ਦੋਰਾਹਾ, 3 ਫਰਵਰੀ (ਮਨਜੀਤ ਸਿੰਘ ਗਿੱਲ)-ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਦੀ ਇਕੱਤਰਤਾ ਵਿਚ ਸੁਰਜੀਤ ਖ਼ੁਰਸ਼ੀਦੀ ਦੀ ਕਿਤਾਬ 'ਆਓ ਵਧੀਆ ਪੰਜਾਬੀ ਲਿਖੀਏ' ਦਾ ਛੇਵਾਂ ਐਡੀਸ਼ਨ ਰੀਲੀਜ਼ ਕਰਿਆ ਗਿਆ | ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਦੀ ਫ਼ਰਵਰੀ ਮਹੀਨੇ ਦੀ ਮਾਸਿਕ ਇਕੱਤਰਤਾ ਲਾਇਬ੍ਰੇਰੀ ਦੇ ਹਾਲ ਵਿਚ ਪ੍ਰਧਾਨ ਅਮਰਿੰਦਰ ਸੋਹਲ ਦੀ ਪ੍ਰਧਾਨਗੀ ਹੇਠ ਹੋਈ | ਸਭ ਤੋਂ ਪਹਿਲਾਂ ਪ੍ਰਸਿੱਧ ਪੰਜਾਬੀ ਭਾਸ਼ਾ ਵਿਦਵਾਨ ਅਤੇ ਲੇਖਕ ਸਵਰਗੀ ਸੁਰਜੀਤ ਖ਼ੁਰਸ਼ੀਦੀ ਦੀ ਚਰਚਿਤ ਕਿਤਾਬ 'ਆਓ ਵਧੀਆ ਪੰਜਾਬੀ ਲਿਖੀਏ' ਦਾ ਛੇਵਾਂ ਐਡੀਸ਼ਨ ਹਾਜ਼ਰੀਨ ਵੱਲੋਂ ਰੀਲੀਜ਼ ਕਰਿਆ ਗਿਆ | ਇਸ ਕਿਤਾਬ ਦੀਆਂ ਹੁਣ ਤੀਕਰ ਪੰਜ ਹਜ਼ਾਰ ਕਿਤਾਬਾਂ ਪਾਠਕਾਂ ਦੇ ਹੱਥਾਂ ਵਿਚ ਜਾ ਚੁੱਕੀਆਂ ਹਨ | ਇਸ ਕਿਤਾਬ ਬਾਰੇ ਗ਼ਜ਼ਲਗੋ ਐੱਸ. ਨਸੀਮ ਨੇ ਚਾਨਣਾ ਪਾਉਂਦਿਆ ਕਿਹਾ ਕਿ ਮੌਜੂਦਾ ਸਮੇਂ ਵਿਚ ਪੰਜਾਬੀ ਭਾਸ਼ਾ ਲਿਖਣ ਦੀਆਂ ਬੇਸ਼ੁਮਾਰ ਗ਼ਲਤੀਆਂ ਪਾਈਆਂ ਜਾਂਦੀਆਂ ਹਨ | ਇਹ ਸਾਡੇ ਲਈ ਫ਼ਿਕਰਮੰਦੀ ਵਾਲ਼ੀ ਗੱਲ ਹੈ | ਉਨ੍ਹਾਂ ਨੇ ਕਿਹਾ ਕਿ ਇਸ ਕਿਤਾਬ ਨੂੰ ਪੜ੍ਹ ਕੇ ਸਾਨੂੰ ਪੰਜਾਬੀ ਲਿਖਣ ਦੀਆਂ ਅਨੇਕਾਂ ਤਰੁੱਟੀਆਂ ਬਾਰੇ ਪਤਾ ਲੱਗਦਾ ਹੈ | ਜਸਵੀਰ ਝੱਜ ਨੇ ਸੁਰਜੀਤ ਖ਼ੁਰਸ਼ੀਦੀ ਦੀ ਸ਼ਖ਼ਸੀਅਤ ਬਾਰੇ ਚਾਨਣਾ ਪਾਉਂਦਿਆਂ ਕਿਹਾ ਕਿ ਖ਼ੁਰਸ਼ੀਦੀ ਜੀ ਬੇਬਾਕ ਸੁਭਾਅ ਦੇ ਮਾਲਕ ਸਨ ਅਤੇ ਉਹ ਕਈ ਭਾਸ਼ਾਵਾਂ ਦੇ ਗਿਆਤਾ ਸਨ | ਰਚਨਾਵਾਂ ਦੇ ਦੌਰ ਵਿਚ ਭੁਪਿੰਦਰ ਡਿਓਢ ਨੇ ਮਿੰਨੀ ਕਹਾਣੀ 'ਮਾਫ਼ੀ' ਸੁਣਾਈ | ਜਿਸ 'ਤੇ ਗੰਭੀਰ ਚਰਚਾ ਹੋਈ | ਸਭਾ ਵਿਚ ਪਹਿਲੀ ਵਾਰੀ ਆਏ ਨੌਜਵਾਨ ਗੀਤਕਾਰ ਗੋਪੀ ਜਾਤੀਵਾਲ਼ ਨੂੰ ਸਭਾ ਵਲੋਂ ਜੀ ਆਇਆਂ ਕਿਹਾ ਗਿਆ | ਉਸ ਨੇ ਆਪਣਾ ਗੀਤ 'ਜ਼ਿੰਦਗੀ ਹਸੀਨ ਹੋ ਗਈ' ਨੂੰ ਖ਼ੂਬਸੂਰਤ ਤਰੀਕੇ ਨਾਲ ਗਾ ਕੇ ਪੇਸ਼ ਕੀਤਾ | ਸੁਖਚੈਨ ਸਿੰਘ ਨੂੰ ਵੀ ਸਭਾ ਵਿਚ ਪਹਿਲੀ ਵਾਰ ਆਉਣ 'ਤੇ ਮੁਬਾਰਕਬਾਦ ਦਿੱਤੀ ਗਈ | ਇੰਦਰਜੀਤ ਮਲੀਪੁਰ ਨੇ ਗ਼ਜ਼ਲ 'ਨੀਂਦਰ ਚੈਨ ਨਸ਼ੇ ਦੇ ਹੋਏ' ਸੁਣਾਈ | ਰਚਨਾਵਾਂ ਉੱਤੇ ਪ੍ਰਭਜੋਤ ਰਾਮਪੁਰ, ਕੁਲਵਿੰਦਰ ਸਿੰਘ, ਸਿਕੰਦਰ ਰਾਮਪੁਰੀ, ਦਲਜਿੰਦਰ ਸਿੰਘ ਮਾਂਗਟ, ਮਨਦੀਪ ਸਿੰਘ ਮਾਂਗਟ ਅਤੇ ਡਾ. ਟਹਿਲ ਸਿੰਘ ਜੱਸਲ ਨੇ ਆਪਣੇ ਮੁੱਲਵਾਨ ਵਿਚਾਰ ਪ੍ਰਗਟ ਕੀਤੇ | ਸਭਾ ਦੇ ਮੈਂਬਰ ਵਿਸ਼ਵਿੰਦਰ ਰਾਮਪੁਰ ਦੇ ਪਿਤਾ ਮਾਸਟਰ ਬਸੰਤ ਲਾਲ ਦੇ ਅਕਾਲ ਚਲਾਣੇ ਉੱਤੇ ਸਭਾ ਵੱਲੋਂ ਸ਼ੋਕ ਮਤਾ ਪ੍ਰਗਟ ਕਰਿਆ ਗਿਆ | ਸਭਾ ਦੀ ਕਾਰਵਾਈ ਜਨਰਲ ਸਕੱਤਰ ਪ੍ਰਭਜੋਤ ਰਾਮਪੁਰ ਨੇ ਬਾਖ਼ੂਬੀ ਨਿਭਾਈ | ਅੰਤ ਵਿਚ ਪ੍ਰਧਾਨ ਅਮਰਿੰਦਰ ਸੋਹਲ ਨੇ ਸਾਰੇ ਸਾਹਿਤਕਾਰਾਂ ਦਾ ਮੀਟਿੰਗ ਵਿਚ ਆਉਣ 'ਤੇ ਧੰਨਵਾਦ ਕਰਿਆ |
