ਮਾਛੀਵਾੜਾ ਸਾਹਿਬ, 7 ਮਾਰਚ (ਮਨੋਜ ਕੁਮਾਰ)-ਅਮਰੀਕਾ ਤੇ ਇਜਰਾਈਲ ਵਲੋਂ ਈਰਾਨ ਨਾਲ ਕੀਤੀ ਜਾ ਰਹੀ ਜੰਗ ਭਾਵੇਂ ਨਿੱਤ ਨਵਾਂ ਮੋੜ ਲੈ ਰਹੀ ਹੈ ਤੇ ਆਮ ਲੋਕਾਂ ਵਿਚ ਇਸ ਗੱਲ ਦੀ ਸ਼ੰਕਾ ਡੂੰਘੀ ਹੁੰਦੀ ਜਾ ਰਹੀ ਹੈ ਕਿ ਜੰਗ ਦਾ ਅਸਰ ਕਿਤੇ ਪੈਟਰੋਲ ਤੇ ਡੀਜ਼ਲ ਦੀਆਂ ਕੀਮਤਾਂ 'ਤੇ ਨਾ ਪਵੇ ਤੇ ਹੋ ਸਕਦਾ ਹੈ ਕਿ ਭਵਿੱਖ ਵਿਚ ਕਿਤੇ ਮਿਲਣ ਹੀ ਨਾ | ਪਰ ਇਸ ਸ਼ੰਕੇ ਨੂੰ ਸਿਰੇ ਤੋਂ ਨਕਾਰਦਿਆਂ ਭਾਰਤ ਪੈਟਰੋਲੀਅਮ, ਇੰਡੀਅਨ ਆਇਲ ਤੇ ਇਨ੍ਹਾਂ ਦੇ ਤੀਸਰੇ ਸਹਿਯੋਗੀ ਸੰਗਠਨ ਦੇ ਸਾਂਝੇ ਸਪੋਕਸਪਰਸਨ ਤੇ ਰਾਜਨੀਤਿਕ ਆਗੂ ਕਸਤੂਰੀ ਲਾਲ ਮਿੰਟੂ ਨੇ ਗੱਲਬਾਤ ਦੌਰਾਨ ਕਿਹਾ ਕਿ ਫਿਲਹਾਲ ਨਾ ਤਾਂ ਪੈਟਰੋਲ ਦੀ ਕੋਈ ਘਾਟ ਹੈ ਤੇ ਨਾ ਹੀ ਡੀਜ਼ਲ ਦੀ | ਮਿੰਟੂ ਜੋ ਖ਼ੁਦ ਪੈਟਰੋਲ ਪੰਪ ਦੇ ਮਾਲਕ ਹਨ ਨੇ ਕਿਹਾ ਕਿ ਇਨ੍ਹਾਂ ਦੋਵਾਂ ਦੀ ਸਪਲਾਈ ਨਿਰੰਤਰ ਮਿਲ ਰਹੀ ਹੈ ਤੇ ਫਿਲਹਾਲ ਕੰਪਨੀ ਵਲੋਂ ਅਜੇ ਤੱਕ ਅਜਿਹੀ ਕਿਸੇ ਕਿਸਮ ਦੀ ਕੋਈ ਘਾਟ ਦਾ ਫ਼ਰਮਾਨ ਜਾਰੀ ਨਹੀ ਕੀਤਾ ਹੈ | ਉਨ੍ਹਾਂ ਆਮ ਲੋਕਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਤੇ ਆਇਲ ਕੰਪਨੀਆਂ ਕੋਲ ਪੂਰਾ ਸਟਾਕ ਉਪਲਬਧ ਹੈ |
