ਪ੍ਰਿਅੰਕਾ ਗਾਂਧੀ ਦਾ ਨਿੱਜੀ ਸਕੱਤਰ ਦੱਸ ਕੇ ਠੱਗੀ ਮਾਰਨ ਵਾਲੇ ਵਿਰੁੱਧ ਪਰਚਾ ਦਰਜ

ਵਾਇਨਾਡ (ਕੇਰਲ), 16 ਜੁਲਾਈ (ਪੀ.ਟੀ.ਆਈ.)-ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਵਾਇਨਾਡ ਤੋਂ ਕਾਂਗਰਸ ਸੰਸਦ ਮੈਂਬਰ ਪ੍ਰਿਅੰਕਾ ਗਾਂਧੀ ਵਾਡਰਾ ਦੇ ਨਿੱਜੀ ਸਕੱਤਰ (ਪੀ.ਐੱਸ.) ਵਜੋਂ ਪੇਸ਼ ਹੋਏ ਇਕ ਧੋਖੇਬਾਜ਼ ਨੇ ਕੇਰਲ ਦੇ ਸੰਸਦ ਮੈਂਬਰਾਂ ਅਤੇ ਇਕ ਵਿਧਾਇਕ ਤੋਂ ਪੈਸੇ ਮੰਗ ਕੇ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕੀਤੀ। ਇਹ ਮਾਮਲਾ ਪ੍ਰਿਅੰਕਾ ਗਾਂਧੀ ਵਾਡਰਾ ਦੇ ਨਿੱਜੀ ਸਕੱਤਰ, ਡੀ.ਐੱਸ. ਰਾਜਕੁਮਾਰ ਵਲੋਂ ਸੂਬਾ ਪੁਲਿਸ ਮੁਖੀ ਅਤੇ ਵਾਇਨਾਡ ਦੇ ਪੁਲਿਸ ਸੁਪਰਡੈਂਟ (ਐੱਸ. ਪੀ.) ਕੋਲ ਦਾਇਰ ਸ਼ਿਕਾਇਤ ਦੇ ਆਧਾਰ ’ਤੇ ਦਰਜ ਕੀਤਾ ਗਿਆ। ਸ਼ਿਕਾਇਤ ਅਨੁਸਾਰ, ਦੋਸ਼ੀ ਨੇ ਨਵੀਂ ਦਿੱਲੀ ’ਚ ਰਹਿਣ ਵਾਲੇ ਰਾਜਕੁਮਾਰ ਵਜੋਂ ਕਾਂਗਰਸ ਆਗੂਆਂ ਏਲਾਥੁਰ ਦੇ ਵਿਧਾਇਕ ਕੇ. ਵਿਦਿਆ ਬਾਲਕ੍ਰਿਸ਼ਨਨ ਅਤੇ ਸੰਸਦ ਮੈਂਬਰ ਸ਼ਫੀ ਪਰਮਬਿਲ ਅਤੇ ਡੀਨ ਕੁਰੀਆਕੋਸ ਨਾਲ ਸੰਪਰਕ ਕੀਤਾ। ਰਾਜਕੁਮਾਰ ਨੇ ਦੋਸ਼ ਲਗਾਇਆ ਕਿ ਦੋਸ਼ੀ ਨੇ ਆਪਣੀ ਪਛਾਣ ਅਤੇ ਸੰਸਦ ਮੈਂਬਰ ਦੇ ਦਫ਼ਤਰ ਦੇ ਨਾਂਅ ਦੀ ਵਰਤੋਂ ਜਨਤਕ ਪ੍ਰਤੀਨਿਧੀਆਂ ਤੋਂ ਪੈਸੇ ਵਸੂਲਣ ਅਤੇ ਉਨ੍ਹਾਂ ਨਾਲ ਧੋਖਾਧੜੀ ਕਰਨ ਲਈ ਕੀਤੀ।