ਸਮਰਾਲਾ, 10 ਮਾਰਚ (ਗੋਪਾਲ ਸੋਫਤ)-ਇੱਥੋਂ ਨਜ਼ਦੀਕ ਪੁਲਿਸ ਚੌਂਕੀ ਹੇਡੋਂ ਵਿਖੇ ਚੈਕਿੰਗ ਲਈ ਲਗਾਏ ਗਏ ਹਾਈਟੈੱਕ ਨਾਕੇ ਨੂੰ ਤੋੜ ਕੇ ਕਾਰ ਭਜਾਉਣ ਵਾਲਿਆਂ ਨੂੰ ਕਾਬੂ ਕਰਨ ਲਈ ਪਿੱਛਾ ਕਰ ਰਹੀ ਪੁਲਿਸ ਦੀ ਗੱਡੀ ਪਲਟ ਜਾਣ ਨਾਲ ਇਕ ਏ. ਐਸ. ਆਈ ਸਮੇਤ ਦੋ ਮੁਲਾਜ਼ਮਾਂ ਦੇ ਸੱਟਾਂ ਲੱਗੀਆਂ ਹਨ | ਸਥਾਨਕ ਥਾਣਾ ਮੁਖੀ ਹਰਵਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਚੌਂਕੀ ਹੇਡੋਂ ਵਿਖੇ ਲੁਧਿਆਣਾ ਤੋਂ ਚੰਡੀਗੜ੍ਹ ਨੂੰ ਜਾਣ ਵਾਲੀਆਂ ਗੱਡੀਆਂ ਦੀ ਚੈਕਿੰਗ ਅਤੇ ਸ਼ੱਕੀ ਬੰਦਿਆਂ ਸਬੰਧੀ ਨਾਕਾ ਬੰਦੀ ਕੀਤੀ ਹੋਈ ਸੀ | ਇਸੇ ਇਸੇ ਦੌਰਾਨ ਲੁਧਿਆਣੇ ਵਾਲੇ ਪਾਸਿਓਾ ਆ ਰਹੀ ਇੱਕ ਸਵਿਫ਼ਟ ਕਾਰ ਨੂੰ ਜਦੋਂ ਰੋਕਣ ਲਈ ਬੈਰੀਕੇਟ ਅੱਗੇ ਕੀਤੇ ਗਏ ਤਾਂ ਉਹ ਸਵਿਫ਼ਟ ਕਾਰ ਦਾ ਚਾਲਕ ਬੈਰੀਕੇਟ ਨੂੰ ਤੋੜਦਾ ਹੋਇਆ ਗੱਡੀ ਭਜਾ ਕੇ ਲੈ ਗਿਆ | ਉਨ੍ਹਾਂ ਨੇ ਦੱਸਿਆ ਕਿ ਪੁਲਿਸ ਦੇ ਮੁਲਾਜ਼ਮਾਂ ਨੇ ਇਸ ਗੱਡੀ ਦਾ ਪਿੱਛਾ ਕੀਤਾ ਅਤੇ ਪਿੰਡ ਨਾਨੋਵਾਲ ਦੇ ਨਜ਼ਦੀਕ ਜਦੋਂ ਉਹ ਫਰਾਰ ਹੋਈ ਕਾਰ ਦੇ ਨੇੜੇ ਪਹੁੰਚੇ ਤਾਂ ਉਸਨੇ ਪੁਲਿਸ ਦੀ ਗੱਡੀ ਨੂੰ ਫੇਟ ਮਾਰ ਦਿੱਤੀ, ਜਿਸ ਕਾਰਨ ਪੁਲਸ ਦੀ ਗੱਡੀ ਪਲਟ ਗਈ | ਇਸ ਘਟਨਾ ਵਿੱਚ ਇੱਕ ਏ. ਐਸ. ਆਈ. ਗੁਰਵੀਰ ਸਿੰਘ ਅਤੇ ਇੱਕ ਹੋਰ ਪੁਲਿਸ ਮੁਲਾਜ਼ਮ ਦੇ ਕੁੱਝ ਸੱਟਾਂ ਲੱਗੀਆਂ ਹਨ | ਉਸ ਨੇ ਫ਼ਰਾਰ ਹੋਈ ਕਾਰ ਦੇ ਨੰਬਰ ਤੇ ਵੇਰਵੇ ਸਮੇਤ ਕਾਰਜ ਸਵਾਰ ਦੋਨਾਂ ਵਿਅਕਤੀਆਂ ਵਿਰੁੱਧ ਇਰਾਦਾ ਕਤਲ ਸਮੇਤ ਵੱਖ-ਵੱਖ ਧਾਰਾਵਾਂ ਅਧੀਨ ਕੇਸ ਦਰਜ ਕੀਤਾ ਹੈ |
