ਆਈ.ਆਰ.ਸੀ.ਟੀ.ਸੀ. ਦੀ ਨਵੀਂ ਵੈੱਬਸਾਈਟ ਦਾ ਬੀਟਾ ਵਰਜਨ ਲਾਂਚ

ਹੁਣ ਟਿਕਟ ਬੁਕਿੰਗ ਹੋਵੇਗੀ ਹੋਰ ਆਸਾਨ ਤੇ ਤੇਜ਼
ਮੰਡੀ ਗੋਬਿੰਦਗੜ੍ਹ, 16 ਜੁਲਾਈ (ਮੋਹਿਤ ਸਿੰਗਲਾ)- ਭਾਰਤੀ ਰੇਲਵੇ ਖਾਣ-ਪੀਣ ਤੇ ਸੈਰ-ਸਪਾਟਾ ਨਿਗਮ (ਆਈ.ਆਰ.ਸੀ.ਟੀ.ਸੀ.) ਨੇ ਆਪਣੀ ਨਵੀਂ ਵੈੱਬਸਾਈਟ ਦਾ ਬੀਟਾ ਵਰਜਨ ਸ਼ੁਰੂ ਕਰ ਦਿੱਤਾ ਹੈ । ਹੁਣ ਯਾਤਰੀ ਨਵੇਂ ਯੂਜ਼ਰ ਇੰਟਰਫੇਸ ਤੇ ਬਿਹਤਰ ਸੁਵਿਧਾਵਾਂ ਦਾ ਅਨੁਭਵ ਕਰਦੇ ਹੋਏ ਆਪਣੇ ਸੁਝਾਅ ਵੀ ਦੇ ਸਕਣਗੇ । ਨਵੀਂ ਵੈੱਬਸਾਈਟ ਨੂੰ https://www.irctc.co.in/eticket/ ’ਤੇ ਵੇਖਿਆ ਜਾ ਸਕਦਾ ਹੈ। ਇਸ ਦਾ ਲਿੰਕ ਮੌਜੂਦਾ ਆਈ.ਆਰ.ਸੀ.ਟੀ.ਸੀ. ਵੈੱਬਸਾਈਟ ਦੇ ਹੋਮ ਪੇਜ ’ਤੇ ਵੀ ਉਪਲਬਧ ਕਰਵਾਇਆ ਗਿਆ ਹੈ। ਰੇਲ ਮੰਤਰਾਲੇ ਅਨੁਸਾਰ ਵੈੱਬਸਾਈਟ ਦੇ ਨਵੇਂ ਡਿਜ਼ਾਈਨ ਤੇ ਯੂਜ਼ਰ ਅਨੁਭਵ ਨੂੰ ਹੋਰ ਬਿਹਤਰ ਬਣਾਉਣ ਲਈ ਮਾਲਵੀਆ ਨੈਸ਼ਨਲ ਇੰਸਟੀਚਿਊਟ ਆਫ਼ ਟੈਕਨੋਲੋਜੀ (ਐਮ.ਐਨ.ਆਈ.ਟੀ.) ਦੇ ਵਿਦਿਆਰਥੀਆਂ ਦੇ ਸੁਝਾਅ ਵੀ ਸ਼ਾਮਿਲ ਕੀਤੇ ਗਏ ਹਨ । ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਣਵ ਨਾਲ ਹੋਈ ਚਰਚਾ ਦੌਰਾਨ ਵਿਦਿਆਰਥੀਆਂ ਨੇ ਵੈੱਬਸਾਈਟ ਨੂੰ ਹੋਰ ਸਰਲ ਤੇ ਵਰਤੋਂਕਾਰ-ਅਨੁਕੂਲ ਬਣਾਉਣ ਲਈ ਕਈ ਸੁਝਾਅ ਦਿੱਤੇ ਸਨ । ਨਵੇਂ ਬੀਟਾ ਵਰਜਨ ਵਿੱਚ ਵੈੱਬਸਾਈਟ ਦਾ ਇੰਟਰਫੇਸ ਹੋਰ ਸਾਫ਼-ਸੁਥਰਾ ਅਤੇ ਆਸਾਨ ਬਣਾਇਆ ਗਿਆ ਹੈ।