ਫ਼ਿਰੋਜ਼ਪੁਰ, 9 ਮਈ(ਕੁਲਬੀਰ ਸਿੰਘ ਸੋਢੀ)-ਪਿਛਲੇ ਸਾਲ ਸਤਲੁਜ ਦਰਿਆ ਵਿਚ ਆਏ ਲੋਕ ਮਾਰੂ ਹੜ੍ਹਾਂ ਨੇ ਜਿੱਥੇ ਜ਼ਮੀਨਾਂ ਦਾ ਨੁਕਸਾਨ ਕੀਤਾ, ਉੱਥੇ ਦਰਿਆ ਨੇੜੇ ਵੱਸਦੇ ਪਿੰਡਾਂ ਦੇ ਲੋਕਾਂ ਨੂੰ ਬੇਘਰ 'ਤੇ ਬੇਰੁਜ਼ਗਾਰ ਬਣਾ ਦਿੱਤਾ | ਸੂਬਾ ਸਰਕਾਰ ਵਲੋਂ ਸਰਹੱਦੀ ਖੇਤਰ ਦੇ ਲੋਕਾਂ ਦੀ ਸਾਰ ਲੈਂਦੇ ਹੋਏ ਪਸ਼ੂਆਂ ਲਈ ਚਾਰਾ 'ਤੇ ਲੋਕਾਂ ਲਈ ਰਾਸ਼ਨ ਆਦਿ ਦੇ ਪ੍ਰਬੰਧ ਵੱਡੇ ਪੱਧਰ 'ਤੇ ਕੀਤੇ ਗਏ ਸਨ | ਇਸ ਦੇ ਨਾਲ ਆਏ ਹੜ੍ਹਾਂ ਨਾਲ ਦਰਿਆ ਦੇ ਨੇੜਲੇ ਕਈ ਹਿੱਸਿਆਂ ਵਿਚ ਪਾਣੀ ਨੇ ਬਹੁਤ ਮਾਰ ਕੀਤੀ ਸੀ ਤੇ ਲੋਕਾਂ ਨੇ ਦਰਿਆ ਦੇ ਵਹਾਅ ਨੂੰ ਦੂਸਰੇ ਪਾਸੇ ਮੋੜਨ ਲਈ ਨੋਚਾਂ ਬਣਾਈਆਂ ਸਨ ਤਾਂ ਕਿ ਘਰਾਂ ਦਾ ਨੁਕਸਾਨ ਨਾ ਹੋ ਸਕੇ | ਦਰਿਆ ਨੇੜੇ ਸਰਕਾਰ ਵਲੋਂ ਤਿਆਰ ਕੀਤੀਆਂ ਜਾ ਰਹੀਆਂ ਨੋਚਾਂ ਦੀ ਜਾਂਚ ਕਰਨ ਲਈ ਮੰਡੀ ਬੋਰਡ ਦੀ ਮੈਂਬਰ ਤੇ ਆਪ ਆਗੂ ਮਨਜੀਤ ਕੌਰ ਸਾਉਨਾ ਨੇ ਆਪਣੇ ਪਤੀ ਆਪ ਦੇ ਸਾਬਕਾ ਫ਼ੌਜੀ ਵਿੰਗ ਪ੍ਰਧਾਨ ਸੁਬੇਗ ਸਿੰਘ ਨਾਲ ਪਿੰਡ ਗੱਟੀ ਰਾਜੋ ਕੇ 'ਤੇ ਪਿੰਡ ਟੇਂਡੀ ਵਾਲੇ ਦਾ ਦੌਰਾ ਕੀਤਾ | ਮਨਜੀਤ ਕੌਰ ਨੇ ਦੱਸਿਆ ਕਿ ਭਗਵੰਤ ਮਾਨ ਦੇ ਦਿਸ਼ਾ ਨਿਰਦੇਸ਼ ਹੇਠ ਦਰਿਆ ਦੇ ਬੰਨ੍ਹਾਂ ਦੀਆਂ ਪੱਥਰ ਦੀਆਂ ਨੋਚਾਂ ਤੇ ਸੜਕਾਂ ਬਣਾਉਣ ਵਾਸਤੇ ਸਾਰੇ ਕੰਮ ਜੰਗੀ ਪੱਧਰ ਤੇ ਚੱਲ ਰਹੇ ਹਨ, ਜਿਸ ਲਈ ਉਹ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦਾ ਧੰਨਵਾਦ ਕਰਦੇ ਹਨ | ਇਸ ਮੌਕੇ ਜੱਸਾ ਸਿੰਘ, ਅੰਗਰੇਜ਼ ਸਿੰਘ, ਗੁਰਨਾਮ ਸਰਪੰਚ, ਮਿਹਰਬਾਨ, ਰਾਜ ਸਿੰਘ ਆਦਿ ਹਾਜ਼ਰ ਸਨ |
