ਖੰਨਾ, 3 ਮਈ (ਹਰਜਿੰਦਰ ਸਿੰਘ ਲਾਲ)-ਅੱਜ ਤੜਕੇ ਖੰਨਾ ਪੁਲਿਸ ਜ਼ਿਲੇ੍ਹ ਦੇ ਸਾਰੇ ਇਲਾਕਿਆਂ ਖੰਨਾ, ਸਮਰਾਲਾ, ਪਾਇਲ, ਸਾਹਨੇਵਾਲ, ਈਸੜੂ, ਬੀਜਾ, ਦੋਰਾਹਾ, ਮਾਛੀਵਾੜਾ ਸਾਹਿਬ ਆਦਿ ਵਿਚ ਅਚਾਨਕ ਆਏ ਝੱਖੜ, ਹਨੇਰੀ ਅਤੇ ਮੀਂਹ ਨਾਲ ਜਿਥੇ ਆਮ ਜਨਤਾ ਨੂੰ ਤਪਦੀ ਗਰਮੀ ਤੋਂ ਰਾਹਤ ਮਿਲੀ, ਉਥੇ ਹੀ ਖੇਤਾਂ ਵਿਚ ਖੜ੍ਹੀ ਮੱਕੀ ਦੀ ਫ਼ਸਲ ਨੂੰ ਭਾਰੀ ਨੁਕਸਾਨ ਹੋਇਆ | ਤੂਫ਼ਾਨ ਵਰਗੀ ਹਨੇਰੀ ਤੇ ਮੀਂਹ ਨੇ ਮੱਕੀ ਦੀ ਫ਼ਸਲ ਨੂੰ ਕਈ ਇਲਾਕਿਆਂ 'ਚ ਵਿਛਾ ਦਿੱਤਾ ਹੈ, ਜਿਸ ਨਾਲ ਕਿਸਾਨਾਂ ਦਾ ਕਾਫੀ ਨੁਕਸਾਨ ਹੋਇਆ ਹੈ | ਭਾਵੇਂ ਕਿ ਕਣਕ ਦੀ ਫ਼ਸਲ ਦੀ ਚੁਕਾਈ ਸਮੇਂ ਸਿਰ ਹੋ ਚੁੱਕੀ ਹੈ, ਪਰ ਮੰਡੀਆਂ ਵਿਚ ਬੋਰੀਆਂ 'ਚ ਭਰੀ ਕਣਕ ਭਿੱਜਣ ਨਾਲ ਵੀ ਕਾਫੀ ਨੁਕਸਾਨ ਹੋਣ ਦੀ ਖ਼ਬਰ ਹੈ | ਬਰਸਾਤ ਨਾਲ ਖੰਨਾ ਸ਼ਹਿਰ ਤੇ ਆਸ-ਪਾਸ ਦੇ ਇਲਾਕਿਆਂ ਵਿਚ ਜਰਗ ਚੌਕ, ਪੀਰਖਾਨਾ ਰੋਡ ਤੇ ਹੋਰ ਕਈ ਸ਼ਹਿਰ ਦੇ ਹਿੱਸਿਆਂ ਵਿਚ ਪਾਣੀ ਭਰ ਗਿਆ | ਏਸ਼ੀਆ ਦੀ ਸਭ ਤੋਂ ਵੱਡੀ ਅਨਾਜ ਮੰਡੀ ਖੰਨਾ ਵਿਚ ਫੜਾਂ ਵਿਚ ਪਈਆਂ ਬੋਰੀਆਂ ਦੇ ਸਟੈਕਾਂ ਥੱਲੇ ਪਾਣੀ ਖੜ੍ਹੇ ਹੋ ਗਿਆ ਅਤੇ ਕਣਕ ਨਾਲ ਲੱਦੇ ਟਰੱਕ 'ਚ ਲੱਦੀ ਬਿਨਾਂ ਤਰਪਾਲ ਕਣਕ ਦੀਆਂ ਬੋਰੀਆਂ ਵੀ ਭਿੱਜ ਗਈਆਂ ਜਦਕਿ ਐਫ. ਸੀ. ਆਈ. ਦੇ ਗੋਦਾਮਾਂ ਵਿਚ ਵੀ ਮੀਂਹ ਪੈਣ ਦੇ ਦੌਰਾਨ ਵੀ ਕਣਕ ਨੂੰ ਨਹੀਂ ਢੱਕਿਆ ਗਿਆ ਤੇ ਕਣਕ ਭਿੱਜਦੀ ਨਜ਼ਰ ਆਈ | ਕੱੁਝ ਮਜ਼ਦੂਰਾਂ ਦਾ ਕਹਿਣਾ ਸੀ ਕਿ ਤੇਜ਼ ਹਨੇਰੀ ਨਾਲ ਤਰਪਾਲਾਂ ਉੱਡ ਗਈਆਂ ਹਨ | ਅਧਿਕਾਰੀਆਂ ਅਨੁਸਾਰ ਖੰਨਾ ਮੰਡੀ 'ਚ ਸੀਜ਼ਨ ਹੁਣ ਖ਼ਤਮ ਹੋਣ ਦੀ ਕਗਾਰ 'ਤੇ ਹੈ ਅਤੇ ਇਕਾ ਦੁੱਕਾ ਕਿਸਾਨ ਹੀ ਮੰਡੀ ਵਿਚ ਫ਼ਸਲ ਲੈ ਕੇ ਆਉਣਗੇ, ਅੰਕੜਿਆਂ ਅਨੁਸਾਰ ਖੰਨਾ ਮੰਡੀ ਵਿਚ ਹੁਣ ਤੱਕ 9 ਲੱਖ 14 ਹਜਾਰ ਕੁਇੰਟਲ ਫ਼ਸਲ ਮੰਡੀ ਵਿਚ ਆ ਚੁੱਕੀ ਹੈ ਤੇ ਇਸ ਦੀ ਵਿੱਕਰੀ ਵੀ ਹੋ ਚੁੱਕੀ ਹੈ ਲਿਫ਼ਟਿੰਗ ਦੇ ਮਾਮਲੇ ਵਿਚ ਖੰਨਾ ਮੰਡੀ ਪਹਿਲੇ ਨੰਬਰ 'ਤੇ ਹੈ ਅਤੇ ਹੁਣ ਤੱਕ 93 ਫ਼ੀਸਦੀ ਫ਼ਸਲ ਦੀ ਚੁਕਾਈ ਹੋ ਚੁੱਕੀ ਹੈ |
