ਨਵੀਂ ਦਿੱਲੀ, 10 ਅਪ੍ਰੈਲ (ਉਪਮਾ ਡਾਗਾ ਪਾਰਥ)-ਸੂਬਾਈ ਸਿਆਸਤ ਤੋਂ ਰਾਸ਼ਟਰੀ ਸਿਆਸਤ ਵੱਲ ਤਬਦੀਲ ਹੋਏ ਬਿਹਾਰ ਦੇ ਮੁੱਖ ਮੰਤਰੀ ਨਿਤਿਸ਼ ਕੁਮਾਰ ਨੇ ਸ਼ੁੱਕਰਵਾਰ ਨੂੰ ਰਸਮੀ ਤੌਰ 'ਤੇ ਇਸ ਦੀ ਮੋਹਰ ਲਾਉਂਦਿਆਂ ਰਾਜ ਸਭਾ ਮੈਂਬਰ ਵਜੋਂ ਸਹੁੰ ਚੁੱਕ ਲਈ | ਨਿਤਿਸ਼ ਦੇ ਨਾਲ ਹੀ ਕਿਸੇ ਵੇਲੇ ਉਨ੍ਹਾਂ ਦੇ ਕਰੀਬੀ ਰਹੇ ਰਾਜ ਸਭਾ ਦੇ ਚੇਅਰਮੈਨ ਹਰੀਵੰਸ਼ ਨੂੰ ਮੁੜ ਤੋਂ ਉਪਰਲੇ ਸਦਨ ਦੀ ਮੈਂਬਰੀ ਮਿਲ ਗਈ | ਹਾਲਾਂਕਿ ਇਸ ਵਾਰ ਉਨ੍ਹਾਂ ਨੂੰ ਜਨਤਾ ਦਲ (ਯੂ) ਨੇ ਰਾਜ ਸਭਾ ਨਹੀਂ ਭੇਜਿਆ ਸਗੋਂ ਉਹ ਨਾਮਜ਼ਦ ਮੈਂਬਰ ਵਜੋਂ ਰਾਜ ਸਭਾ ਦੇ ਮੈਂਬਰ ਬਣੇ ਹਨ | ਰਾਸ਼ਟਰਪਤੀ ਵਲੋਂ ਰਾਜ ਸਭਾ ਲਈ ਕੁੱਲ 12 ਮੈਂਬਰ ਨਾਮਜ਼ਦ ਕੀਤੇ ਜਾਂਦੇ ਹਨ ਜਿਨ੍ਹਾਂ ਨੂੰ ਵੱਖ-ਵੱਖ ਖੇਤਰਾਂ 'ਚ ਉਨ੍ਹਾਂ ਦੇ ਯੋਗਦਾਨ ਦੇ ਆਧਾਰ 'ਤੇ ਚੁਣਿਆ ਜਾਂਦਾ ਹੈ | ਹਰੀਵੰਸ਼ ਨੂੰ ਹਾਲ 'ਚ ਸੇਵਾਮੁਕਤ ਹੋਏ ਸਾਬਕਾ ਚੀਫ਼ ਜਸਟਿਸ ਰੰਜਨ ਗੋਗੋਈ ਦੀ ਥਾਂ 'ਤੇ ਨਾਮਜ਼ਦ ਕੀਤਾ ਗਿਆ | ਇਸ ਸਬੰਧ 'ਚ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਵਲੋਂ ਜਾਰੀ ਨੋਟੀਫਿਕੇਸ਼ਨ 'ਚ ਕਿਹਾ ਗਿਆ ਕਿ ਇਕ ਨਾਮਜ਼ਦ ਸੰਸਦ ਮੈਂਬਰ ਦੀ ਸੇਵਾਮੁਕਤੀ ਤੋਂ ਬਾਅਦ ਜੋ ਥਾਂ ਖਾਲੀ ਹੋਈ ਹੈ, ਉਸ ਦੀ ਥਾਂ 'ਤੇ ਹਰੀਵੰਸ਼ ਨੂੰ ਮੌਕਾ ਦਿੱਤਾ ਗਿਆ ਹੈੇ |
