ਸਾਹਿਤਕ ਮੇਲੇ ’ਚ ਧਵਲੇਸ਼ਬੀਰ ਸਿੰਘ ਦਾ ਨਾਟਕ ਬਣਿਆ ਖਿੱਚ ਦਾ ਕੇਂਦਰ
ਬਠਿੰਡਾ , 2 ਨਵੰਬਰ ( ਅੰਮ੍ਰਿਤਪਾਲ ਸਿੰਘ ਵਲ੍ਹਾਣ )- ਮੌੜ ਸਾਹਿਤਕ ਮੇਲੇ ਦੌਰਾਨ ਨੌਜਵਾਨ ਕਲਾਕਾਰ ਧਵਲੇਸ਼ਬੀਰ ਸਿੰਘ ਵਲੋਂ ਪੇਸ਼ ਕੀਤਾ ਗਿਆ ਨਾਟਕ ‘ ਸੁਤ ਅਪਰਾਧ ਕਰਤ ਹੈ ਜੇਤੇ ’ ਦਰਸ਼ਕਾਂ ਲਈ ਖਿੱਚ ਦਾ ਕੇਂਦਰ ਬਣਿਆ ਰਿਹਾ । ਨਸ਼ਿਆਂ ਦੀ ਲਾਹਨਤ , ਬੱਚਿਆਂ ਦੀ ਵਿਗੜਦੀ ਸੰਗਤ ਅਤੇ ਮਾਪਿਆਂ ਦੀ ਜ਼ਿੰਮੇਵਾਰੀ ਵਰਗੇ ਗੰਭੀਰ ਸਮਾਜਿਕ ਮੁੱਦਿਆਂ ਨੂੰ ਛੂੰਹਦੇ ਇਸ ਨਾਟਕ ਨੇ ਦਰਸ਼ਕਾਂ ਨੂੰ ਸੋਚਣ ਲਈ ਮਜਬੂਰ ਕਰ ਦਿੱਤਾ ।
ਬਠਿੰਡਾ , 2 ਨਵੰਬਰ ( ਅੰਮ੍ਰਿਤਪਾਲ ਸਿੰਘ ਵਲ੍ਹਾਣ )- ਮੌੜ ਸਾਹਿਤਕ ਮੇਲੇ ਦੌਰਾਨ ਨੌਜਵਾਨ ਕਲਾਕਾਰ ਧਵਲੇਸ਼ਬੀਰ ਸਿੰਘ ਵਲੋਂ ਪੇਸ਼ ਕੀਤਾ ਗਿਆ ਨਾਟਕ ‘ ਸੁਤ ਅਪਰਾਧ ਕਰਤ ਹੈ ਜੇਤੇ ’ ਦਰਸ਼ਕਾਂ ਲਈ ਖਿੱਚ ਦਾ ਕੇਂਦਰ ਬਣਿਆ ਰਿਹਾ । ਨਸ਼ਿਆਂ ਦੀ ਲਾਹਨਤ , ਬੱਚਿਆਂ ਦੀ ਵਿਗੜਦੀ ਸੰਗਤ ਅਤੇ ਮਾਪਿਆਂ ਦੀ ਜ਼ਿੰਮੇਵਾਰੀ ਵਰਗੇ ਗੰਭੀਰ ਸਮਾਜਿਕ ਮੁੱਦਿਆਂ ਨੂੰ ਛੂੰਹਦੇ ਇਸ ਨਾਟਕ ਨੇ ਦਰਸ਼ਕਾਂ ਨੂੰ ਸੋਚਣ ਲਈ ਮਜਬੂਰ ਕਰ ਦਿੱਤਾ । ਨਾਟਕ ਦੇ ਲੇਖਕ ਐਡਵੋਕੇਟ ਰਣਬੀਰ ਸਿੰਘ ਬਰਾੜ ਗਿੱਲਪੱਤੀ ਨੇ ਦੱਸਿਆ ਕਿ ਆਮ ਤੌਰ ’ ਤੇ ਹਰ ਕੋਈ ਔਰਤਾਂ ਦੇ ਅਧਿਕਾਰਾਂ ਦੀ ਗੱਲ ਕਰਦਾ ਹੈ , ਪਰ ਇਸ ਨਾਟਕ ਰਾਹੀਂ ਔਰਤਾਂ ਨੂੰ ਆਪਣੇ ਫ਼ਰਜ਼ਾਂ ਅਤੇ ਬੱਚਿਆਂ ਪ੍ਰਤੀ ਜ਼ਿੰਮੇਵਾਰੀਆਂ ਬਾਰੇ ਵੀ ਜਾਗਰੂਕ ਕਰਨ ਦਾ ਯਤਨ ਕੀਤਾ ਗਿਆ ਹੈ । ਨਾਟਕ ਦਾ ਮੁੱਖ ਪਾਤਰ ਨਸ਼ਿਆਂ ਦੀ ਲਪੇਟ ਵਿਚ ਆ ਕੇ ਮਾਨਸਿਕ ਸੰਤੁਲਨ ਗੁਆ ਚੁੱਕਿਆ ਦਿਖਾਇਆ ਗਿਆ ਹੈ , ਜੋ ਗੁਰੂ ਘਰ ਦੇ ਬਾਹਰ ਜੂਠੀਆਂ ਪੱਤਲਾਂ ਵਿਚੋਂ ਰੋਟੀ ਖਾਂਦਿਆਂ ਇਕ ਪਾਸੇ ਬਾਬੇ ਨਾਲ ਗੱਲਾਂ ਕਰਦਾ ਹੈ ਅਤੇ ਦੂਜੇ ਪਾਸੇ ਆਪਣੀ ਮਰ ਚੁੱਕੀ ‘ ਮਾਂ ’ ਨੂੰ ਆਪਣੇ ਇਸ ਹਾਲਾਤ ਲਈ ਜ਼ਿੰਮੇਵਾਰ ਠਹਿਰਾਉਂਦਾ ਹੈ ਕਿਉਂਕਿ ਸਭ ਤੋਂ ਪਹਿਲਾਂ ‘ ਮਾਂ ’ ਨੂੰ ਹੀ ਪੁੱਤਰ ਦੇ ਵਿਗੜਦੇ ਕਦਮਾਂ ਦਾ ਪਤਾ ਲੱਗਿਆ ਸੀ , ਜਦੋਂ ਉਸ ਦੇ ਸਕੂਲ ਬੈਗ ਵਿਚੋਂ ਨਸ਼ਾ ਮਿਲਿਆ ਪਰ ‘ ਮਾਂ ’ ਵਲੋਂ ਸਮੇਂ ਸਿਰ ਸਖ਼ਤੀ ਨਾ ਕਰਨ ਅਤੇ ਪਿਤਾ ਨੂੰ ਇਸ ਬਾਰੇ ਜਾਣਕਾਰੀ ਨਾ ਦੇਣ ਕਾਰਨ ਹਾਲਾਤ ਵਿਗੜਦੇ ਚਲੇ ਗਏ । ਲੇਖਕ ਨੇ ਕਿਹਾ ਕਿ ਇਹ ਨਾਟਕ ਸੱਚੀਆਂ ਘਟਨਾਵਾਂ ’ ਤੇ ਆਧਾਰਿਤ ਹੈ ਤੇ ਅਜੋਕੇ ਸਮੇਂ ਵਿਚ ਅਜਿਹੀਆਂ ਸਮਾਜਿਕ ਪੇਸ਼ਕਾਰੀਆਂ ਦੀ ਵੱਡੀ ਲੋੜ ਹੈ । ਨਾਟਕ ਦੇ ਕਲਾਕਾਰ ਧਵਲੇਸ਼ਬੀਰ ਸਿੰਘ ਨੇ ਆਪਣੀ ਦਮਦਾਰ ਅਦਾਕਾਰੀ ਨਾਲ ਪੂਰੇ ਨਾਟਕ ਦੌਰਾਨ ਦਰਸ਼ਕਾਂ ਨੂੰ ਕੀਲ ਕੇ ਰੱਖਿਆ । ਜ਼ਿਕਰਯੋਗ ਹੈ ਕਿ ਧਵਲੇਸ਼ਬੀਰ ਸਿੰਘ ‘ ਜ਼ਫ਼ਰਨਾਮਾ ਸਾਹਿਬ ’ ਜ਼ੁਬਾਨੀ ਯਾਦ ਕਰਨ ਵਾਲਾ ਦੁਨੀਆ ਦਾ ਪਹਿਲਾ ਬੱਚਾ ਹੈ । ਮੇਲਾ ਪ੍ਰਬੰਧਕ ਭੁਪਿੰਦਰ ਸਿੰਘ ਮਾਨ ਨੇ ਧਵਲੇਸ਼ਬੀਰ ਸਿੰਘ ਦੇ ਨਾਟਕ ਦੀ ਸ਼ਲਾਘਾ ਕੀਤੀ ।
