ਮਲੌਦ, 10 ਮਾਰਚ (ਸਹਾਰਨ ਮਾਜਰਾ) -ਐਸ. ਸੀ./ਬੀ. ਸੀ. ਅਧਿਆਪਕ ਯੂਨੀਅਨ ਦੇ ਸੂਬਾ ਸਕੱਤਰ ਜਨਰਲ ਬਲਵਿੰਦਰ ਸਿੰਘ ਲਤਾਲਾ ਨੇ ਕਿਹਾ ਕਿ ਪਿ੍ੰਸੀਪਲ ਤਰੱਕੀ ਲਈ ਟੈੱਟ ਦੇ ਮਾਮਲੇ ਤੇ ਵਿਰੋਧ ਵਿਖਾਉਣ ਲਈ ਪੰਜਾਬ ਦੀਆਂ ਸਮੂਹ ਜਥੇਬੰਦੀਆਂ ਵਲੋਂ ਕੱਲ੍ਹ 12 ਮਾਰਚ ਨੂੰ ਵਿਧਾਨ ਸਭਾ ਦਾ ਘਿਰਾਓ ਕੀਤਾ ਜਾਵੇਗਾ | ਉਨ੍ਹਾਂ ਦੱਸਿਆ ਕਿ ਸਰਕਾਰ ਨੇ ਮੁਲਾਜ਼ਮਾਂ ਨੂੰ ਪੁਰਾਣੀ ਪੈਨਸ਼ਨ, ਡੀ. ਏ. ਤੇ ਹੋਰ ਭੱਤੇ ਤਾਂ ਕੀ ਦੇਣੇ ਸਨ ਬਲਕਿ 8 ਮਾਰਚ ਨੂੰ ਵਿਧਾਨ ਸਭਾ ਦਾ ਘਿਰਾਓ ਕਰਨ ਜਾਂਦੇ ਮੁਲਜ਼ਮਾਂ ਨੂੰ ਬੇਤਹਾਸ਼ਾ ਕੁੱਟਿਆ, ਅਧਿਆਪਕਾਂ ਦੀਆਂ ਪੱਗਾਂ ਤੇ ਚੁੰਨੀਆਂ ਘੱਟੇ ਵਿੱਚ ਰੋਲੀਆਂ ਗਈਆਂ | ਜਿਸ ਦਾ ਐੱਸ. ਸੀ./ਬੀ. ਸੀ. ਯੂਨੀਅਨ ਕਰੜੇ ਸ਼ਬਦਾਂ ਵਿੱਚ ਨਿੰਦਾ ਕਰਦੀ ਹੈ | ਆਗੂ ਨੇ ਕਿਹਾ ਕਿ ਇਸੇ ਤਰ੍ਹਾਂ ਸਰਕਾਰ ਟੈੱਟ ਤੇ ਮੁੱਦੇ ਨੂੰ ਵੀ ਮੁਲਾਜ਼ਮਾਂ ਨੂੰ ਰੋਲਣਾ ਚਾਹੁੰਦੀ ਹੈ | ਬਲਵਿੰਦਰ ਲਤਾਲਾ ਨੇ ਕਿਹਾ ਕਿ ਕੱਲ੍ਹ 12 ਮਾਰਚ ਦੇ ਵਿਧਾਨ ਸਭਾ ਦੇ ਘਰਾਓ ਦੌਰਾਨ ਐੱਸ. ਸੀ./ਬੀ. ਸੀ. ਅਧਿਆਪਕ ਯੂਨੀਅਨ ਵੱਡੇ ਕਾਫਲੇ ਤੇ ਰੂਪ ਵਿੱਚ ਸ਼ਾਮਿਲ ਹੋਵੇਗੀ ਅਤੇ ਟੈੱਟ ਦੇ ਮਾਮਲੇ ਦੇ ਹੱਲ ਹੋਣ ਤੱਕ ਹਰ ਸੰਘਰਸ਼ ਵਿੱਚ ਅਧਿਆਪਕ ਜਥੇਬੰਦੀਆਂ ਦੇ ਨਾਲ ਮੋਢੇ ਨਾਲ ਮੋਢਾ ਲਾ ਕੇ ਖੜ੍ਹੀ ਰਹੇਗੀ |
