ਉ ੱਘੇ ਰਾਜ ਗੀਤਕਾਰ ਚੰਨ ਗੁਰਾਇਆ ਵਾਲੇ ਦਾ ਦਿਹਾਂਤ

ਅੰਤਿਮ ਸੰਸਕਾਰ ਗੁਰਾਇਆ 'ਚ ਅੱਜ 2 ਵਜੇ
ਫਿਲੌਰ/ਗੁਰਾਇਆ, 5 ਮਈ (ਸਤਿੰਦਰ ਸ਼ਰਮਾ, ਬਲਵਿੰਦਰ ਸਿੰਘ)-ਪੰਜਾਬੀ ਸਾਹਿਤ ਤੇ ਗੀਤ-ਸੰਗੀਤ ਜਗਤ ਨੂੰ ਅੱਜ ਉਸ ਵੇਲੇ ਵੱਡਾ ਝਟਕਾ ਲੱਗਿਆ ਜਦੋਂ ਇਹ ਪਤਾ ਲੱਗਾ ਕਿ ਉੱਘੇ ਪੰਜਾਬੀ ਰਾਜ ਗੀਤਕਾਰ ਚੰਨ ਗੁਰਾਇਆ ਵਾਲੇ ਦਾ ਦਿਹਾਂਤ ਹੋ ਗਿਆ | ਉਹ 97 ਵਰਿ੍ਹਆਂ ਦੇ ਸਨ, ਉਨ੍ਹਾਂ ਦੀ ਮੌਤ ਦਿਲ ਦਾ ਦੌਰਾ ਪੈਣ ਕਾਰਨ ਹੋਈ | ਪੰਜਾਬੀ ਗੀਤਾਂ ਦੀਆਂ ਖੂਬਸੂਰਤ ਰਚਨਾਵਾਂ ਸਦਕਾ ਪੰਜਾਬ ਸਰਕਾਰ ਨੇ 'ਚੰਨ' ਹੋਰਾਂ ਨੂੰ ਰਾਜ ਗੀਤਕਾਰ ਦਾ ਐਵਾਰਡ ਦੇ ਕੇ ਨਿਵਾਜਿਆ | ਉਨ੍ਹਾਂ ਨੇ ਹਜ਼ਾਰਾਂ ਗੀਤ ਲਿਖੇ ਜੋ ਬਹੁਤ ਮਕਬੂਲ ਹੋਏ | ਉਨ੍ਹਾਂ ਦੇ ਰਚੇ ਗੀਤ 'ਚੰਡੀਗੜ੍ਹ ਰਹਿਣ ਵਾਲੀਏ, ਅਸੀਂ ਪੇਂਡੂ ਨਹੀਂ ਦਿਲਾਂ ਦੇ ਮਾੜੇ..' ਨੇ ਤਾਂ ਉਨ੍ਹਾਂ ਨੂੰ ਟੀਸੀ 'ਤੇ ਪਹੁੰਚਾ ਦਿੱਤਾ | ਇਹ ਗੀਤ ਤਾਂ ਦੇਸ਼ਾਂ ਵਿਦੇਸ਼ਾਂ ਵਿਚ ਬੈਠੇ ਹਰੇਕ ਪੰਜਾਬੀ ਦੀ ਜ਼ੁਬਾਨ ਦਾ ਸ਼ਿੰਗਾਰ ਹੋ ਨਿਬੜਿਆ | ਉਨ੍ਹਾਂ ਨੇ 'ਬਲਬੀਰੋ ਭਾਬੀ' ਫਿਲਮ ਵੀ ਬਣਾਈ ਜੋ ਸੁਪਰਹਿੱਟ ਹੋਈ | ਕਾਬਲੇ ਗੌਰ ਹੈ ਕਿ ਉਨ੍ਹਾਂ ਨੇ 1 ਦਰਜਨ ਤੋਂ ਵੱਧ ਪੁਸਤਕਾਂ ਲਿਖੀਆਂ | ਉਹ ਆਪਣੇ ਪਿੱਛੇ ਪੰਜਾਬੀ ਸਭਿਆਚਾਰ ਦੀ ਅਮੀਰ ਵਿਰਾਸਤ ਛੱਡ ਗਏ ਜਿਸ ਨੇ ਨਾ ਸਿਰਫ ਦੇਸ਼ ਅੰਦਰ, ਸਗੋਂ ਵਿਦੇਸ਼ਾਂ ਵਿਚ ਵੀ ਪੰਜਾਬੀ ਭਾਸ਼ਾ ਅਤੇ ਸੰਗੀਤ ਨੂੰ ਮਾਣ ਦਵਾਇਆ | ਉਨ੍ਹਾਂ ਦੇ ਦਿਹਾਂਤ ਦੀ ਖ਼ਬਰ ਨਾਲ ਸੰਗੀਤ ਜਗਤ, ਸਾਹਿਤਕਾਰਾਂ ਅਤੇ ਪ੍ਰਸੰਸ਼ਕਾਂ ਵਿਚ ਸੋਗ ਦੀ ਲਹਿਰ ਦੌੜ ਗਈ | ਚੰਨ ਗੁਰਾਇਆਂ ਵਾਲੇ ਨੇ ਪੰਜਾਬੀ ਭਾਸ਼ਾ ਨੂੰ ਕੌਮਾਂਤਰੀ ਪੱਧਰ 'ਤੇ ਮਜ਼ਬੂਤੀ ਨਾਲ ਖੜ੍ਹਾ ਕਰਨ ਲਈ ਸੁਹਿਰਦ ਯਤਨ ਕੀਤੇ | ਚੰਨ ਗੁਰਾਇਆ ਵਾਲੇ ਦਾ ਅੰਤਿਮ ਸੰਸਕਾਰ 6 ਮਈ ਨੂੰ 2 ਵਜੇ ਗੁਰਾਇਆ ਵਿਖੇ ਕੀਤਾ ਜਾਵੇਗਾ |