ਸਾਦਿਕ, 25 ਫ਼ਰਵਰੀ (ਆਰ. ਐਸ. ਧੁੰਨਾ)-ਸਾਦਿਕ ਤੋਂ ਇਤਿਹਾਸਕ ਗੁਰਦੁਆਰਾ ਜੰਡ ਸਾਹਿਬ ਨੂੰ ਜਾਣ ਵਾਲੀ ਸੜਕ ਜੋ ਕਈ ਥਾਵਾਂ ਤੋਂ ਟੁੱਟੀ ਹੋਣ ਕਰਕੇ ਉਸ ਤੇ ਕਾਫ਼ੀ ਸਮੇਂ ਤੋਂ ਪੱਥਰ ਪਾਇਆ ਹੋਇਆ ਹੈ, ਜਿਸ ਕਰਕੇ ਇੱਕੋਂ ਲੰਘਣ ਵਾਲਿਆਂ ਨੂੰ ਭਾਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਤੇ ਉੱਡਦੀ ਧੂੜ ਮਿੱਟੀ ਕਾਰਨ ਆਮ ਲੋਕ ਵੀ ਪ੍ਰੇਸ਼ਾਨ ਹੋ ਰਹੇ ਹਨ | ਇਹ ਸੜਕ ਜੋ ਪਿੰਡ ਘੁੱਦੂਵਾਲਾ, ਭਾਗ ਸਿੰਘ ਵਾਲਾ, ਮਰਾੜ੍ਹ ਆਦਿ ਵਿਚ ਦੀ ਹੁੰਦੀ ਹੋਈ, ਇਤਿਹਾਸਕ ਗੁਰਦੁਆਰਾ ਜੰਡ ਸਾਹਿਬ ਤੱਕ ਜਾਂਦੀ ਹੈ ਤੇ ਅੱਗੋਂ ਹੋਰਨਾਂ ਪਿੰਡਾਂ ਵਿਚ ਦੀ ਲੰਘਦੀ ਮੰਡੀ ਗੁਰੂਹਰਸਹਾਏ ਪਹੁੰਚਦੀ ਹੈ | ਇਸ ਸੜਕ 'ਤੇ ਗੁਰਦੁਆਰਾ ਸਾਹਿਬ ਦੇ ਨਾਲ ਨਾਲ ਕਰੀਬ ਪੰਜ ਸਕੂਲ (ਸਰਕਾਰੀ/ਗੈਰ ਸਰਕਾਰੀ), ਨਵਾਂ ਬਣਿਆ ਮਿ੍ਤਕ ਦੇਹ ਸੰਭਾਲ ਘਰ ਤੇ ਇਕ ਵਾਟਰ ਵਰਕਸ ਪੈਂਦਾ ਹੈ | ਸਕੂਲਾਂ ਵਿਚ ਆਉਣ ਜਾਣ ਲਈ ਸਕੂਲੀ ਵੈਨਾਂ ਅਤੇ ਬੱਚਿਆਂ ਨੂੰ ਵੀ ਇਸ ਰਸਤੇ ਤੋਂ ਗੁਜ਼ਰਨਾ ਔਖਾ ਹੋ ਜਾਂਦਾ ਹੈ | ਪਿੰਡ ਵਾਸੀਆਂ ਦੀ ਪ੍ਰਸ਼ਾਸਨ ਤੋਂ ਮੰਗ ਹੈ ਕਿ ਲੋਕਾਂ ਦੀ ਇਸ ਵੱਡੀ ਮੁਸ਼ਕਿਲ ਵੱਲ ਫੌਰੀ ਧਿਆਨ ਦੇ ਕੇ ਇਸ ਸੜਕ 'ਤੇ ਪਾਏ ਗਏ ਪੱਥਰ 'ਤੇ ਪ੍ਰੀਮਿਕਸ ਪਾਇਆ ਜਾਵੇ ਤਾਂ ਜੋ ਇੱਥੋਂ ਲੰਘਣ ਵਾਲੇ ਲੋਕ ਕਿਸੇ ਹਾਦਸੇ ਤੋਂ ਬਚ ਸਕਣ |
