ਭਾਰਤ-ਯੂ.ਕੇ. ਵਪਾਰ ਸਮਝੌਤਾ ਭਾਰਤ ਵਲੋਂ ਹੁਣ ਤੱਕ ਦਾ ਸਭ ਤੋਂ ਮਹੱਤਵਪੂਰਨ ਸਮਝੌਤਾ-ਪਿਊਸ਼ ਗੋਇਲ

ਲੰਡਨ, 25 ਜੂੁਨ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਭਾਰਤ ਦੇ ਕੇਂਦਰੀ ਵਣਜ ਮੰਤਰੀ ਪੀਯੂਸ਼ ਗੋਇਲ ਆਪਣੀ 3 ਦਿਨਾ ਲੰਡਨ ਯਾਤਰਾ ’ਤੇ ਹਨ। ਇਸ ਦੌਰਾਨ ਉਹ ਯੂ.ਕੇ. ਦੇ ਵਪਾਰ ਤੇ ਕਾਰੋਬਾਰ ਮੰਤਰੀ ਪੀਟਰ ਕਾਇਲ ਨਾਲ ਮੁਲਾਕਾਤ ਕਰਨਗੇ। ਅੱਜ ਇਥੇ ਲੰਡਨ ’ਚ ਇੰਡੀਆ ਗਲੋਬਲ ਫੋਰਮ ਦੀ ‘ਯੂ.ਕੇ.-ਇੰਡੀਆ ਵੀਕ 2026: ਕੈਪੀਟਲ ਫਰੰਟੀਅਰਜ਼’ ਕਾਨਫਰੰਸ ਦੌਰਾਨ ਵਿਸ਼ਵਵਿਆਪੀ ਕਾਰੋਬਾਰੀ ਆਗੂਆਂ ਨੂੰ ਸੰਬੋਧਨ ਕਰਦਿਆਂ ਗੋਇਲ ਨੇ ਅੰਤਰ-ਮਹਾਂਦੀਪੀ ਵਪਾਰ ਬਾਰੇ ਮਹੱਤਵਪੂਰਨ ਜਾਣਕਾਰੀਆਂ ਸਾਂਝੀਆਂ ਕੀਤੀਆਂ। ਕੇਂਦਰੀ ਵਣਜ ਮੰਤਰੀ ਨੇ ਕਿਹਾ ਕਿ ਭਾਰਤ ਤੇ ਯੂ.ਕੇ. ਵਿਚਕਾਰ ਮੁਕਤ ਵਪਾਰ ਸਮਝੌਤਾ ਭਾਰਤ ਵਲੋਂ ਹੁਣ ਤੱਕ ਦਾ ਸਭ ਤੋਂ ਮਹੱਤਵਪੂਰਨ ਵਪਾਰਕ ਸਮਝੌਤਾ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਪ੍ਰਸਤਾਵਿਤ ਭਾਰਤ-ਅਮਰੀਕਾ ਵਪਾਰ ਸਮਝੌਤਾ ਵੀ ਅੰਤਿਮ ਰੂਪ ਲੈਣ ਦੇ ‘ਬਹੁਤ ਨੇੜੇ’ ਹੈ। ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ ਜਦੋਂ ਦੋਵੇਂ ਦੇਸ਼ ਇਤਿਹਾਸਕ ‘ਡਬਲ ਕੰਟਰੀਬਿਊਸ਼ਨ ਕਨਵੈਨਸ਼ਨ’ ਅਤੇ ‘ਵਿਆਪਕ ਆਰਥਿਕ ਅਤੇ ਵਪਾਰਕ ਸਮਝੌਤੇ’ ਨੂੰ ਲਾਗੂ ਕਰਨ ਦੀ ਤਿਆਰੀ ਕਰ ਰਹੇ ਹਨ, ਜੋ ਕਿ 15 ਜੁਲਾਈ, 2026 ਤੋਂ ਲਾਗੂ ਹੋਣ ਜਾ ਰਹੇ ਹਨ। ਆਪਣੀ ਤਿੰਨ ਦਿਨਾ ਲੰਡਨ ਫੇਰੀ ਦੌਰਾਨ ਪੀਯੂਸ਼ ਗੋਇਲ ਯੂ.ਕੇ. ਦੇ ਵਪਾਰ ਅਤੇ ਕਾਰੋਬਾਰ ਮੰਤਰੀ ਪੀਟਰ ਕਾਇਲ ਨਾਲ ਮੁਲਾਕਾਤ ਕਰਨਗੇ। ਦੋਵੇਂ ਆਗੂ 2030 ਤੱਕ ਦੁਵੱਲੇ ਵਪਾਰ ਨੂੰ 120 ਅਰਬ ਅਮਰੀਕੀ ਡਾਲਰ ਤੱਕ ਪਹੁੰਚਾਉਣ ਦੇ ਸਾਂਝੇ ਟੀਚੇ ‘ਤੇ ਕੰਮ ਕਰਨਗੇ ਤੇ ਰੈਗੂਲੇਟਰੀ ਰੋਡਮੈਪ (ਨਿਯਮਾਂ ਦੀ ਰੂਪਰੇਖਾ) ਤੇ ਸਰਹੱਦ ਪਾਰ ਕਸਟਮ ਤਾਲਮੇਲ ਨੂੰ ਸਰਲ ਬਣਾਉਣ ਬਾਰੇ ਚਰਚਾ ਕਰਨਗੇ।