ਜ਼ਿਲੇ੍ਹ ਦੀਆਂ ਨਗਰ ਕੌਂਸਲ ਚੋਣਾਂ 'ਚ ਪਾਰਟੀਆਂ ਦੀ ਕਾਰਗੁਜ਼ਾਰੀ ਦਾ ਹਾਲ
ਅਜੀਤ ਡੈਸਕ
31-05-2026
ਪਾਤੜਾਂ-ਪਾਤੜਾਂ ਦੀਆਂ ਕੁੱਲ 17 ਸੀਟਾਂ ਵਿਚੋਂ ਆਮ ਆਦਮੀ ਪਾਰਟੀ ਦੀ ਝੋਲੀ 10 ਸੀਟਾਂ ਪਈਆਂ | ਕਾਂਗਰਸ ਦੇ ਚਾਰ ਉਮੀਦਵਾਰ ਅਤੇ ਭਾਜਪਾ ਦੇ ਦੋ ਅਤੇ ਇਕ ਆਜ਼ਾਦ ਉਮੀਦਵਾਰ ਨੇ ਜਿੱਤ ਹਾਸਲ ਕਰਕੇ ਆਪੋ ਆਪਣੀ ਪਾਰਟੀ ਦਾ ਮਾਣ ਵਧਾਇਆ | ਜਦੋਂ ਕਿ ਸ਼੍ਰੋਮਣੀ ਅਕਾਲੀ ਦਲ ਦਾ ਇਕ ਵੀ ਉਮੀਦਵਾਰ ਇੱਥੋਂ ਇਕ ਵੀ ਸੀਟ ਹਾਸਲ ਨਹੀਂ ਕਰ ਸਕਿਆ |
ਸਮਾਣਾ-ਜੇਕਰ ਸਮਾਣਾ ਦੀ ਗੱਲ ਕਰੀਏ ਤਾਂ ਕੁੱਲ 21 ਵਿਚੋਂ 13 ਸੀਟਾਂ 'ਤੇ ਸੱਤਾ ਧਿਰ ਜੇਤੂ ਰਹੀ | ਕਾਂਗਰਸ ਦਾ ਪ੍ਰਦਰਸ਼ਨ ਸਭ ਤੋਂ ਮਾੜਾ ਦੇਖਣ ਨੂੰ ਮਿਲਿਆ ਜਿਸ ਕਾਰਨ ਕਾਂਗਰਸ ਦੇ ਆਗੂ ਸ਼ਾਮ ਤੱਕ ਵੋਟਾਂ ਦੇ ਗਿਣਤੀ ਕੇਂਦਰ ਦੇ ਨੇੜੇ ਤੇੜੇ ਨਹੀਂ ਦਿਸੇ | ਭਾਜਪਾ ਦੇ ਦੋ ਉਮੀਦਵਾਰਾਂ ਨੇ ਜਿੱਤ ਹਾਸਲ ਕੀਤੀ ਅਤੇ ਇਕ ਆਜ਼ਾਦ ਉਮੀਦਵਾਰ ਨੇ ਵੀ ਬਾਜੀ ਮਾਰੀ ਜਦੋਂ ਕਿ ਸ਼੍ਰੋਮਣੀ ਅਕਾਲੀ ਦਲ ਦੇ ਪੱਲੇ ਤਿੰਨ ਸੀਟਾਂ ਹੀ ਆਈਆਂ |
ਨਾਭਾ-ਨਾਭਾ ਨਗਰ ਕੌਂਸਲ ਦੀਆਂ 23 ਸੀਟਾਂ ਵਿਚੋਂ 11 'ਤੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਕਾਬਜ਼ ਹੋਏ | ਜਦੋਂ ਕਿ ਕਾਂਗਰਸ ਦੇ ਪੱਲੇ 5, ਭਾਜਪਾ ਦੇ ਹੱਕ ਵਿਚ 3 ਅਤੇ ਆਜ਼ਾਦ ਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਹਿੱਸੇ 2-2 ਸੀਟਾਂ ਆਈਆਂ | ਇਥੇ ਇਹ ਵੀ ਦੱਸਣਯੋਗ ਹੈ ਕਿ ਇਕ ਆਜ਼ਾਦ ਉਮੀਦਵਾਰ ਕੁਝ ਸਮਾਂ ਪਹਿਲਾਂ ਹੀ ਆਮ ਆਦਮੀ ਪਾਰਟੀ ਤੋਂ ਵੱਖਰੇ ਤੌਰ 'ਤੇ ਖੜ ਕੇ ਆਪਣੀ ਕਿਸਮਤ ਅਜ਼ਮਾਈ ਹੈ ਜਦੋਂ ਕਿ ਦੂਜਾ ਆਜ਼ਾਦ ਉਮੀਦਵਾਰ ਵੀ ਆਮ ਆਦਮੀ ਪਾਰਟੀ ਦਾ ਪੁਰਾਣਾ ਮੈਂਬਰ ਦੱਸਿਆ ਜਾ ਰਿਹਾ ਹੈ | ਨਾਭਾ ਵਿਚ ਸ਼੍ਰੋਮਣੀ ਅਕਾਲੀ ਦਲ ਦਾ ਪ੍ਰਦਰਸ਼ਨ ਚੰਗਾ ਨਹੀਂ ਦੇਖਣ ਨੂੰ ਮਿਲਿਆ ਅਤੇ ਇਹ ਲੋਕ ਰਾਏ ਸਾਫ਼ ਕਰ ਗਈ ਹੈ ਕਿ ਅਕਾਲੀ ਦਲ ਦੇ ਆਗੂਆਂ ਨੂੰ ਧਰਾਤਲੀ ਪੱਧਰ 'ਤੇ ਬਹੁਤ ਮਿਹਨਤ ਦੀ ਲੋੜ ਹੈ |
ਰਾਜਪੁਰਾ-ਰਾਜਪੁਰਾ ਵਿਚ ਸੱਤਾ ਧਿਰ ਪਾਰਟੀ ਨੂੰ ਕਾਂਗਰਸ ਅਤੇ ਭਾਜਪਾ ਦੇ ਉਮੀਦਵਾਰਾਂ ਵਲੋਂ ਤਕੜੀ ਟੱਕਰ ਦਿੱਤੀ ਗਈ ਅਤੇ ਬਹੁਤ ਹੀ ਫਸਵਾਂ ਮੁਕਾਬਲਾ ਰਿਹਾ | ਰਾਜਪੁਰਾ ਵਿਚ ਕਾਂਗਰਸ ਅਤੇ ਭਾਜਪਾ ਬਰਾਬਰ 9-9 ਸੀਟਾਂ ਲੈ ਕੇ ਮੋਹਰੀ ਰਹੀਆਂ | ਦੂਜੇ ਪਾਸੇ ਰਾਜਪੁਰਾ ਵਿਖੇ ਵਿਧਾਇਕਾ ਨੀਨਾ ਮਿੱਤਲ ਦੀ ਕਾਰਗੁਜ਼ਾਰੀ 'ਤੇ ਚੋਣਾਂ ਦੇ ਨਤੀਜਿਆਂ ਤੋਂ ਬਾਅਦ ਸਵਾਲ ਉਠਣੇ ਸ਼ੁਰੂ ਹੋ ਗਏ ਹਨ ਕਿਉਂਕਿ ਰਾਜਪੁਰਾ ਵਿਚ ਆਮ ਆਦਮੀ ਪਾਰਟੀ ਦਾ ਸਭ ਤੋਂ ਮਾੜਾ ਨਤੀਜਾ ਰਿਹਾ ਜਿਸ ਵਿਚ ਪਾਰਟੀ ਨੂੰ 31 ਵਿਚੋਂ ਕੇਵਲ 7 ਸੀਟਾਂ ਹੀ ਹਾਸਲ ਹੋਈਆਂ | ਸ਼੍ਰੋਮਣੀ ਅਕਾਲੀ ਦਲ ਦੇ ਹਿੱਸੇ 4 ਸੀਟਾਂ ਆਈਆਂ ਅਤੇ ਦੋ ਆਜ਼ਾਦ ਉਮੀਦਵਾਰਾਂ ਵੀ ਜਿੱਤੇ |
ਬਨੂੜ-ਬਨੂੜ ਵਿਖੇ ਨਗਰ ਕੌਂਸਲ ਦੀਆਂ ਚੋਣਾਂ ਵਿਚ ਕੁੱਲ 13 ਸੀਟਾਂ ਵਿਚੋਂ ਆਮ ਆਦਮੀ ਪਾਰਟੀ ਦੇ ਹਿੱਸੇ 10 ਅਤੇ ਕਾਂਗਰਸ ਦੇ ਹਿੱਸੇ ਤਿੰਨ ਸੀਟਾਂ ਆਈਆਂ | ਬਨੂੜ ਵਿਖੇ ਸ਼੍ਰੋਮਣੀ ਅਕਾਲੀ ਦਲ ਤੇ ਭਾਜਪਾ ਖਾਤਾ ਖੋਲ੍ਹਣ ਵਿਚ ਨਾਕਾਮਯਾਬ ਰਹੀ |
