ਪਟਿਆਲਾ, 27 ਮਈ (ਧਰਮਿੰਦਰ ਸਿੰਘ ਸਿੱਧੂ)-'ਦਾ ਸਟੈਮਫੀਲਡਜ ਇੰਟਰਨੈਸ਼ਨਲ ਸਕੂਲ ਬਲਬੇੜਾ ਵਲੋਂ ਏਐਸਆਈਐਸਸੀ ਜ਼ੋਨਲ ਲਿਟਰੇਰੀ ਕੰਪੀਟੀਸ਼ਨ-2026 ਦਾ ਸਫਲ ਪ੍ਰੋਗਰਾਮ ਸਕੂਲ ਕੈਂਪਸ ਵਿਚ ਕੀਤਾ ਗਿਆ, ਜਿਸ ਵਿਚ ਚੰਡੀਗੜ੍ਹ ਜ਼ੋਨ ਦੇ ਆਈ.ਸੀ.ਐਸ.ਈ. ਨਾਲ ਸੰਬੰਧਿਤ ਵੱਖ-ਵੱਖ ਸਕੂਲਾਂ ਦੇ ਵਿਦਿਆਰਥੀਆਂ ਨੇ ਬੜੇ ਉਤਸ਼ਾਹ ਨਾਲ ਭਾਗ ਲਿਆ | ਕ੍ਰੀਏਟਿਵ ਰਾਈਟਿੰਗ, ਸਟੋਰੀ ਟੇਲਿੰਗ, ਡੈਕਲੇਮੇਸ਼ਨ ਅਤੇ ਕਵਿਤਾ ਲਿਖਣ ਵਰਗੀਆਂ ਪ੍ਰਤੀਯੋਗਤਾਵਾਂ ਨੇ ਵਿਦਿਆਰਥੀਆਂ ਨੂੰ ਆਪਣੀ ਰਚਨਾਤਮਿਕਤਾ, ਆਤਮਵਿਸ਼ਵਾਸ, ਅਭਿਵਿਅਕਤੀ ਅਤੇ ਸੰਚਾਰ ਕੌਸ਼ਲ ਦਿਖਾਉਣ ਲਈ ਸ਼ਾਨਦਾਰ ਮੰਚ ਪ੍ਰਦਾਨ ਕੀਤਾ | ਮੁਕਾਬਲੇ 'ਚ ਜੱਜਾਂ ਦੀ ਨਿਰਪੱਖ ਦੇਖ-ਰੇਖ ਹੇਠ ਸੁਚੱਜੇ ਢੰਗ ਨਾਲ ਕਰਵਾਏ ਗਏ ਅਤੇ ਜੇਤੂ ਵਿਦਿਆਰਥੀਆਂ ਨੂੰ ਸਕੂਲ ਦੇ ਪਿ੍ੰਸੀਪਲ ਮਨਦੀਪ ਕੌਰ ਵਿਰਕ ਵਲੋਂ ਟਰਾਫ਼ੀਆਂ ਅਤੇ ਤਗਮੇ ਦੇ ਕੇ ਸਨਮਾਨਿਤ ਕੀਤਾ ਗਿਆ ਅਤੇ ਕਿਹਾ ਕਿ ਭਵਿੱਖ ਵਿਚ ਵੀ ਸਕੂਲ ਆਈ.ਸੀ.ਐਸ.ਈ. ਦੇ ਵੱਖ-ਵੱਖ ਈਵੈਂਟ ਕਰਵਾਉਂਦਾ ਰਹੇਗਾ | ਇਹ ਵਿਸ਼ਾਲ ਇੰਟਰ-ਸਕੂਲ ਸਾਹਿੱਤਿਕ ਸਮਾਗਮ ਦੀ ਮੇਜ਼ਬਾਨੀ ਕਰਨਾ ਦਾ ਦਾ ਸਟੈਮਫੀਲਡਜ ਇੰਟਰਨੈਸ਼ਨਲ ਸਕੂਲ ਲਈ ਗੌਰਵ ਦੀ ਗੱਲ ਰਹੀ, ਜਿਸ ਨੇ ਸਿੱਖਿਆ, ਪ੍ਰਤਿਭਾ ਅਤੇ ਸਿਹਤਮੰਦ ਮੁਕਾਬਲੇ ਦੀ ਭਾਵਨਾ ਨੂੰ ਹੋਰ ਮਜ਼ਬੂਤ ਕੀਤਾ | ਇਸ ਪ੍ਰਤੀਯੋਗਤਾ ਵਿਚ ਚੰਡੀਗੜ੍ਹ, ਮੋਹਾਲੀ ਅਤੇ ਪਟਿਆਲਾ ਦੇ ਨਾਮੀ ਆਈਸੀਐਸਈ ਸਕੂਲਾਂ ਨੇ ਭਾਗ ਲਿਆ |
