ਪਟਿਆਲਾ, 18 ਅਪ੍ਰੈਲ (ਅ.ਸ. ਆਹਲੂਵਾਲੀਆ)-ਨਗਰ ਨਿਗਮ ਹਦੂਦ ਅੰਦਰ ਥਾਂ-ਥਾਂ 'ਤੇ ਪਏ ਕੂੜੇ-ਕਰਕਟ ਨੂੰ ਚੁੱਕਣ ਲਈ ਜਿੱਥੇ ਨਗਰ ਨਿਗਮ ਮੁਲਾਜ਼ਮ ਸਰਗਰਮ ਹਨ ਉੱਥੇ ਸਮਾਜ ਸੇਵੀ ਸੰਸਥਾਵਾਂ ਵੀ ਕਾਫੀ ਯੋਗਦਾਨ ਪਾ ਰਹੀਆਂ ਹਨ | ਆਲਾ ਦੁਆਲਾ ਸਾਫ਼ ਰੱਖਣ ਵਿਚ ਥਾਂ-ਥਾਂ ਬਣੀਆਂ ਪਾਰਕ ਕਮੇਟੀਆਂ ਵਲੋਂ ਵੀ ਅਹਿਮ ਯੋਗਦਾਨ ਪਾਇਆ ਜਾਂਦਾ ਹੈ | ਦੂਜੇ ਪਾਸੇ ਰਾਜਸੀ ਅਤੇ ਕਈ ਥਾਈ ਧਾਰਮਿਕ ਸਮਾਗਮ ਕਰਕੇ ਪਲਾਸਟਿਕ ਆਦਿ ਦਾ ਕੂੜਾ ਸੁੱਟ ਕੇ ਜਥੇਬੰਦੀਆਂ ਤੇ ਰਾਜਨੀਤਿਕ ਪਾਰਟੀਆਂ ਦੇ ਕਾਰਕੁਨ ਤੁਰਦੇ ਬਣਦੇ ਹਨ | ਜਿਸ ਦੀ ਮਿਸਾਲ ਲੰਘੇ ਦਿਨੀਂ ਭੁਪਿੰਦਰਾ ਰੋਡ 'ਤੇ ਸਥਿਤ ਪਾਰਕ ਦੇ ਆਲੇ-ਦੁਆਲੇ ਦੇਖਣ ਨੂੰ ਮਿਲੀ ਜਿੱਥੇ ਦੂਰ-ਦੂਰ ਤੱਕ ਪਲਾਸਟਿਕ ਦੇ ਗਲਾਸ ਪਲੇਟਾਂ ਆਦਿ ਖਿੱਲਰੇ ਪਏ ਸਨ | ਜਿਸ ਨੂੰ ਵਾਤਾਵਰਣ ਪ੍ਰੇਮੀਆਂ ਨੇ ਬਹੁਤੀ ਚੰਗੀ ਗੱਲ ਨਾ ਕਹਿੰਦਿਆਂ ਪਾਰਟੀ ਆਗੂਆਂ ਨੂੰ ਜ਼ਿੰਮੇਵਾਰ ਰਵੱਈਆ ਅਪਣਾਉਣ ਦੀ ਅਪੀਲ ਕੀਤੀ | ਇੱਥੇ ਪਏ ਕੂੜੇ ਕਰਕਟ ਨੂੰ ਪਾਰਕ ਵਿਚ ਆਉਣ ਵਾਲੇ ਨਾਗਰਿਕਾਂ ਨੇ ਖ਼ੁਦ ਸਾਫ਼ ਅਤੇ ਕਰਵਾਇਆ |
