ਨਥਾਣਾ, 25 ਫਰਵਰੀ (ਗੁਰਦਰਸ਼ਨ ਲੁੱਧੜ): ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਨਥਾਣਾ ਵਿਖੇ ਇਸ ਵਿੱਦਿਅਕ ਅਦਾਰੇ ਦੇ ਲਗਭਗ ਪੌਣੀ ਸਦੀ ਪੁਰਾਣੇ ਵਿਦਿਆਰਥੀ ਬਲਦੇਵ ਸਿੰਘ ਸਾਇੰਸੀ ਵਾਸੀ ਮਲੋਟ ਵਲੋਂ ਸਕੂਲ ਦਾ ਉਚੇਚੇ ਤੌਰ 'ਤੇ ਟੂਰ ਕੀਤਾ ਗਿਆ | ਬਲਦੇਵ ਸਿੰਘ ਨੇ ਦੱਸਿਆ ਕਿ ਉਸਨੇ ਸੰਨ 1951 ਤੋਂ ਲੈ ਕੇ 1956 ਤੱਕ ਇਸ ਵਿੱਦਿਅਕ ਅਦਾਰੇ ਵਿਚ ਪੜ੍ਹਾਈ ਕੀਤੀ | ਉਸ ਸਮੇਂ ਇਸ ਸਕੂਲ ਦਾ ਨਾਮ ਡਿਸਟਿ੍ਕ ਬੋਰਡ ਸਰਕਾਰੀ ਹਾਈ ਸਕੂਲ ਨਥਾਣਾ ਸੀ | ਉਨ੍ਹਾਂ ਸਮਿਆਂ ਦੌਰਾਨ ਬਹੁਤ ਥੋੜੇ ਹਾਈ ਸਕੂਲ ਹੋਇਆ ਕਰਦੇ ਸਨ, ਜਿਸ ਕਰਕੇ ਉਸ ਨੇ ਆਪਣੇ ਨਾਨਕੇ ਪਿੰਡ ਨਥਾਣਾ ਵਿਖੇ ਰਹਿ ਕੇ ਇਸ ਸਕੂਲ ਵਿਚ ਪੜ੍ਹਨਾ ਸ਼ੁਰੂ ਕੀਤਾ | ਉਨ੍ਹਾਂ ਪੁਰਾਣੀਆਂ ਯਾਦਾਂ ਸਾਂਝੀਆਂ ਕਰਦਿਆਂ ਦੱਸਿਆ ਕਿ ਉਸ ਸਮੇਂ ਸਕੂਲ ਦੇ ਮੁਖੀ ਹੈੱਡਮਾਸਟਰ ਹਰਨਾਮ ਸਿੰਘ ਸਨ ਅਤੇ ਉਪ ਮੁਖੀ ਤਖਤ ਸਿੰਘ ਸਨ | ਉਨ੍ਹਾਂ ਭਾਵਕ ਹੁੰਦਿਆਂ ਕਿਹਾ ਕਿ ਇਸ ਵਿੱਦਿਅਕ ਅਦਾਰੇ ਵਿਚ ਆਉਣਾ ਉਸ ਦੀ ਬਹੁਤ ਸਮੇਂ ਤੋਂ ਦਿਲੀਂ ਤਾਂਘ ਸੀ ਜੋ ਅੱਜ ਪੂਰੀ ਹੋਈ | ਬਲਦੇਵ ਸਿੰਘ ਸਾਇੰਸੀ ਨੇ ਕਿਹਾ ਕਿ ਜ਼ਿਲ੍ਹਾ ਬੋਰਡ ਸਰਕਾਰੀ ਹਾਈ ਸਕੂਲ ਨਥਾਣਾ ਦਾ ਵਿੱਦਿਅਕ ਮਿਆਰ ਬਹੁਤ ਉੱਚੇ ਪੱਧਰ ਵਾਲਾ ਸੀ | ਵਿਦਿਆਰਥੀਆਂ ਵਲੋਂ ਪੜ੍ਹਾਈ ਦੇ ਨਾਲ-ਨਾਲ ਖੇਡਾਂ, ਸਕੂਲ ਦੇ ਕੋਠਿਆਂ ਦੀ ਸੰਭਾਲ ਤੋਂ ਇਲਾਵਾ ਅਧਿਆਪਕਾਂ ਦੀ ਆਗਿਆਕਾਰੀ ਵੱਲ ਉਚੇਚੇ ਤੌਰ 'ਤੇ ਧਿਆਨ ਦਿੱਤਾ ਜਾਂਦਾ ਸੀ | ਸਾਇੰਸੀ ਨੇ ਨਥਾਣਾ ਵਾਸੀਆਂ ਨਾਲ ਗੱਲਬਾਤ ਕਰਦਿਆਂ ਆਪਣੇ ਸਮਜਮਾਤੀਆਂ ਦੇ ਨਾਵਾਂ ਦਾ ਜ਼ਿਕਰ ਕੀਤਾ | ਸਕੂਲ ਪ੍ਰਬੰਧਕ ਕਮੇਟੀ ਦੇ ਚੇਅਰਮੈਨ ਬਲਵਿੰਦਰਜੀਤ ਸਿੰਘ, ਸਕੂਲ ਦੇ ਇੰਚਾਰਜ ਪਿ੍ੰਸੀਪਲ ਲਖਵਿੰਦਰ ਕੌਰ ਅਤੇ ਸਮੂਹ ਸਟਾਫ਼ ਵਲੋਂ ਬਲਦੇਵ ਸਿੰਘ ਸਾਇੰਸੀ ਨੂੰ ਸਨਮਾਨਿਤ ਕੀਤਾ ਗਿਆ | ਸਾਇੰਸੀ ਪਰਿਵਾਰ ਦੇ ਮੈਂਬਰ ਬੀਬੀ ਅਮਰਜੀਤ ਕੌਰ ਵਲੋਂ ਸਕੂਲ ਪ੍ਰਬੰਧਕਾਂ ਦਾ ਧੰਨਵਾਦ ਕੀਤਾ ਗਿਆ |
