ਭਾਦਸੋਂ, 22 ਜੁਲਾਈ (ਗੁਰਬਖਸ਼ ਸਿੰਘ ਵੜੈਚ)-ਬਿਜਲੀ ਦਫਤਰ ਭਾਦਸੋਂ ਵਿਖੇ ਬਿਜਲੀ ਕਾਮਿਆ ਵਲੋਂ ਜੁਆਇਟ ਫੋਰਮ ਅਤੇ ਏਕਤਾ ਮੰਚ ਦੇ ਸੱਦੇ ’ਤੇ ਸਬ ਡਵੀਜਨ ਭਾਦਸੋਂ ਦੇ ਗੇਟ ਅੱਗੇ ਭਾਦਸੋ ਸ਼ਮਸਪੁਰ ਅਮਲੋਹ ਟੌਹੜਾ ਦੇ ਬਿਜਲੀ ਕਾਮਿਆਂ ਵਲੋਂ ਇਕੱਠੇ ਹੋ ਕੇ ਸਬ ਡਵੀਜਨ ਭਾਦਸੋਂ ਅੱਗੇ ਹੜਤਾਲ ਕਰਕੇ ਰੋਸ ਧਰਨਾ ਦਿੱਤਾ ਗਿਆ। ਇਸ ਦੌਰਾਨ ਵੱਡੀ ਗਿਣਤੀ ’ਚ ਕਿਸਾਨ ਆਗੂ ਪੈਂਨਸ਼ਨਰ ਅਤੇ ਬਾਕੀ ਬਿਜਲੀ ਮੁਲਾਜਮਾਂ ਨੇ ਸਰਕਾਰ ਖ਼ਿਲਾਫ਼ ਜੰਮ ਕੇ ਨਾਅਰੇਬਾਜੀ ਕੀਤੀ। ਇਸ ਧਰਨੇ ’ਚ ਵੱਖ-ਵੱਖ ਬੁਲਾਰਿਆ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਸਰਕਾਰ ਦੀਆਂ ਮੁਲਾਜਮ ਮਾਰੂ ਨੀਤੀਆਂ ਸਰਕਾਰ ਤੋਂ ਪੁਰਾਣੀ ਪੈਨਸ਼ਨ ਬਹਾਲੀ ਦੀ ਮੰਗ ਕੈਸ਼ਲੈਸ ਕਾਰਡ ਡੀ.ਏ. ਦਾ ਬਕਾਇਆ ਪੇਅ ਸਕੇਲ ਲਾਗੂ ਕਰਨਾ ਆਦਿ ਮੰਗਾਂ ਮੰਨਣ ਲਈ ਕਿਹਾ ਗਿਆ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਸਰਕਾਰ ਅਤੇ ਮਨੇਜਮੈਟ ਵਲੋਂ ਮੁਲਾਜਮਾਂ ਦੀਆਂ ਮੰਗਾਂ ਨੂੰ ਅੱਖੋਂ ਪਰੋਖੇ ਕੀਤਾ ਜਾ ਰਿਹਾ ਹੈ। ਇਸ ਕਾਰਨ ਮੁਲਾਜਮਾਂ ’ਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਮੰਗਾਂ ਨਾ ਮੰਨੀਆਂ ਗਈਆਂ ਤਾਂ ਕਾਮੇ 23 ਅਤੇ 24 ਜੁਲਾਈ ਨੂੰ ਸਮੂਹਿਕ ਛੁੱਟੀ ਲੈ ਕੇ ਸਰਕਾਰ ਖ਼ਿਲਾਫ਼ ਰੋਸ ਪ੍ਰਦਰਸ਼ਨ ਕੀਤਾ ਜਾਵੇਗਾ। ਉਨਾਂ ਕਿਹਾ ਕਿ ਇਸ ਹੜਤਾਲ ਨੂੰ ਅੱਗੇ ਵਧਾਉਣ ’ਚ ਵੀ ਗੁਰੇਜ ਨਹੀਂ ਕੀਤਾ ਜਾਵੇਗਾ। ਇਸ ਮੌਕੇ ਗੁਰਜੰਟ ਸਿੰਘ ਰਾਜਗੜ ਜਥੇਬੰਦਕ ਸਕੱਤਰ ਪੰਜਾਬ, ਬਲਵਿੰਦਰ ਸਿੰਘ ਰਾਮਗੜ, ਦਲੀਪ ਸਿੰਘ ਗਿੱਲ ਪ੍ਰਧਾਨ ਏਟਕ, ਫਰੋਜ ਖਾਨ ਪ੍ਰਧਾਨ ਸਬ ਡੀਵਜਨ ਭਾਦਸੋ, ਬਲਜਿੰਦਰ ਸਿੰਘ ਸਿੱਧੂ ਸਰਕਲ ਆਗੂ, ਰਾਜਦੀਪ ਸਿੰਘ ਸਰਾਓ, ਜਗਮੋਹਣ ਸਿੰਘ, ਕਮਲਜੀਤ ਖਾਨ ਮੱਲੇਵਾਲ, ਅਮਰਜੀਤ ਸਿੰਘ, ਸੰਜੀਵ ਕੁਮਾਰ, ਬਿਕਰਮਜੀਤ ਸਿੰਘ, ਪਰਵੀਨ ਕੁਮਾਰ, ਅਜਮੀਲ ਖਾ, ਗੁਰਮੀਤ ਸਿੰਘ ਨਾਭਾ, ਸੋਹਣ ਅਗੋਲ, ਮੇਵਾ ਸਿੰਘ ਆਦਿ ਹਾਜਰ ਸਨ।
