ਈਰਾਨੀ ਵਿਦੇਸ਼ ਮੰਤਰੀ ਵਲੋਂ ਆਸਿਮ ਮੁਨੀਰ ਨਾਲ ਖੇਤਰੀ ਸਥਿਤੀ ’ਤੇ ਚਰਚਾ

ਡ

ਡਾ. ਅੱਬਾਸ ਅਰਾਘਚੀ, ਆਸਿਮ ਮੁਨੀਰ 03-08-2026

ਅੰਮ੍ਰਿਤਸਰ, 2 ਅਗਸਤ (ਸੁਰਿੰਦਰ ਕੋਛੜ)-ਈਰਾਨੀ ਵਿਦੇਸ਼ ਮੰਤਰੀ ਡਾ. ਅੱਬਾਸ ਅਰਾਘਚੀ ਨੇ ਅਮਰੀਕਾ ਨਾਲ ਜਾਰੀ ਟਕਰਾਅ ਦਰਮਿਆਨ ਪਾਕਿਸਤਾਨ ਦੇ ਫ਼ੀਲਡ ਮਾਰਸ਼ਲ ਸਈਦ ਆਸਿਮ ਮੁਨੀਰ ਨਾਲ ਟੈਲੀਫ਼ੋਨ ’ਤੇ ਖੇਤਰ ’ਚ ਨਵੀਨਤਮ ਵਿਕਾਸ ’ਤੇ ਚਰਚਾ ਕੀਤੀ। ਈਰਾਨ ਦੀ ਸਰਕਾਰੀ ਸਮਾਚਾਰ ਏਜੰਸੀ ਅਨੁਸਾਰ ਵਿਦੇਸ਼ ਮੰਤਰੀ ਅਰਾਘਚੀ ਨੇ ਸਾਊਦੀ ਅਰਬ ਅਤੇ ਤੁਰਕੀ ਦੇ ਵਿਦੇਸ਼ ਮੰਤਰੀਆਂ ਨਾਲ ਵੀ ਟੈਲੀਫ਼ੋਨ ’ਤੇ ਵੱਖ-ਵੱਖ ਗੱਲਬਾਤ ਕੀਤੀ ਤਾਂ ਜੋ ਖੇਤਰੀ ਸਥਿਤੀ ’ਤੇ ਚਰਚਾ ਕੀਤੀ ਜਾ ਸਕੇ। ਈਰਾਨੀ ਵਿਦੇਸ਼ ਮੰਤਰੀ ਨੇ ਤੁਰਕੀ, ਕੁਵੈਤ, ਪਾਕਿਸਤਾਨੀ ਅਤੇ ਸਾਊਦੀ ਦੇ ਆਲਾ ਫ਼ੌਜੀ ਅਧਿਕਾਰੀਆਂ ਨਾਲ ਫ਼ੋਨ ‘ਤੇ ਵਿਚਾਰ-ਵਟਾਂਦਰੇ ਤੋਂ ਕੁਝ ਘੰਟੇ ਬਾਅਦ ਬਿਆਨ ਜਾਰੀ ਕਰਕੇ ਕਿਹਾ ਕਿ ਸੰਯੁਕਤ ਰਾਜ ਅਮਰੀਕਾ ਨੂੰ ਕਿਸੇ ਵੀ ਫ਼ੌਜੀ ਸਾਹਸ ਤੋਂ ਬਚਣਾ ਚਾਹੀਦਾ ਹੈ। ਉਨ੍ਹਾਂ ਅੱਗੇ ਚਿਤਾਵਨੀ ਦਿੱਤੀ ਕਿ ਸੰਯੁਕਤ ਰਾਜ ਅਮਰੀਕਾ ਜਾਂ ਇਜ਼ਰਾਈਲ ਵਲੋਂ ਕੀਤੇ ਗਏ ਕਿਸੇ ਵੀ ਹਮਲੇ ਦਾ ਫ਼ੈਸਲਾਕੁਨ ਜਵਾਬ ਦਿੱਤਾ ਜਾਵੇਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੇਕਰ ਕੋਈ ਖੇਤਰੀ ਦੇਸ਼ ਅਜਿਹੇ ਹਮਲੇ ‘ਚ ਹਿੱਸਾ ਲੈਂਦਾ ਹੈ ਤਾਂ ਈਰਾਨ ਸਖ਼ਤੀ ਨਾਲ ਜਵਾਬ ਦੇਵੇਗਾ।