ਰਛਪਾਲ ਕੌਰ ਢਿੱਲੋਂ ਹੋਣਗੇ ਲੌਂਗੋਵਾਲ ਦੇ 14ਵੇਂ ਪ੍ਰਧਾਨ

ਲੌਂਗੋਵਾਲ, (ਵਿਨੋਦ, ਖੰਨਾ) - ਨਗਰ ਕੌਂਸਲ ਲੌਂਗੋਵਾਲ ਦੀ ਪ੍ਰਧਾਨਗੀ ਦਾ ਤਾਜ਼ ਬੀਬਾ ਰਛਪਾਲ ਕੌਰ ਢਿੱਲੋਂ ਦੇ ਸਿਰ ਸਜ ਗਿਆ ਹੈ। ਨਗਰ ਕੌਂਸਲ ਲੌਂਗੋਵਾਲ ਦੀ ਪ੍ਰਧਾਨਗੀ ਜਰਨਲ ਹੋਣ ਕਾਰਨ ਭਾਵੇਂ ਕੁੱਝ ਹੋਰ ਕੌਂਸਲਰਾਂ ਵਲੋਂ ਵੀ ਪ੍ਰਧਾਨਗੀ ਨੂੰ ਲੈ ਕੇ ਦਾਅਵਾ ਕੀਤਾ ਜਾ ਰਿਹਾ ਸੀ ਅਤੇ ਨਿੱਤ ਦਿਨ ਨਵੀਆਂ ਤੋਂ ਨਵੀਆਂ ਅਟਕਲਾਂ ਸਾਹਮਣੇ ਆ ਰਹੀਆਂ ਸਨ। ਪ੍ਰੰਤੂ ਬੀਬਾ ਢਿੱਲੋਂ ਦੇ ਪ੍ਰਧਾਨ ਬਣਨ ਦੀ ਭਵਿੱਖਬਾਣੀ ਰੋਜ਼ਾਨਾ ‘ਅਜੀਤ’ ਨੇ ਨਗਰ ਕੌਂਸਲ ਨਤੀਜਿਆਂ ਤੋਂ ਤੁਰੰਤ ਬਾਅਦ ਹੀ ਕਰ ਦਿੱਤੀ ਸੀ, ਜੋਕਿ ਅੱਜ ਸੱਚ ਸਿੱਧ ਹੋਈ। ਰਛਪਾਲ ਕੌਰ ਢਿੱਲੋਂ 1961 ਵਿਚ ਹੋਂਦ ਵਿਚ ਆਈ ਲੌਂਗੋਵਾਲ ਨਗਰ ਕੌਂਸਲ ਦੇ 14ਵੇਂ ਪ੍ਰਧਾਨ ਹੋਣਗੇ। ਇਸ ਤੋਂ ਇਲਾਵਾ ਉਹ ਨਗਰ ਕੌਂਸਲ ਲੌਂਗੋਵਾਲ ਦੇ ਹੁਣ ਤੱਕ ਚੌਥੇ ਔਰਤ ਪ੍ਰਧਾਨ ਹੋਣਗੇ। ਜੇਕਰ ਲਗਾਤਾਰਤਾ ਦੀ ਗੱਲ ਕਰੀਏ ਕਿ ਤਾਂ ਲੌਂਗੋਵਾਲ ਨੂੰ ਲਗਾਤਾਰ ਤੀਜੀ ਵਾਰ ਔਰਤ ਪ੍ਰਧਾਨ ਮਿਲਿਆ ਹੈ। ਇਥੇ ਇੰਦਰਜੀਤ ਕੌਰ ਸਿੱਧੂ 12 ਅਪ੍ਰੈਲ 1998 ਨੂੰ ਪਹਿਲੇ ਔਰਤ ਪ੍ਰਧਾਨ ਬਣੇ ਸਨ। ਨਗਰ ਕੌਂਸਲ ਦੇ ਇਸਤੋਂ ਪਿਛਲੇ ਕਾਰਜਕਾਲ ਦੌਰਾਨ ਰੀਤੂ ਗੋਇਲ ਨੂੰ ਪੌਣੇ ਕੁ ਦੋ ਸਾਲ ਪ੍ਰਧਾਨਗੀ ਕਰਨ ਦਾ ਮੌਕਾ ਮਿਲਿਆ ਪ੍ਰੰਤੂ ਆਪ ਦੀ ਸਰਕਾਰ ਬਣਨ ’ਤੇ ਰੀਤੂ ਗੋਇਲ ਪ੍ਰਧਾਨਗੀ ਤੋਂ ਲਾਂਭੇ ਹੋ ਗਏ ਅਤੇ 3 ਫਰਵਰੀ 2023 ਨੂੰ ਤੱਤਕਾਲੀਨ ਆਪ ਆਗੂ ਪਰਮਿੰਦਰ ਕੌਰ ਬਰਾੜ ਪ੍ਰਧਾਨ ਬਣ ਗਏ । ਬਰਾੜ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਕੌਂਸਲਰਾਂ ਦੀ ਸਹਾਇਤਾ ਨਾਲ ਚੋਣਾਂ ਹੋਣ ਤੱਕ ਪ੍ਰਧਾਨਗੀ ਕਰਨ ਵਿਚ ਕਾਮਯਾਬ ਰਹੇ। ਬਰਾੜ ਪ੍ਰਧਾਨ ਹੁੰਦਿਆਂ ਆਪ ਛਡ ਕੇ ਅਕਾਲੀ ਦਲ ’ਚ ਚਲੇ ਗਏ ਸਨ। ਹੁਣ ਨਗਰ ਕੌਂਸਲ ਲੌਂਗੋਵਾਲ ਦੀ ਕਮਾਂਡ ਲਗਾਤਾਰ ਤੀਜੀ ਵਾਰ ਕਿਸੇ ਬੀਬੀ ਦੇ ਹੱਥ ਆਈ ਹੈ। ਲੌਂਗੋਵਾਲ ਦੇ ਸਭ ਤੋਂ ਪਹਿਲੇ ਪ੍ਰਧਾਨ ਕਸਤੂਰੀ ਲਾਲ ਸਨ। ਇਸ ਤੋਂ ਬਾਅਦ ਕਰਤਾਰ ਸਿੰਘ, ਜਥੇ. ਉਦੇ ਸਿੰਘ, ਗੁਰਮੇਲ ਸਿੰਘ, ਜੀਤ ਸਿੰਘ ਸਿੱਧੂ, ਸੁਖਵਿੰਦਰਪਾਲ ਸੁੱਖੀ, ਦਲਜੀਤ ਸਿੰਘ ਸਿੱਧੂ, ਇੰਦਰਜੀਤ ਕੌਰ ਸਿੱਧੂ, ਦਲਜੀਤ ਸਿੰਘ ਸਿੱਧੂ, ਮੇਲਾ ਸਿੰਘ ਸੂਬੇਦਾਰ, ਜਗਦੇਵ ਸਿੰਘ ਸਿੱਧੂ, ਰੀਤੂ ਗੋਇਲ ਅਤੇ ਪਰਮਿੰਦਰ ਕੌਰ ਬਰਾੜ ਲੜੀਵਾਰ ਪ੍ਰਧਾਨ ਰਹਿ ਚੁੱਕੇ ਹਨ।