ਹਰਸਾ ਛੀਨਾ, 30 ਜੁਲਾਈ (ਕੜਿਆਲ)-ਬਰਨਾਲਾ ਵਿਖੇ ਆਪਣੀਆਂ ਮੰਗਾਂ ਨੂੰ ਲੈ ਕੇ ਪ੍ਰਦਰਸ਼ਨ ਕਰ ਰਹੇ ਸਫਾਈ ਸੇਵਕਾਂ ਉੱਪਰ ਪੰਜਾਬ ਪੁੁਿਲਸ ਵਲੋਂ ਕੀਤੇ ਲਾਠੀਚਾਰਜ ਦੇ ਵਿਰੋਧ ਵਿਚ ਸਫਾਈ ਸੇਵਕਾਂ ਵਲੋਂ ਪੰਜਾਬ ਬੰਦ ਦੇ ਦਿਤੇ ਸੱਦੇ ਨੂੰ ਬਲਾਕ ਹਰਸਾ ਛੀਨਾ, ਕਸਬਾ ਰਾਜਾਸਾਂਸੀ ਅਤੇ ਆਸ-ਪਾਸ ਦੇ ਖੇਤਰਾਂ ਵਿਚ ਭਰਵਾਂ ਹੁੰਗਾਰਾ ਮਿਲਿਆ। ਅੱਜ ਸਵੇਰ ਤੋਂ ਹੀ ਜਿਥੇ ਵੱਖ ਵੱਖ ਵਪਾਰਕ ਅਦਾਰੇ, ਦੁਕਾਨਾਂ ਅਤੇ ਨਿੱਜੀ ਵਿੱਦਿਅਕ ਅਦਾਰ ਬੰਦ ਰਹੇ ਉਥੇ ਹੀ ਸਿਹਤ ਸੇਵਾਵਾਂ ਪ੍ਰਦਾਨ ਕਰਨ ਵਾਲੇ ਅਦਾਰੇ, ਦੁਕਾਨਾਂ, ਬੈਂਕ, ਸਰਕਾਰੀ ਦਫਤਰ ਆਮ ਦਿਨਾਂ ਵਾਂਗ ਖੁੱਲੇ ਰਹੇ। ਪੰਜਾਬ ਬੰਦ ਦੇ ਦਿੱਤੇ ਸੱਦੇ ਕਾਰਨ ਸੜਕਾਂ ਤੇ ਯਾਤਰੀ ਵਾਹਨ, ਨਿੱਜੀ ਵਾਹਨ ਅਤੇ ਵਪਾਰਕ ਵਾਹਨ ਆਮ ਦਿਨਾਂ ਵਾਂਘ ਚੱਲਦੇ ਨਜਰ ਆਏ। ਅੱਜ ਸਵੇਰ ਤੋਂ ਪੂਰਨ ਤੌਰ ‘ਤੇ ਬੰਦ ਦੁਕਾਨਾਂ ਦੁਪਹਿਰ ਤੋਂ ਬਾਅਦ ਆਮ ਵਾਂਗ ਖੁਲੀਆਂ ਦਿਖਾਈ ਦਿੱਤੀਆਂ। ਇਸਤੋਂ ਇਲਾਵਾ ਅੱਡਾ ਭਲਾ ਪਿੰਡ, ਅੱਡਾ ਦਾਲਮ, ਅੱਡਾ ਵਿਚਲਾ ਕਿਲ੍ਹਾ ਸਮੇਤ ਹੋਰਨਾਂ ਖੇਤਰਾਂ ਵਿਚ ਪੰਜਾਬ ਬੰਦ ਪੂਰੀ ਤਰ੍ਹਾਂ ਸਫਲ ਰਿਹਾ।
