ਅਬੋਹਰ, 12 ਮਈ (ਤੇਜਿੰਦਰ ਸਿੰਘ ਖ਼ਾਲਸਾ)-ਅਬੋਹਰ-ਹਨੂੰਮਾਨਗੜ੍ਹ ਰੋਡ 'ਤੇ ਸਥਿਤ ਪਿੰਡ ਰਾਮਸਰਾ ਨੇੜੇ ਸੜਕ ਹਾਦਸੇ 'ਚ 2 ਲੋਕਾਂ ਦੀ ਮੌਕੇ 'ਤੇ ਅਤੇ ਇਲਾਜ ਦੌਰਾਨ ਇਕ ਬੱਚੇ ਦੀ ਮੌਤ ਹੋ ਗਈ ਜਦ ਕਿ ਇਕ ਔਰਤ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਈ | ਇਸ ਹਾਦਸੇ ਦੌਰਾਨ ਇਕ ਸਾਲ ਦੀ ਮਾਸੂਮ ਬੱਚੀ ਵਾਲ-ਵਾਲ ਬੱਚ ਗਈ | ਮਿਲੀ ਜਾਣਕਾਰੀ ਅਨੁਸਾਰ ਪਿੰਡ ਰਾਮਸਰਾ ਵਾਸੀ ਦੇਵਕੀ, ਆਪਣੀ ਨੂੰ ਹ ਪੂਨਮ, ਚਾਰ ਸਾਲਾਂ ਪੋਤਰੇ ਅਮਰੀਸ਼ ਅਤੇ ਇਕ ਸਾਲ ਦੀ ਪੋਤੀ ਨਾਲ ਈ-ਰਿਕਸ਼ਾ 'ਤੇ ਸਵਾਰ ਹੋ ਕੇ ਆਪਣੇ ਪਿੰਡ ਰਾਮਸਰਾ ਵਾਪਸ ਜਾ ਰਹੀ ਸੀ ਜਦ ਉਹ ਪਿੰਡ ਦੇ ਨੇੜੇ ਪਹੁੰਚੇ ਤਾਂ ਸਾਹਮਣੇ ਤੋਂ ਆ ਰਹੀ ਇਕ ਬੋਲੈਰੋ ਪਿਕਅਪ ਗੱਡੀ ਨੇ ਸੰਤੁਲਨ ਵਿਗੜਨ ਕਾਰਨ ਈ-ਰਿਕਸ਼ਾ ਨੂੰ ਜ਼ੋਰਦਾਰ ਟੱਕਰ ਮਾਰ ਦਿੱਤੀ | ਟੱਕਰ ਇੰਨੀ ਭਿਆਨਕ ਸੀ ਕਿ ਈ-ਰਿਕਸ਼ਾ ਚਾਲਕ ਸੰਦੀਪ ਸੁਆਮੀ ਵਾਸੀ ਅਬੋਹਰ ਅਤੇ ਦੇਵਕੀ ਵਾਸੀ ਪਿੰਡ ਰਾਮਸਰਾ ਦੀ ਮੌਕੇ 'ਤੇ ਹੀ ਦਰਦਨਾਕ ਮੌਤ ਹੋ ਗਈ | ਸਰਕਾਰੀ ਹਸਪਤਾਲ ਵਿਚ ਪੁਖ਼ਤਾ ਇਲਾਜ ਪ੍ਰਬੰਧ ਨਾ ਮਿਲਣ ਕਾਰਨ ਚਾਰ ਸਾਲਾਂ ਮਾਸੂਮ ਅਮਰੀਸ਼ ਨੇ ਵੀ ਦਮ ਤੋੜ ਦਿੱਤਾ | ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ |
