ਗੁਰੂਹਰਸਹਾਏ, 24 ਜਨਵਰੀ (ਹਰਚਰਨ ਸਿੰਘ ਸੰਧੂ)-ਸਬ ਡਵੀਜ਼ਨ ਗੁਰੂਹਰਸਹਾਏ ਦੇ ਵੱਖੋ ਗਰਿੱਡਾਂ ਤੋਂ ਬਿਜਲੀ ਸਪਲਾਈ ਦਾ ਬਹੁਤ ਬੁਰਾ ਹਾਲ ਹੋਣ ਕਾਰਨ ਸਰਦੀਆਂ ਦੇ ਦਿਨਾਂ ਵਿਚ ਹਾਹਾਕਾਰ ਮਚੀ ਹੋਈ ਹੈ | ਪਿਛਲੇ ਕਈ ਦਿਨਾਂ ਤੋਂ ਬਿਜਲੀ ਸਪਲਾਈ ਨਾ ਮਾਤਰ ਹੀ ਆ ਰਹੀ ਹੈ ਤੇ ਵੱਡੇ-ਵੱਡੇ ਕੱਟ ਲੱਗ ਰਹੇ ਹਨ | ਇਸ ਸੰਬੰਧੀ ਕਿਸਾਨ ਯੂਨੀਅਨ ਦੇ ਜ਼ਿਲ੍ਹਾ ਆਗੂ ਧਰਮ ਸਿੰਘ ਸਿੱਧੂ ਪਿੰਡ ਲਾਲਚੀਆਂ ਨੇ ਦੱਸਿਆ ਕਿ 66 ਕੇ. ਵੀ. ਬਿਜਲੀ ਗਰਿੱਡ ਹਾਮਿਦ ਤੋਂ 24 ਘੰਟੇ ਬਿਜਲੀ ਪਿੰਡ ਗੁੱਦੜ ਢੰਡੀ ਫੀਡਰ ਰਾਹੀਂ ਇਲਾਕੇ ਦੇ ਸੱਤ ਪਿੰਡਾਂ ਗੁੱਦੜ ਢੰਡੀ, ਚਾਂਦੀ ਵਾਲਾ, ਲਾਲਚੀਆਂ, ਚੱਕ ਬੁੱਢੇ ਸ਼ਾਹ, ਚੱਕ ਸੋਮੀਆ, ਕੋਹਰ ਸਿੰਘ ਵਾਲਾ, ਮਾੜੇ ਕਲਾ ਤੇ ਅਨੇਕਾਂ ਹੀ ਢਾਣੀਆਂ ਨੂੰ ਬਿਜਲੀ ਸਪਲਾਈ ਹੁੰਦੀ ਹੈ | 11 ਕੇ. ਵੀ. ਲਾਈਨ ਬਹੁਤ ਜ਼ਿਆਦਾ ਲੰਬੀ ਹੋਣ ਕਰਨ ਲਗਪਗ ਰੋਜ਼ਾਨਾ ਹੀ ਇਸ ਫੀਡਰ 'ਚ ਫਾਲਟ ਪਿਆ ਰਹਿੰਦਾ ਹੈ, ਜਿਸ ਕਾਰਨ ਬਿਜਲੀ ਸਪਲਾਈ ਠੱਪ ਹੋ ਕੇ ਰਹਿ ਜਾਂਦੀ ਹੈ | ਉਨ੍ਹਾਂ ਦੱਸਿਆ ਕਿ ਪਿਛਲੇ ਕਈ ਦਿਨਾਂ ਤੋਂ ਲਗਾਤਾਰ ਇਸ ਲਾਈਨ ਵਿਚ ਫਾਲਟ ਚੱਲ ਰਿਹਾ ਹੈ ਅਤੇ ਰੋਜ਼ਾਨਾ ਬਿਜਲੀ ਸਪਲਾਈ ਕੇਵਲ ਦੋ, ਚਾਰ ਘੰਟੇ ਹੀ ਚੱਲਦੀ ਹੈ | ਕਿਸਾਨ ਆਗੂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਲਾਈਨਮੈਨ ਤੋਂ ਲੈ ਕੇ ਐੱਸ. ਸੀ. ਤੱਕ ਸਭ ਅਧਿਕਾਰੀਆਂ ਨੂੰ ਬਿਜਲੀ ਸਮੱਸਿਆ ਤੋਂ ਫ਼ੋਨ ਰਾਹੀਂ ਜਾਣੂੰ ਕਰਵਾਇਆ ਪਰ ਕਿਸੇ ਨੇ ਵੀ ਕੋਈ ਸੁਣਵਾਈ ਨਹੀਂ ਕੀਤੀ ਤੇ ਨਾ ਹੀ ਬਿਜਲੀ ਦੀ ਸਪਲਾਈ ਚਾਲੂ ਕਰਨ ਲਈ ਕੋਈ ਠੋਸ ਨੀਤੀ ਅਪਣਾਈ | ਹੁਣ ਵੀ ਇਹਨਾਂ ਬਿਜਲੀ ਕਰਮਚਾਰੀਆਂ ਦੇ ਅਧਿਕਾਰੀਆਂ ਵਲੋਂ ਫ਼ੋਨ ਚੁੱਕਣਾ ਮੁਨਾਸਬ ਨਹੀਂ ਸਮਝਿਆ ਜਾ ਰਿਹਾ | ਕਿਸਾਨ ਆਗੂ ਨੇ ਮੰਗ ਕੀਤੀ ਕਿ ਇਸ ਫੀਡਰ 'ਤੇ ਪਿੰਡ ਜ਼ਿਆਦਾ ਹੋਣ ਕਾਰਨ 11 ਕੇ. ਵੀ. ਲਾਈਨ ਬਹੁਤ ਲੰਬੀ ਹੈ, ਇਸ ਕਰਕੇ ਇਕ ਹੋਰ ਨਵਾਂ ਫੀਡਰ ਬਣਾ ਕੇ ਪਿੰਡਾਂ ਦੀ ਸਪਲਾਈ ਵੰਡੀ ਜਾਵੇ |
