ਅਮਰਗੜ੍ਹ, 11 ਜੁਲਾਈ (ਜਤਿੰਦਰ ਮੰਨਵੀ) - ਅਕਾਲੀ ਦਲ ਦੀ ਸਰਕਾਰ ਵੇਲੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਹੋਈਆਂ ਮੰਦਭਾਗੀਆਂ ਬੇਅਦਬੀਆਂ ਅਤੇ ਬਰਗਾੜੀ ਗੋਲੀਕਾਂਡ ਦੇ ਦੋਸ਼ੀਆਂ ਖ਼ਿਲਾਫ਼ ਆਵਾਜ਼ ਬੁਲੰਦ ਕਰਨ ਦੀ ਬਜਾਏ, ਸੱਤਾ ਦੇ ਨਸ਼ੇ ‘ਚ ਗੂੜ੍ਹੀ ਚੁੱਪ ਵੱਟਣ ਵਾਲੇ ਆਗੂ ਅੱਜ ਖ਼ੁਦ ਨੂੰ ਪੰਥਕ ਅਖਵਾ ਕੇ ਸਿੱਖ ਜਗਤ ਨੂੰ ਗੁਮਰਾਹ ਕਰ ਰਹੇ ਹਨ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਪੰਥਕ ਸ਼ਖਸੀਅਤ ਭਾਈ ਗੁਰਪ੍ਰੀਤ ਸਿੰਘ ਖਾਲਸਾ ਨੇ ਅਜੀਤ ਨਾਲ ਵਿਸ਼ੇਸ਼ ਗੱਲਬਾਤ ਕਰਦਿਆਂ ਕੀਤਾ।ਉਨ੍ਹਾਂ ਆਖਿਆ ਕਿ ਜਿਹੜੇ ਆਗੂ ਸਰਕਾਰੀ ਸੁਖ-ਸਹੂਲਤਾਂ ਅਤੇ ਮਲਾਈਆਂ ਛਕਦੇ ਰਹੇ, ਉਹ ਵੀ ਇਸ ਗੁਨਾਹ ਦੇ ਬਰਾਬਰ ਦੇ ਭਾਗੀਦਾਰ ਹਨ ਤੇ ਅੱਜ ਉਹੀ ਲੀਡਰ ਪੰਥਕ ਏਕਤਾ ਦਾ ਵਾਸਤਾ ਪਾ ਕੇ ਆਪਣੀ ਸਿਆਸੀ ਜ਼ਮੀਨ ਚਮਕਾਉਣ ਦੀ ਫ਼ਿਰਾਕ ‘ਚ ਹਨ। ਭਾਈ ਖਾਲਸਾ ਨੇ ਤਿੱਖੇ ਸ਼ਬਦਾਂ ‘ਚ ਕਿਹਾ ਕਿ ਜੇਕਰ ਇਹ ਆਗੂ ਸੱਚਮੁੱਚ ਪੰਥ ਹਿਤੈਸ਼ੀ ਹੁੰਦੇ, ਤਾਂ ਉਸ ਵੇਲੇ ਬੇਅਦਬੀ ਅਤੇ ਗੋਲੀਕਾਂਡ ਦੀਆਂ ਘਟਨਾਵਾਂ ਵਿਰੁੱਧ ਹਾਅ ਦਾ ਨਾਅਰਾ ਮਾਰਦੇ ਅਤੇ ਆਪਣੇ ਅਹੁਦਿਆਂ ਤੋਂ ਅਸਤੀਫ਼ੇ ਦੇ ਕੇ ਕੌਮ ਪ੍ਰਤੀ ਆਪਣੀ ਵਫ਼ਾਦਾਰੀ ਦਾ ਸਬੂਤ ਦਿੰਦੇ। ਪਰ ਸੱਤਾ ਦੇ ਮੋਹ ਨੇ ਉਨ੍ਹਾਂ ਦੇ ਮੂੰਹ ਸਿਉਂ ਦਿੱਤੇ ਸਨ, ਜਿਸ ਕਾਰਨ ਅੱਜ ਦਾ ਸੁਚੇਤ ਸਿੱਖ ਸਮਾਜ ਉਨ੍ਹਾਂ ਦੇ ਇਨ੍ਹਾਂ ਪੰਥਕ ਮੁਖੌਟਿਆਂ ਨੂੰ ਚੰਗੀ ਤਰ੍ਹਾਂ ਪਛਾਣਦਾ ਹੈ।
