ਪਟਿਆਲਾ, 18 ਜੂਨ (ਧਰਮਿੰਦਰ ਸਿੰਘ ਸਿੱਧੂ)-2600 ਅਪ੍ਰੈਂਟਸ਼ਿਪ ਯੂਨੀਅਨ ਨੂੰ ਅੱਜ ਬਿਜਲੀ ਨਿਗਮ ਦੇ ਮੁੱਖ ਦਫ਼ਤਰ ਅਤੇ ਪਟਿਆਲਾ-ਸੰਗਰੂਰ ਸੜਕ ’ਤੇ ਬਿਜਲੀ ਟਾਵਰ ’ਤੇ ਧਰਨਾ ਦਿੰਦਿਆਂ ਨੂੰ ਅੱਜ 10 ਦਿਨ ਬੀਤ ਗਏ ਹਨ ਅਤੇ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਨਾਲ ਗੱਲਬਾਤ ਅਤੇ ਮੀਟਿੰਗਾਂ ਦਾ ਦੌਰ ਬੀਤਣ ਮਗਰੋਂ ਵੀ ਹਾਲਾਤ ਜਿਉਂ ਦੇ ਤਿਉਂ ਹਨ। ਬੇਸ਼ੱਕ ਲੰਘੇ ਦਿਨੀਂ ਗਰਮੀ ਕਾਰਨ ਟਾਵਰ ’ਤੇ ਚੜੇ ਦੋ ਨੌਜਵਾਨਾਂ ਨੂੰ ਹੇਠਾਂ ਉਤਾਰ ਲਿਆ ਗਿਆ ਸੀ ਪਰੰਤੂ ਹਾਲੇ ਵੀ 6 ਨੌਜਵਾਨ ਟਾਵਰ ’ਤੇ ਚੜੇ ਹੋਏ ਹਨ। ਜਦੋਂ ਕਿ ਟਾਵਰ ਦੇ ਹੇਠਾਂ ਤਕਰੀਬਨ 50 ਤੋਂ 80 ਨੌਜਵਾਨਾਂ ਵਲੋਂ ਆਪਣਾ ਧਰਨਾ ਜਾਰੀ ਰੱਖਿਆ ਗਿਆ ਹੈ। ਇਨਾਂ ਨੌਜਵਾਨਾਂ ਤਕ ਖਾਣ ਪੀਣ ਦੀਆਂ ਵਸਤਾਂ ’ਤੇ ਪਾਣੀ ਪਹੁੰਚਾਉਣ ਲਈ ਬਾਲਟੀ ਅਤੇ ਰੱਸੀ ਦਾ ਇਸਤੇਮਾਲ ਕੀਤਾ ਜਾਂਦਾ ਹੈ। ਉੱਥੇ ਹੀ ਬਾਥਰੂਮ ਜਾਣ ਲਈ ਦੇਰ ਸ਼ਾਮ ਇਕ-ਇਕ ਨੌਜਵਾਨ ਵਾਰੀ ਸਿਰ ਹੇਠਾਂ ਆ ਕੇ ਦੁਬਾਰਾ ਟਾਵਰ ’ਤੇ ਬੈਠ ਜਾਂਦਾ ਹੈ। ਅਪ੍ਰੈਂਟਸ਼ਿਪ ਯੂਨੀਅਨ ਵਲੋਂ ਆਪਣੇ ਹੌਸਲੇ ਬੁਲੰਦ ਰੱਖਣ ਲਈ ਸ਼ਾਮ ਸਮੇਂ ਰਹਿਰਾਸ ਸਾਹਿਬ ਦਾ ਪਾਠ ਕੀਤਾ ਜਾਂਦਾ ਹੈ। ਉੱਥੇ ਹੀ ਖੁੱਲੇ ਅਸਮਾਨ ਥੱਲੇ ਸ਼ਾਮ ਨੂੰ ਆਪਣੇ ਡੇਰੇ ਜਿਉਂ ਦੇ ਤਿਉਂ ਲਗਾਏ ਜਾਂਦੇ ਹਨ। ਅਪ੍ਰੈਂਟਸ਼ਿਪ ਯੂਨੀਅਨ ਦੀ ਮੀਟਿੰਗ ਬੇਸ਼ੱਕ ਬਿਜਲੀ ਮੰਤਰੀ ਨਾਲ ਹੋ ਚੁੱਕੀ ਹੈ ਅਤੇ ਬਿਜਲੀ ਨਿਗਮ ਦੇ ਸੀ.ਐਮ.ਡੀ. ਵਲੋਂ ਆਉਣ ਵਾਲੇ ਕੱਝ ਦਿਨਾਂ ’ਚ ਨਵੀਆਂ ਅਸਾਮੀਆਂ ਕੱਢਣ ਦੀ ਗੱਲ ਆਖੀ ਗਈ ਹੈ ਪਰੰਤੂ ਯੂਨੀਅਨ ਆਪਣੀਆਂ ਮੰਗਾਂ ਮਨਾ ਕੇ ਹੀ ਧਰਨਾ ਸਮਾਪਤ ਕਰਨਾ ਚਾਹੁੰਦੀ ਹੈ।
