ਰੂਪਨਗਰ, 25 ਅਪ੍ਰੈਲ (ਸਤਨਾਮ ਸਿੰਘ ਸੱਤੀ)-ਜ਼ੈਨਪਲੱਸ ਪ੍ਰਾਈਵੇਟ ਲਿਮਟਿਡ ਵਲੋਂ ਚਲਾਈ ਜਾ ਰਹੀ ਪੰਜਾਬ ਦੀ 108 ਐਂਬੂਲੈਂਸ ਸੇਵਾ ਨੇ ਅਪ੍ਰੈਲ 2025 ਤੋਂ ਮਾਰਚ 2026 ਤੱਕ 1,93,698 ਐਮਰਜੈਂਸੀ ਮਾਮਲਿਆਂ ਨੂੰ ਸੰਭਾਲ ਕੇ ਰਾਜ ਵਿਚ ਤੁਰੰਤ ਡਾਕਟਰੀ ਸਹਾਇਤਾ ਮੁਹੱਈਆ ਕਰਵਾਈ ਹੈ | ਇਨ੍ਹਾਂ ਵਿਚ 74,570 ਮੈਡੀਕਲ ਐਮਰਜੈਂਸੀਆਂ, 50,993 ਗਰਭ ਅਵਸਥਾ ਸਬੰਧੀ ਕੇਸ, 26,908 ਸੜਕ ਹਾਦਸੇ ਅਤੇ 21,881 ਦਿਲ ਦੀਆਂ ਐਮਰਜੈਂਸੀਆਂ ਸ਼ਾਮਿਲ ਹਨ | ਇਸ ਤੋਂ ਇਲਾਵਾ ਹੋਰ 19,346 ਮਾਮਲਿਆਂ ਵਿਚ ਵੀ ਸੇਵਾ ਨੇ ਤੁਰੰਤ ਸਹਾਇਤਾ ਦਿੱਤੀ | ਜ਼ਿਲ੍ਹਾ ਪੱਧਰ 'ਤੇ ਲੁਧਿਆਣਾ ਵਿਚ ਸਭ ਤੋਂ ਵੱਧ 26,429 ਕੇਸ ਦਰਜ ਹੋਏ | ਇਸ ਤੋਂ ਬਾਅਦ ਜਲੰਧਰ (16,809), ਐਸ.ਏ.ਐਸ. ਨਗਰ (16,284), ਅੰਮਿ੍ਤਸਰ (14,964) ਅਤੇ ਪਟਿਆਲਾ (14,793) ਦਰਜ ਹੋਏ | ਪ੍ਰਾਜੈਕਟ ਹੈੱਡ ਮਨੀਸ਼ ਬੱਤਰਾ ਨੇ ਕਿਹਾ ਕਿ 108 ਸੇਵਾ ਪੰਜਾਬ ਭਰ ਵਿਚ ਤੇਜ਼, ਭਰੋਸੇਮੰਦ ਅਤੇ ਪੇਸ਼ੇਵਾਰ ਐਮਰਜੈਂਸੀ ਦੇਖਭਾਲ ਦੇਣ ਲਈ ਵਚਨਬੱਧ ਹੈ |
