੀ ਤਰਜ਼ ਤੇ ਇਸ ਸਾਲ ਵੀ ਮਹਾਂ ਸ਼ਿਵਰਾਤਰੀ ਦੇ ਇਸ ਪਵਿੱਤਰ ਤਿਉਹਾਰ ਤੇ ਜਟੇਸਵਰ ਮਹਾਦੇਵ ਮੰਦਰ ਨੂੰ ਜਾਣ ਅਤੇ ਆਉਣ ਵਾਲੇ ਸ਼ਰਧਾਲੂਆਂ ਲਈ ਪਿੰਡ ਤਖਤਗੜ੍ਹ ਵਿਖੇ ਵਿਸ਼ਾਲ ਲੰਗਰ ਲਗਾਇਆ ਜਾ ਰਿਹਾ ਹੈ | ਜਾਣਕਾਰੀ ਦਿੰਦੇ ਮਹਾਦੇਵ ਸੇਵਕ ਤਨੀਸ ਕੁਮਾਰ ਨੇ ਦੱਸਿਆ ਕਿ ਇਹ ਲੰਗਰ ਵਿਚ ਸ੍ਰੀ ਨਗਰ ਵਿਖੇ ਅਮਰਨਾਥ ਯਾਤਰੀਆਂ ਲਈ ਜਿਸ ਤਰਾਂ ਵਿਸ਼ਾਲ ਲੰਗਰ ਰਸਤੇ ਵਿਚ ਬਾਬਾ ਦੇ ਭਗਤਾਂ ਵਲੋਂ ਲਗਾਏ ਜਾਂਦੇ ਹਨ, ਉਸੀ ਤਰਜ਼ 'ਤੇ ਪ੍ਰਬੰਧਕ ਕਮੇਟੀ ਵਲੋਂ ਜਟੇਸ਼ਵਰ ਮੰਦਿਰ ਨੂੰ ਆਉਣ ਵਾਲੀ ਸੰਗਤ ਲਈ 15 ਫਰਵਰੀ ਨੂੰ ਤਖਤਗੜ੍ਹ 'ਚ ਲਗਾਇਆ ਜਾਵੇਗਾ | ਉਨ੍ਹਾਂ ਨੇ ਦੱਸਿਆ ਕਿ ਇਸ ਵਿਚ ਵੱਖ-ਵੱਖ ਪਕਵਾਨ ਅਕਰਸ਼ਣ ਦੇ ਕੇਂਦਰ ਹੋਣਗੇ ਜੋ ਕਿ ਲੰਗਰ ਸਵੇਰੇ 9 ਵਜੇ ਤੋਂ ਸ਼ੁਰੂ ਹੋ ਜਾਵੇਗਾ | ਉਨ੍ਹਾਂ ਦੱਸਿਆ ਕਿਹਾ ਕਿ 13 ਫਰਵਰੀ ਨੂੰ ਵਿਸ਼ਾਲ ਸੋਭਾ ਯਾਤਰਾ ਕੱਢੀ ਜਾਵੇਗੀ ਤੇ 15 ਫਰਵਰੀ ਨੂੰ ਹਵਨ ਪੂਰਾ ਦਿਨ ਚੱਲੇਗਾ |
