ਬੌਣੇ ਰੋਗ ਦੇ ਵਧਦੇ ਪ੍ਰਕੋਪ ਨੇ ਕਿਸਾਨਾਂ ਨੂੰ ਭੰਬਲਭੂਸੇ 'ਚ ਪਾਇਆ

ਪਟਿਆਲਾ, 5 ਮਈ (ਗੁਰਪ੍ਰੀਤ ਸਿੰਘ ਚੱਠਾ)-ਝੋਨੇ ਦੇ ਪਿਛਲੇ ਦੋ ਸੀਜ਼ਨਾਂ ਤੋਂ ਬੌਣੇ ਰੋਗ ਦੇ ਵਧ ਰਹੇ ਪ੍ਰਕੋਪ ਨੇ ਇਸ ਸੀਜ਼ਨ 'ਚ ਝੋਨੇ ਦੀ ਪਨੀਰੀ ਬੀਜਣ ਮੌਕੇ ਕਿਸਾਨਾਂ ਨੂੰ ਭੰਬਲਭੂਸੇ ਵਿਚ ਪਾ ਦਿੱਤਾ | ਪਿਛਲੇ ਦੋ ਸਾਲ ਪਹਿਲਾਂ ਸ਼ੁਰੂ ਹੋਏ ਰੋਗ ਦੀ ਮਾਰ ਪਿਛਲੇ ਸਾਲ ਹੋਰ ਵੀ ਵਧ ਗਈ ਸੀ | ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵਲੋਂ ਇਸ ਦੀ ਪਛਾਣ ਸਦਰਨ ਰਾਈਸ ਬਲੈਕ ਸਟਰੀਕਡ ਡਵਾਰਫ ਵਾਇਰਸ ਵਜੋਂ ਕੀਤੀ ਹੈ | ਇਸ ਰੋਗ ਕਾਰਨ ਕਈ ਖੇਤਾਂ ਦਾ ਝਾੜ ਬਿਲਕੁਲ ਜ਼ੀਰੋ ਹੋ ਗਿਆ ਸੀ | ਇਸ ਸੰਬੰਧੀ ਫ਼ੋਨ 'ਤੇ ਗੱਲ ਕਰਦਿਆਂ ਦਾਰਾ ਸਿੰਘ ਜ਼ਿਲ੍ਹਾ ਖੇਤੀਬਾੜੀ ਅਫ਼ਸਰ ਨੇ ਕਿਹਾ ਕਿ ਕਿਸਾਨਾਂ ਲਈ ਇਸ ਰੋਗ ਨੂੰ ਲੈ ਕੇ ਸਲਾਹ ਦਿੱਤੀ ਗਈ ਹੈ ਜਿਸ ਤਹਿਤ ਉਹ ਪਹਿਲਾਂ ਆਪਣੇ ਖ਼ਾਲੀ ਖੇਤ ਦੇ ਦੁਆਲੇ ਨਦੀਣ ਸਾਫ਼ ਕਰਨ ਨਾਲ ਹੀ ਪਨੀਰੀ ਤੇ ਜਾਂ ਫ਼ਸਲ 'ਤੇ ਲਗਾਤਾਰ ਨਜ਼ਰ ਰੱਖੀ ਜਾਵੇ | ਜੇਕਰ ਰੋਗ ਦਾ ਕੋਈ ਲੱਛਣ ਨਜ਼ਰ ਆਏ ਤਾਂ ਕੀਟਨਾਸ਼ਕ ਦੀ ਸਪਰੇਅ ਕਰੋ | ਆਲ ਇੰਡੀਆ ਫਾਰਮਰਜ਼ ਐਸੋਸੀਏਸ਼ਨ ਦੇ ਕੌਮੀ ਪ੍ਰਧਾਨ ਸਤਨਾਮ ਸਿੰਘ ਬਹਿਰੂ ਨੇ ਕਿਹਾ ਕਿ ਇਹ ਖੇਤੀਬਾੜੀ ਵਿਭਾਗ ਤੇ ਯੂਨੀਵਰਸਿਟੀ ਦੀਆਂ ਘਾਟਾਂ ਦਾ ਵੀ ਨਤੀਜਾ ਹੈ ਕਿਉਂਕਿ ਨਾ ਹੀ ਲੋੜੀਂਦੀਆਂ ਖੋਜਾਂ ਤੇ ਤਜਰਬੇ ਹੁੰਦੇ ਹਨ ਤੇ ਨਾ ਹੀ ਕਿਸਾਨਾਂ ਨੂੰ ਬਚਾਅ ਅਤੇ ਪ੍ਰਫੁੱਲਤਾ ਲਈ ਲੋੜੀਂਦਾ ਜਾਣੰੂ ਕਰਵਾਇਆ ਜਾਂਦਾ |