ਪਾਕਿ ਚੀਨ ਤੋਂ ਖ਼ਰੀਦ ਰਿਹਾ 80 ਫ਼ੀਸਦੀ ਹਥਿਆਰ : ਸਿਪ੍ਰੀ ਰਿਪੋਰਟ

ਆਪਣੀਆਂ ਪ੍ਰਮਾਣੂ ਅਤੇ ਰਵਾਇਤੀ ਫ਼ੌਜੀ ਸਮਰਥਾਵਾਂ ਦਾ ਲਗਾਤਾਰ ਕਰ ਰਿਹਾ ਵਿਸਥਾਰ
ਅੰਮਿ੍ਤਸਰ, 10 ਮਾਰਚ (ਸੁਰਿੰਦਰ ਕੋਛੜ)-ਸਟਾਕਹੋਮ ਇੰਟਰਨੈਸ਼ਨਲ ਪੀਸ ਰਿਸਰਚ ਇੰਸਟੀਚਿਊਟ (ਐੱਸ. ਆਈ. ਪੀ. ਆਰ. ਆਈ./ਸਿਪ੍ਰੀ) ਵਲੋਂ ਜਾਰੀ ਰਿਪੋਰਟ 'ਚ ਦੱਸਿਆ ਗਿਆ ਹੈ ਕਿ ਪਾਕਿਸਤਾਨ ਆਪਣੇ 80 ਫ਼ੀਸਦੀ ਹਥਿਆਰ ਚੀਨ ਤੋਂ ਖ਼ਰੀਦਦਾ ਹੈ | ਸਿਪ੍ਰੀ ਇਕ ਸੁਤੰਤਰ ਕੌਮਾਂਤਰੀ ਸੰਗਠਨ ਹੈ ਜੋ ਮੁੱਖ ਤੌਰ 'ਤੇ ਹਥਿਆਰਾਂ, ਯੁੱਧ, ਫ਼ੌਜੀ ਖ਼ਰਚ ਅਤੇ ਸ਼ਾਂਤੀ ਨਾਲ ਸੰਬੰਧਿਤ ਮੁੱਦਿਆਂ 'ਤੇ ਖੋਜ ਅਤੇ ਵਿਸ਼ਲੇਸ਼ਣ ਕਰਦਾ ਹੈ | ਇਹ ਦੁਨੀਆ ਭਰ 'ਚ ਹਥਿਆਰਾਂ ਦੇ ਵਪਾਰ, ਫ਼ੌਜੀ ਬਜਟ ਅਤੇ ਪ੍ਰਮਾਣੂ ਹਥਿਆਰਾਂ ਦੀ ਸਥਿਤੀ 'ਤੇ ਡੇਟਾ ਅਤੇ ਸਾਲਾਨਾ ਰਿਪੋਰਟਾਂ ਜਾਰੀ ਕਰਦਾ ਹੈ | ਸਿਪ੍ਰੀ ਦੀ ਤਾਜ਼ਾ ਰਿਪੋਰਟ ਸਾਲ 2025 'ਚ ਦੁਨੀਆ ਭਰ 'ਚ ਹੋਏ ਹਥਿਆਰਾਂ ਦੇ ਸੌਦਿਆਂ 'ਤੇ ਕੇਂਦਿ੍ਤ ਹੈ | ਰਿਪੋਰਟ ਤੋਂ ਪਤਾ ਚੱਲਦਾ ਹੈ ਕਿ ਪਾਕਿ ਆਪਣੀਆਂ ਪ੍ਰਮਾਣੂ ਅਤੇ ਰਵਾਇਤੀ ਫ਼ੌਜੀ ਸਮਰਥਾਵਾਂ ਦਾ ਲਗਾਤਾਰ ਵਿਸਥਾਰ ਕਰ ਰਿਹਾ ਹੈ ਅਤੇ ਆਪਣੀ ਫ਼ੌਜ ਨੂੰ ਆਧੁਨਿਕ ਬਣਾਉਣਾ ਜਾਰੀ ਰੱਖ ਰਿਹਾ ਹੈ | ਇਸ ਰਿਪੋਰਟ ਤੋਂ ਇਹ ਵੀ ਪਤਾ ਚੱਲਦਾ ਹੈ ਕਿ ਯੂਕਰੇਨ ਯੁੱਧ ਤੋਂ ਡਰੇ ਹੋਏ ਯੂਰਪੀਅਨ ਦੇਸ਼ਾਂ ਨੇ ਆਪਣੀਆਂ ਹਥਿਆਰਾਂ ਦੀ ਖ਼ਰੀਦ 'ਚ ਕਾਫ਼ੀ ਵਾਧਾ ਕੀਤਾ ਹੈ | 2011-15 ਦੇ ਮੁਕਾਬਲੇ 2021-25 ਦੇ ਵਿਚਕਾਰ ਯੂਰਪੀਅਨ ਦੇਸ਼ਾਂ ਦੀ ਹਥਿਆਰਾਂ ਦੀ ਖ਼ਰੀਦ 'ਚ 210 ਫ਼ੀਸਦੀ ਦਾ ਵਾਧਾ ਹੋਇਆ ਹੈ | ਸਿਪ੍ਰੀ ਰਿਪੋਰਟ ਅਨੁਸਾਰ ਪਾਕਿ ਅੰਨ੍ਹੇਵਾਹ ਚੀਨੀ ਹਥਿਆਰ ਖ਼ਰੀਦ ਰਿਹਾ ਹੈ | ਇਸ ਦਾ ਮਤਲਬ ਇਹ ਵੀ ਹੈ ਕਿ ਕੋਈ ਹੋਰ ਦੇਸ਼ ਉਸ ਨੂੰ ਹਥਿਆਰ ਸਪਲਾਈ ਨਹੀਂ ਕਰ ਰਿਹਾ ਹੈ | ਪਾਕਿਸਤਾਨ ਹਥਿਆਰਾਂ ਦੀ ਖ਼ਰੀਦ 'ਚ ਪੰਜਵੇਂ ਸਥਾਨ 'ਤੇ ਹੈ ਅਤੇ 2016-20 ਦੇ ਮੁਕਾਬਲੇ 2021-25 ਦੌਰਾਨ ਪਾਕਿ ਦੇ ਹਥਿਆਰਾਂ ਦੇ ਆਯਾਤ 'ਚ 66 ਫ਼ੀਸਦੀ ਦਾ ਵਾਧਾ ਹੋਇਆ ਹੈ | ਪਾਕਿਸਤਾਨ ਹੁਣ ਦੁਨੀਆ ਦੇ ਸਭ ਤੋਂ ਵੱਧ ਹਥਿਆਰ ਖ਼ਰੀਦਣ ਵਾਲੇ ਚੋਟੀ ਦੇ ਪੰਜ ਦੇਸ਼ਾਂ 'ਚੋਂ ਇਕ ਹੈ |