ਰਾਮਪੁਰਾ ਫੂਲ, 24 ਜੂਨ (ਨਰਪਿੰਦਰ ਸਿੰਘ ਧਾਲੀਵਾਲ)- ਅੱਜ ਦੇ ਭੱਜ-ਦੌੜ ਅਤੇ ਮਾਨਸਿਕ ਤਣਾਅ ਵਾਲੇ ਦੌਰ ਵਿਚ ਸਿਹਤਮੰਦ ਜੀਵਨ ਸ਼ੈਲੀ ਦੀ ਮਹੱਤਤਾ ਨੂੰ ਸਮਝਦਿਆਂ, ਰਾਮਪੁਰਾ ਫੂਲ ਵਿਖੇ ਸਥਾਨਕ ਔਰਤਾਂ ਵਲੋਂ ਇਕ ਵਿਸ਼ੇਸ਼ ਯੋਗ ਕੈਂਪ ਦਾ ਆਯੋਜਨ ਕੀਤਾ ਗਿਆ । ਇਸ ਕੈਂਪ ’ਚ ਵੱਡੀ ਗਿਣਤੀ ਵਿਚ ਹਰ ਉਮਰ ਦੀਆਂ ਔਰਤਾਂ ਨੇ ਹਿੱਸਾ ਲਿਆ ਅਤੇ ਮਾਹਿਰ ਟਰੇਨਰ ਪ੍ਰਵੀਨ ਸ਼ਰਮਾ ਦੀ ਦੇਖ-ਰੇਖ ਹੇਠ ਵੱਖ-ਵੱਖ ਆਸਣਾਂ ਅਤੇ ਪ੍ਰਾਣਾਯਾਮ ਦਾ ਅਭਿਆਸ ਕੀਤਾ । ਕੈਂਪ ਦੇ ਪ੍ਰਬੰਧਕਾਂ ਨੇ ਦੱਸਿਆ ਕਿ ਇਸ ਆਯੋਜਨ ਦਾ ਮੁੱਖ ਮਕਸਦ ਔਰਤਾਂ ਨੂੰ ਆਪਣੀ ਸਿਹਤ ਪ੍ਰਤੀ ਜਾਗਰੂਕ ਕਰਨਾ ਹੈ, ਕਿਉਂਕਿ ਇੱਕ ਪਰਿਵਾਰ ਦੀ ਸਿਹਤ ਔਰਤ ਦੀ ਸਿਹਤ ਨਾਲ ਸਿੱਧੀ ਜੁੜੀ ਹੁੰਦੀ ਹੈ। ਸਿਹਤ ਮਾਹਿਰਾਂ ਅਨੁਸਾਰ, ਰੋਜ਼ਾਨਾ ਯੋਗ ਕਰਨ ਨਾਲ ਨਾ ਸਿਰਫ਼ ਸਰੀਰਕ ਲਚਕਤਾ ਅਤੇ ਤਾਕਤ ਵਧਦੀ ਹੈ, ਬਲਕਿ ਇਹ ਮਾਨਸਿਕ ਤਣਾਅ ਅਤੇ ਚਿੰਤਾ ਨੂੰ ਘਟਾਉਣ ਵਿਚ ਵੀ ਬੇਹੱਦ ਸਹਾਈ ਹੁੰਦਾ ਹੈ । ਔਰਤਾਂ ’ਚ ਆਮ ਤੌਰ ’ਤੇ ਦੇਖੀਆਂ ਜਾਣ ਵਾਲੀਆਂ ਸਮੱਸਿਆਵਾਂ ਜਿਵੇਂ ਕਿ ਹਾਰਮੋਨਲ ਅਸੰਤੁਲਨ, ਥਾਇਰਾਇਡ, ਜੋੜਾਂ ਦਾ ਦਰਦ, ਅਤੇ ਹਾਈ ਬਲੱਡ ਪ੍ਰੈਸ਼ਰ ਨੂੰ ਕੰਟਰੋਲ ਕਰਨ ਵਿਚ ਯੋਗ ਇਕ ਕੁਦਰਤੀ ਇਲਾਜ ਵਜੋਂ ਕੰਮ ਕਰਦਾ ਹੈ। ਜੇਕਰ ਪੰਜਾਬ ਪੱਧਰ ’ਤੇ ਸਿਹਤ ਦੀ ਮੌਜੂਦਾ ਸਥਿਤੀ ’ਤੇ ਨਜ਼ਰ ਮਾਰੀਏ, ਤਾਂ ਗੈਰ-ਛੂਤਕਾਰੀ ਬਿਮਾਰੀਆਂ ਦਾ ਗ੍ਰਾਫ਼ ਲਗਾਤਾਰ ਵਧ ਰਿਹਾ ਹੈ, ਜਿਸ ਕਾਰਨ ਯੋਗ ਵਰਗੀਆਂ ਸਿਹਤਮੰਦ ਗਤੀਵਿਧੀਆਂ ਦੀ ਲੋੜ ਹੋਰ ਵੀ ਵੱਧ ਜਾਂਦੀ ਹੈ-‘ਨੈਸ਼ਨਲ ਫੈਮਿਲੀ ਹੈਲਥ ਸਰਵੇ’ ਮੁਤਾਬਿਕ ਪੰਜਾਬ ਦੀਆਂ ਲਗਭਗ 40% ਤੋਂ ਵੱਧ ਔਰਤਾਂ ਵੱਧ ਵਜ਼ਨ ਜਾਂ ਮੋਟਾਪੇ ਦਾ ਸ਼ਿਕਾਰ ਹਨ, ਜੋ ਕਿ ਦੇਸ਼ ਦੇ ਔਸਤ ਨਾਲੋਂ ਕਾਫੀ ਜ਼ਿਆਦਾ ਹੈ । ਪੰਜਾਬ ਵਿੱਚ 30 ਤੋਂ 60 ਸਾਲ ਦੀ ਉਮਰ ਵਰਗ ਵਿੱਚ ਹਰ ਤੀਜਾ ਵਿਅਕਤੀ ਹਾਈ ਬਲੱਡ ਪ੍ਰੈਸ਼ਰ ਜਾਂ ਸ਼ੂਗਰ ਦੀ ਸ਼ੁਰੂਆਤੀ ਜਾਂ ਗੰਭੀਰ ਸਟੇਜ ’ਤੇ ਹੈ । ਬਦਲਦੀ ਜੀਵਨ ਸ਼ੈਲੀ ਕਾਰਨ ਸ਼ਹਿਰੀ ਅਤੇ ਪੇਂਡੂ ਖੇਤਰਾਂ ਦੀਆਂ ਲਗਭਗ 25-30 ਫੀਸਦੀ ਔਰਤਾਂ ਕਿਸੇ ਨਾ ਕਿਸੇ ਪੱਧਰ ’ਤੇ ਮਾਨਸਿਕ ਤਣਾਅ ਜਾਂ ਨੀਂਦ ਨਾ ਆਉਣ ਦੀ ਸਮੱਸਿਆ ਨਾਲ ਜੂਝ ਰਹੀਆਂ ਹਨ । ਪੰਜਾਬ ਸਰਕਾਰ ਵਲੋਂ ਸੂਬੇ ਭਰ ਵਿਚ ਸੀ.ਐਮ. ਦੀ ਯੋਗਸ਼ਾਲਾ ਮੁਹਿੰਮ ਤਹਿਤ ਹੁਣ ਤੱਕ ਹਜ਼ਾਰਾਂ ਮੁਫ਼ਤ ਯੋਗ ਕੈਂਪ ਲਗਾਏ ਜਾ ਚੁੱਕੇ ਹਨ, ਜਿਸ ਵਿਚ ਔਰਤਾਂ ਦੀ ਭਾਗੀਦਾਰੀ 60 ਫੀਸਦੀ ਤੋਂ ਵਧੇਰੇ ਰਹੀ ਹੈ । ਇਹ ਵੀ ਕਿ ਰਾਮਪੁਰਾ ਫੂਲ ਵਿਚ ਔਰਤਾਂ ਵਲੋਂ ਖੁਦ ਅੱਗੇ ਆ ਕੇ ਅਜਿਹਾ ਕੈਂਪ ਲਗਾਉਣਾ ਸਮਾਜ ਵਿਚ ਆ ਰਹੀ ਸਿਹਤ ਪ੍ਰਤੀ ਜਾਗਰੂਕਤਾ ਦਾ ਪ੍ਰਤੀਕ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਰੋਜ਼ਾਨਾ ਸਿਰਫ਼ 30 ਤੋਂ 45 ਮਿੰਟ ਯੋਗ ਅਤੇ ਪ੍ਰਾਣਾਯਾਮ ਜਿਵੇਂ ਅਨੁਲੋਮ-ਵਿਲੋਮ ਅਤੇ ਕਪਾਲਭਾਤੀ ਨੂੰ ਦਿੱਤੇ ਜਾਣ, ਤਾਂ ਦਵਾਈਆਂ ’ਤੇ ਹੋਣ ਵਾਲੇ ਘਰੇਲੂ ਖਰਚੇ ਨੂੰ 40 ਫੀਸਦੀ ਤੱਕ ਘਟਾਇਆ ਜਾ ਸਕਦਾ ਹੈ । ਕੈਂਪ ਦੇ ਅਖ਼ੀਰ ਵਿਚ ਬਲਜੀਤ ਕੌਰ ਧਾਲੀਵਾਲ, ਮਹਿੰਦਰਜੀਤ ਕੌਰ, ਵੀਨਾ ਗਰਗ, ਰਜਨੀ, ਦਿਸ਼ਾ, ਅਨੀਤਾ, ਪੂਜਾ, ਸਫ਼ਾਲੀ, ਰੇਨੂੰ, ਰੀਤਕਾ, ਮੀਨੂੰ, ਸਰੋਜ਼, ਰੂਬੀ ਤੇ ਸਮੂਹ ਹਾਜ਼ਰੀਨ ਨੇ ਪ੍ਰਣ ਲਿਆ ਕਿ ਉਹ ਨਾ ਸਿਰਫ਼ ਖੁਦ ਰੋਜ਼ਾਨਾ ਯੋਗ ਕਰਨਗੇ, ਬਲਕਿ ਆਪਣੇ ਪਰਿਵਾਰ ਅਤੇ ਆਲੇ-ਦੁਆਲੇ ਦੇ ਲੋਕਾਂ ਨੂੰ ਵੀ ਇਸ ਨਿਰੋਗ ਮਾਰਗ ਨਾਲ ਜੋੜਨਗੇ।
