ਰਾਜਪੁਰਾ, 1 ਜੁਲਾਈ (ਰਣਜੀਤ ਸਿੰਘ)-ਰਾਜਪੁਰਾ ਪੁਲਿਸ ਨੇ ਜ਼ਮੀਨੀ ਮਾਮਲੇ ’ਚ ਧੋਖਾਧੜੀ ਕਰਨ ਦੇ ਦੋਸ਼ ’ਚ ਚਾਰ ਵਿਅਕਤੀਆਂ ਦੇ ਖ਼ਿਲਾਫ਼ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਮੁਤਾਬਿਕ ਪੁਲਿਸ ਨੂੰ ਦਿੱਲੀ ਵਾਸੀ ਨੀਰਜ ਠਾਕੁਰ ਨੇ ਸ਼ਿਕਾਇਤ ਦਰਜ ਕਰਵਾਈ ਕਿ ਉਸ ਨੇ ਪਿੰਡ ਮਰਦਾਂਪੁਰ ਨੇੜੇ ਸ਼ੰਭੂ ਘਨੌਰ ਸੜਕ ਦੇ ਨੇੜੇ ਜ਼ਮੀਨ ਦਾ ਸੌਦਾ 55 ਲੱਖ ਵਿਚ ਕੀਤਾ ਸੀ ਅਤੇ ਇਸ ਵਿਚ ਥਾਂ ’ਤੇ ਕੋਠੀ ਵੀ ਬਣੀ ਹੋਈ ਹੈ। ਸ਼ਿਕਾਇਤ ਮੁਤਾਬਿਕ 50 ਲੱਖ ਰੁਪਏ ਚੈੱਕ ਰਾਹੀਂ ਦੇ ਦਿੱਤੇ ਸਨ ਅਤੇ ਰਜਿਸਟਰੀ ਦੀ ਮਿਤੀ 5 ਜੁਲਾਈ 2019 ਦੀ ਤੈਅ ਹੋਈ ਸੀ। ਰਜਿਸਟਰੀ ਦੀ ਮਿਤੀ ਵਾਲੇ ਦਿਨ ਸ਼ਿਕਾਇਤ ਕਰਤਾ ਘਨੌਰ ਵਿਖੇ ਰਜਿਸਟਰੀ ਕਰਵਾਉਣ ਲਈ ਗਏ ਪਰ ਕਥਿਤ ਦੋਸ਼ੀ ਹਾਜ਼ਰ ਨਹੀਂ ਹੋਏ, ਇਸ ਤੋਂ ਬਾਅਦ ਸ਼ਿਕਾਇਤ ਕਰਤਾ ਨੇ ਕਾਨੂੰਨੀ ਨੋਟਿਸ ਵੀ ਦਿੱਤਾ । ਰਜਿਸਟਰੀ ਕਰਵਾਉਣ ਲਈ ਫ਼ੋਨ ਵੀ ਕੀਤੇ ਪਰ ਇਨ੍ਹਾਂ ਨੇ ਰਜਿਸਟਰੀ ਕਰਵਾਉਣ ਤੋਂ ਮਨਾਂ ਕਰ ਦਿੱਤਾ । ਸ਼ਿਕਾਇਤ ਮੁਤਾਬਿਕ ਸ਼ਿਕਾਇਤਕਰਤਾ ਨੂੰ ਧਮਕੀਆਂ ਦਿੱਤੀਆਂ ਗਈਆਂ, ਇਸ ਸ਼ਿਕਾਇਤ ਦੇ ਅਧਾਰ ’ਤੇ ਪੁਲਿਸ ਨੇ ਅਜੈਬ ਸਿੰਘ, ਤਲਜੀਤ ਸਿੰਘ, ਗੁਰਮੀਤ ਸਿੰਘ ਅਤੇ ਕਮਲਜੀਤ ਸਿੰਘ ਦੇ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਅਧੀਨ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
