ਚੀਨ ਨੇ ਪਾਕਿ ਨੂੰ 2050 ਕਰੋੜ ਰੁਪਏ ਦੇ ਬਿੱਲ ਦਾ ਭੁਗਤਾਨ ਨਾ ਕਰਨ 'ਤੇ ਦਿੱਤੀ ਸਖ਼ਤ ਚਿਤਾਵਨੀ <br/>

ਸੁਰਿੰਦਰ ਕੋਛੜ
ਅੰਮਿ੍ਤਸਰ, 2 ਅਪ੍ਰੈਲ-ਦੀਵਾਲੀਆਪਨ ਦੇ ਕੰਢੇ 'ਤੇ ਖੜ੍ਹੇ ਪਾਕਿਸਤਾਨ ਨੂੰ ਉਸ ਦੇ ਸਭ ਤੋਂ ਨੇੜਲੇ 'ਦੋਸਤ ਦੇਸ਼' ਚੀਨ ਨੇ ਸਖ਼ਤ ਚਿਤਾਵਨੀ ਦਿੱਤੀ ਹੈ | ਇਹ ਮੁੱਦਾ ਲਗਭਗ 2050 ਕਰੋੜ ਰੁਪਏ ਦੇ ਬਕਾਇਆ ਬਿਜਲੀ ਅਤੇ ਗੈਸ ਬਿੱਲਾਂ ਨਾਲ ਸੰਬੰਧਿਤ ਹੈ | ਇਹ ਭੁਗਤਾਨ ਕਰਨ 'ਚ ਅਸਫਲ ਰਹਿਣ 'ਤੇ ਚੀਨ ਨੇ ਸਿੱਧੇ ਤੌਰ 'ਤੇ ਪਾਕਿਸਤਾਨ ਨੂੰ ਗੰਭੀਰ ਨਤੀਜਿਆਂ ਅਤੇ ਵਿਦੇਸ਼ੀ ਨਿਵੇਸ਼ ਨੂੰ ਰੋਕਣ ਦੀ ਧਮਕੀ ਦਿੱਤੀ ਹੈ | ਚੀਨ ਨੇ ਪਾਕਿ ਨੂੰ ਸਖ਼ਤ ਚਿਤਾਵਨੀ ਜਾਰੀ ਕਰਦਿਆਂ ਕਿਹਾ ਹੈ ਕਿ ਯੂਨਾਈਟਿਡ ਐਨਰਜੀ ਪਾਕਿਸਤਾਨ (ਯੂ.ਈ.ਪੀ.) ਨੂੰ ਬਕਾਇਆ ਬਿੱਲ ਤੁਰੰਤ ਅਦਾ ਕੀਤਾ ਜਾਵੇ | ਚੀਨ ਦਾ ਕਹਿਣਾ ਹੈ ਕਿ ਭੁਗਤਾਨ 'ਚ ਇਹ ਦੇਰੀ ਨਾ ਸਿਰਫ਼ ਕੌਮਾਂਤਰੀ ਨਿਵੇਸ਼ਕਾਂ ਦੇ ਵਿਸ਼ਵਾਸ ਨੂੰ ਘਟਾਏਗੀ ਬਲਕਿ ਭਵਿੱਖ 'ਚ ਨਿਵੇਸ਼ ਨੂੰ ਵੀ ਰੋਕ ਸਕਦੀ ਹੈ | ਦੱਸਣਯੋਗ ਹੈ ਕਿ ਯੂ. ਈ. ਪੀ. ਪਾਕਿਸਤਾਨ ਦੀ ਸਭ ਤੋਂ ਵੱਡੀ ਚੀਨੀ ਤੇਲ ਅਤੇ ਗੈਸ ਕੰਪਨੀ ਹੈ | ਸਾਲ 2011 'ਚ ਇਸ ਨੇ ਬਿ੍ਟਿਸ਼ ਪੈਟਰੋਲੀਅਮ ਦੀਆਂ ਜਾਇਦਾਦਾਂ ਹਾਸਲ ਕੀਤੀਆਂ | ਇਸ ਤੋਂ ਬਾਅਦ ਇਸ ਨੂੰ ਸਾਲ 2012 'ਚ ਚਾਈਨਾ ਡਿਵੈੱਲਪਮੈਂਟ ਬੈਂਕ ਤੋਂ 5 ਅਰਬ ਡਾਲਰ ਦੀ ਵੱਡੀ ਕ੍ਰੈਡਿਟ ਲਾਈਨ ਪ੍ਰਾਪਤ ਹੋਈ | ਇਸ ਸਹਾਇਤਾ ਨਾਲ ਕੰਪਨੀ ਪਾਕਿ 'ਚ ਆਪਣੇ ਕਾਰਜਾਂ ਦਾ ਵਿਸਥਾਰ ਕਰਨ ਦੇ ਯੋਗ ਹੋ ਗਈ | ਸਾਲ 2019 ਤੱਕ ਯੂ. ਈ. ਪੀ. ਪਾਕਿ ਦਾ ਨੌਵਾਂ ਸਭ ਤੋਂ ਵੱਡਾ ਬਰਾਮਦਕਾਰ ਬਣ ਗਈ, ਜਿਸ ਦੀ ਕੁੱਲ ਬਰਾਮਦ ਲਗਭਗ 22.7 ਕਰੋੜ ਡਾਲਰ ਸੀ | ਪਾਕਿਸਤਾਨੀ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ ਬੀਜਿੰਗ 'ਚ ਪਾਕਿਸਤਾਨੀ ਰਾਜਦੂਤ ਨੇ ਆਪਣੀ ਸਰਕਾਰ ਨੂੰ ਇਕ ਜ਼ਰੂਰੀ ਨੋਟ ਭੇਜਿਆ ਹੈ | ਜਿਸ 'ਚ ਸਪੱਸ਼ਟ ਤੌਰ 'ਤੇ ਕਿਹਾ ਗਿਆ ਹੈ ਕਿ ਜੇਕਰ ਪੈਸੇ ਨਹੀਂ ਮਿਲਦੇ ਤਾਂ ਕੰਪਨੀ ਦੇ ਕੰਮਕਾਜ ਨੂੰ ਰੋਕਿਆ ਜਾ ਸਕਦਾ ਹੈ | ਇਹ ਸਥਿਤੀ ਸਿੱਧੇ ਤੌਰ 'ਤੇ ਪਾਕਿ ਦੀ ਊਰਜਾ ਸਪਲਾਈ 'ਤੇ ਪ੍ਰਭਾਵ ਪਾਵੇਗੀ |