ਖੰਨਾ, 3 ਮਈ (ਹਰਜਿੰਦਰ ਸਿੰਘ ਲਾਲ)-ਅੱਜ ਤੜਕੇ ਖੰਨਾ 'ਚ ਆਏ ਅੰਤਾਂ ਦੇ ਤੂਫ਼ਾਨ ਤੇ ਬਰਸਾਤ 'ਚ ਸਥਾਨਕ ਜੀ. ਟੀ. ਰੋਡ ਤੇ ਬਦੀਨਪੁਰ ਰੋਡ 'ਤੇ ਸਥਿਤ ਪ੍ਰਮੁੱਖ ਉਦਯੋਗ ਲਕਸ਼ਮੀ ਮਿੱਲ ਦਾ ਸ਼ੈੱਡ ਡਿੱਗਣ ਨਾਲ ਬਹੁਤ ਵੱਡਾ ਨੁਕਸਾਨ ਹੋਣ ਦੀ ਖ਼ਬਰ ਹੈ | ਸ਼ੈੱਡ ਦੇ ਉੱਪਰ ਲੱਗਿਆ ਸੋਲਰ ਸਿਸਟਮ ਵੀ ਲਗਪਗ ਬਰਬਾਦ ਹੋ ਗਿਆ | ਲਕਸ਼ਮੀ ਮਿੱਲ ਦੇ ਮਾਲਕ ਵਿਨੋਦ ਵਸ਼ਿਸ਼ਟ ਨੇ ਕਿਹਾ ਕਿ ਚੰਗੀ ਗੱਲ ਇਹ ਹੋਈ ਕਿ ਉਸ ਵੇਲੇ ਕੋਈ ਮਜ਼ਦੂਰ ਸ਼ੈੱਡ 'ਚ ਨਹੀਂ ਸੀ | ਸ਼ੁਕਰ ਹੈ ਕਿ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ | ਜਾਣਕਾਰੀ ਅਨੁਸਾਰ ਨੁਕਸਾਨ ਲੱਖਾਂ ਜਾਂ ਕਰੋੜਾਂ ਵਿਚ ਹੈ ਪਰ ਅਜੇ ਇਸ ਦਾ ਪੂਰਾ ਅੰਦਾਜ਼ਾ ਨਹੀਂ ਲਗਾਇਆ ਜਾ ਸਕਦਾ |
