ਅਕਾਲ ਆਈ ਹਸਪਤਾਲ ਦੀ ਟੀਮ ਨੇ ਵਿਸ਼ਵ ਨੇਤਰ ਵਿਗਿਆਨ ਕਾਂਗਰਸ ਵਿਚ ਚਾਰ ਖੋਜ ਪੱਤਰ ਪੇਸ਼ ਕਰ ਕੇ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ

ਜਲੰਧਰ, 2 ਜੁਲਾਈ (ਐੱਮ. ਐੱਸ. ਲੋਹੀਆ)–ਅਕਾਲ ਆਈ ਹਸਪਤਾਲ, ਜਲੰਧਰ ਲਈ ਇਹ ਬਹੁਤ ਹੀ ਮਾਣ ਵਾਲਾ ਪਲ ਸੀ, ਜਦੋਂ ਹਸਪਤਾਲ ਦੀ ਡਾਕਟਰਾਂ ਦੀ ਟੀਮ ਨੇ ਡਾ. ਬਲਬੀਰ ਸਿੰਘ ਭੌਰਾ ਦੀ ਅਗਵਾਈ ਹੇਠ 40ਵੀਂ ਵਿਸ਼ਵ ਨੇਤਰ ਵਿਗਿਆਨ ਕਾਂਗਰਸ ਵਿਚ ਚਾਰ ਵਿਗਿਆਨਕ ਖੋਜ ਪੱਤਰ ਪੇਸ਼ ਕੀਤੇ। ਇਹ ਕਾਨਫਰੰਸ 25 ਤੋਂ 28 ਜੂਨ 2026 ਤੱਕ ਪ੍ਰਾਗ (ਚੈੱਕ ਗਣਰਾਜ) ਵਿਚ ਕਰਵਾਈ ਗਈ। ਇਸ ਟੀਮ ਵਿਚ ਡਾ. ਪੁਸ਼ਪਿੰਦਰ ਕੌਰ ਭੌਰਾ, ਡਾ. ਰਣਬੀਰ ਸਿੰਘ ਭੌਰਾ ਅਤੇ ਡਾ. ਸਤਬੀਰ ਸਿੰਘ ਭੌਰਾ ਵੀ ਸ਼ਾਮਿਲ ਸਨ। ਕਾਂਗਰਸ ਦੌਰਾਨ ਡਾ. ਬਲਬੀਰ ਸਿੰਘ ਭੌਰਾ ਨੂੰ ਇਕ ਵਿਗਿਆਨਕ ਸੈਸ਼ਨ ਦੀ ਪ੍ਰਧਾਨਗੀ ਕਰਨ ਦਾ ਵੀ ਮਾਣ ਪ੍ਰਾਪਤ ਹੋਇਆ। ਟੀਮ ਵਲੋਂ ਅੱਖਾਂ ਦੀ ਸਰਜਰੀ ਵਿਚ ਤਿੰਨ-ਆਯਾਮੀ (3ਡੀ) ਡਿਜ਼ੀਟਲ ਵਿਜ਼ੂਅਲਾਈਜ਼ੇਸ਼ਨ ਬਾਰੇ ਦਿੱਤੀ ਗਈ ਪੇਸ਼ਕਾਰੀ ਨੂੰ ਦੇਸ਼-ਵਿਦੇਸ਼ ਤੋਂ ਆਏ ਨੇਤਰ ਰੋਗ ਵਿਸ਼ੇਸ਼ਗਿਆਨਾਂ ਵਲੋਂ ਬਹੁਤ ਸਰਾਹਿਆ ਗਿਆ।ਡਾ. ਪੁਸ਼ਪਿੰਦਰ ਕੌਰ ਭੌਰਾ ਵਲੋਂ ਪੇਸ਼ ਕੀਤਾ ਗਿਆ ਖੋਜ ਪੱਤਰ ‘ਦ ਜਰਨੀ ਆਫ਼ ਏ ਰਿਫਰੈਕਟਿਵ ਸਰਜਨ’ ਵੀ ਸੈਸ਼ਨ ਦੇ ਸਭ ਤੋਂ ਉੱਤਮ ਖੋਜ ਪੱਤਰਾਂ ਵਿਚ ਸ਼ਾਮਿਲ ਰਿਹਾ ਅਤੇ ਇਸ ਨੂੰ ਭਰਪੂਰ ਪ੍ਰਸ਼ੰਸਾ ਮਿਲੀ।ਇਹ ਪ੍ਰਾਪਤੀ ਅਕਾਲ ਆਈ ਹਸਪਤਾਲ ਦੀ ਅਕਾਦਮਿਕ ਅਤੇ ਖੋਜ ਖੇਤਰ ਵਿਚ ਲਗਾਤਾਰ ਸ਼ਾਨਦਾਰ ਕਾਰਗੁਜ਼ਾਰੀ ਦਾ ਪ੍ਰਮਾਣ ਹੈ। ਇਸ ਤੋਂ ਪਹਿਲਾਂ ਵੀ ਹਸਪਤਾਲ ਦੀ ਟੀਮ ਨੇ 2024 ਵਿਚ ਕੈਨੇਡਾ ਦੇ ਵੈਨਕੂਵਰ ਵਿਚ ਹੋਈ 39ਵੀਂ ਵਿਸ਼ਵ ਨੇਤਰ ਵਿਗਿਆਨ ਕਾਂਗਰਸ ਵਿਚ ਕਈ ਖੋਜ ਪੱਤਰ ਪੇਸ਼ ਕਰਕੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਆਪਣੀ ਵਿਲੱਖਣ ਪਛਾਣ ਬਣਾਈ ਸੀ।